Ézai 19 - Kazambale lé Sebe Sauunu 1979

Bale é dan we lɛdɔ lɛ Éjipitinu gi

¹ Balelawe lé Ézai a fe Éjipiti ma, yee lo. Ka ye, Gakelebale vɔ lafu lé éé giéma kelekele, a ta, yé é da Éjipiti tɛrɛ la. Éjipiti munu lé miyilinu ma nyɔɔn a ’lɛ, yé Éjipiti munu fuu si wo ta.

² Maa dan gulidanfɛnu nɔ lɛ Éjipiti munu lɛ léé, ’wo guli dan Éjipiti munu ma; bwe é dan guli dan lɛ é bwe va, béé é dan nwa lɛ é béé ma, fla é dan guli dan lɛ fla va, bɛn é dan guli dan lɛ bɛn va.

³ Éjipiti munu léli fuu é dan si lɛ wo ta, we lé wa plaan ’wo ke lɛ, maa dan ’bɛ faa sɛrɛ lɛ. Wolé miyilinu koo, yokɛlɛzannu koo, miléli laazannu koo, tɛlɛ tɛlama wefezannu koo, wo dan we laa lɛ wo lee.

⁴ Maa dan Éjipiti munu pa lɛ wemaplɛplɛzan lee; minwiinzan lé a gi ke é pɔnpɔn, é dan pla lɛ wo nwiin. Mizan, lai sunyanu lé Gakelebale ɛ fe.

⁵ Yuu lé wa laama Nil, é ’ka zénna wɛyi va é dɛrɛ lo. A guru gi é dan ga lɛ.

⁶ Gyɛ é dan kɛlɛ lɛ a ’yi va, Éjipiti tɛrɛ la ’yiyoronanu lé wa kɛlɛ, ’bɛnu é dan béli lɛ. Blawɔlɛ valé gyan ma é dan yuru lɛ.

⁷ Ana tɛrɛ ta é dan vo lɛ é pla yuu gɔ faa la; fɛ faa lé wa vɔ yuu sɔnɔ, é dan ga lɛ; é dan nɔla lɛ vun nya, yé ana é vo é pla.

⁸ Pɔgyɛmunu é dan dunnu lɛ; munu faa lé woo kɔ vɔa yuu va, wo dan wuvɔ lɛ; munu faa lé woo séli nwɛɛn‐an ’yi va, wo bli kyɛ é dan dɔ lɛ.

⁹ Munu faa lé woo lɛn kununu nyanama paan, yé wa taan sɔ fu nya, yaragyɛwe é dan bɔ lɛ wo ma.

¹⁰ Tɛrɛlawe kɛlɛmunu fuu é dan si lɛ wo ta; nyanamapamunu bli kyɛ é dan dɔ lɛ.

¹¹ Soan lé mi segelenu a ’tugyɛzannu nya é pla. Wedɔɔmunu lé woo we plaan Faraɔn lɛ, wa wedɔɔalozannu palu nya. É kɛlɛ kaa yé ka we fe Faraɔn lɛ léé: Maa a wedɔɔzan be nya, an tranu a minwiinzannu nya é kyɛɛn?

¹² Faraɔn, ilé wedɔɔzannu a kyɛɛn? ’Wo we gɔɔn i lɛ ma; we lé ke lai sunyanu lé Gakelebale gi, Éjipiti munu lé we ma, ’wa gɔɔn i lɛ ma.

¹³ Soan lé mi segelenu a gweawuogizannu nya; Nofa lé mi segelenu ’wuo gi bɔrɔle a é pla; wo bɛn nwiinzannu a Éjipiti munu saanna.

¹⁴ Gakelebale é dan glinni vɔ lɛ wo ’wuo gi léé, ’wo Éjipiti munu saan wo kɛlɛwe faa gi, bélé nwɛgyɛzan lé tawobɛ zo, ’té éé fééan.

Éjipitinu wo dan Bale bɔ lɛ

¹⁵ Dé é a fuablezan nyaoo, dé é a nyanégyɛzan nyaoo, dé é a tɔzan nyaoo, dé é a mi pla nyaoo, Éjipiti mi do kpen lé we do kpen va ’ka dan gyɛ lɛ lo.

¹⁶ ’Bɛ yi la, Éjipiti munu é dan kɛlɛ lɛ bélé lomu zo. Dé wa ye léé, lai sunyanu lé Gakelebale nwa ’wo ma yé wa ye we kɛlɛna, wo ma é dan nyɔɔn lɛ, yé kana é dan zén lɛ wo gi.

¹⁷ Juda tɛrɛ é dan kɛlɛ lɛ Éjipiti munu lé kanamafɛ nya; dé wa mawe fe wo lɛ, di é dan kini lɛ wo gi, we lé ke lai sunyanu lé Gakelebale bli gi wo vaziawe nya, a we ma.

¹⁸ ’Bɛ bléyi va, Éjipiti tɛrɛ la fla soru é dan Kanaan dére vɔ lɛ yé wo dan lai sunyanu lé Gakelebale ’nyɔɔn lɛ. Wo dan alé fla do laa lɛ, guruzanaagi fla.

¹⁹ Yee bléyi duo nya, Gakelebale banna do é dan kɛlɛ lɛ Éjipiti tɛrɛ méléna yé wo dan Gakelebale seledɔmigifɛ do dɔ lɛ wolé tɛrɛ glɛ la.

²⁰ ’Bɛ é dan kɛlɛ lɛ tɔmase valé wenayefɛ nya lai sunyanu lé Gakelebale lɛ Éjipiti tɛrɛ la; wo dan siaa lɛ Gakelebale lɛ, klepawotazannu lé we ma, yé é dan wo siwegizan valé wo ta bélidɔzan pa lɛ wo lɛ zia.

²¹ Gakelebale é dan ébo gɔɔn lɛ Éjipiti munu lɛ yé Éjipiti munu wo dan Gakelebale dɔɔ lɛ yi ’ko la; wo dan sarakanu bo lɛ yé wo dan da lɛ blɛ nya Bale lɛ; wo dan Gakelebale kun lɛ yé a lɛ é dan sɔɔ lɛ.

²² ’Bɛ zo lé Gakelebale é dan Éjipiti munu bla lɛ. É dan wo bla lɛ, naa, é dan wo béli lɛ yé wo dan ’wo péli vɔ lɛ Gakelebale va yé é dan é tɔné dɔ lɛ wo lɛ yé é wo béli.

²³ Yee bléyi duo nya, zi do é dan si lɛ Éjipiti tɛrɛ la yé é go Asiri tɛrɛ la. Asiri munu é dan go lɛ Éjipiti tɛrɛ la, yé Éjipiti munu é go Asiri tɛrɛ la, yé Éjipiti munu valé Asiri munu, wo fiénu é dan Gakelebale bɔ lɛ.

²⁴ Yee bléyi duo nya, Izraɛl é dan kɛlɛ lɛ wo yaazan nya, yé é dan é péli vɔ lɛ Éjipitinu valé Asirinu va, yé Bale é dan tɛrɛ ’konu drɔɔ vo lɛ.

²⁵ Lai sunyanu lé Gakelebale é dan wo drɔɔ vo lɛ a fele nya léé: Anlé munu, Éjipiti munu, wo drɔɔ ’é vo ma; an panyanama, Asiri munu, wo drɔɔ ’é vo ma; anlé tɔnɔ, Izraɛl munu, wo drɔɔ ’é vo ma.