Ézai 18 - Kazambale lé Sebe Sauunu 1979

Bale é dan we lɛdɔ lɛ Étiopinu gi

¹ Bii tɛrɛ lé sunyanu lé tawole vun ke wena i ta Étiopi tɛrɛ la yuunu zi,

² i munu nwunvɔa wɛyi ta, woo tawoo blawɔlɛ ’yitagoroné gi, ’yi yuɛ la. Tawo kelekele nwunvɔzannu, ’ka go bɛn plɛplɛ lé a fuu ke a ta, a va. É sia bɛn ’ko nwale ma, munu éé kanaan wo lee; bɛn plɛplɛ lé éé munu faa wiian, tɛrɛ lé yuunu a gi bɔi, yee lé.

³ ’Kaa faa lé ka ke tɛrɛ faa la, drapo lé wa dɔ gɔnu nwiin, ’ka nagini. ’Ka tɔné dɔ béli lé é ke wena, a lɛ.

⁴ Naa, Gakelebale lé an lɛ léma: Maa a é nyanale drɔɔ anlé fɛna, ’té maa naginian kyɛyee bɔbléyi va, fɛ gyɛbléyi va, ’té fli éé vɔa fɛnu ma kiɛre.

⁵ Naa, fɛ sobléyi ’lɛ, dé dɔrɔyili a nɛɛna, dé a vwi bi yé a poro baa yé é tana, maa dan a bɛnu bɔi lɛ kɔblané nya, maa dan a yilinu ma bɔi lɛ.

⁶ É dan vo lɛ wigyɛmianénu lé ke gɔnu nwiin, wozé fɛna nya, é dan vo lɛ tɛrɛlawinu zé nya. Lɛɛ dabléyi va, wigyɛmianénu é dan wo galenu ble lɛ, fɔɔ yé é bɔ yɛrɛ gabléyi ma, yé winu é dan ’woé ble lɛ.

⁷ ’Bɛ bléyi va, munu plɛplɛ lé wo fuu ke wo ta, ’té munu éé kanaan wo lee wo nwabléyi va, bɛn plɛplɛ lé éé munu faa wiian, ’té yuunu alé tɛrɛ gi bɔi bɛ, wo dan da lɛ lai sunyanu lé Gakelebale lé blɛ nya. Wo dan da lɛ wo nya, fɛana lé lai sunyanu lé Gakelebale tɔ ke, Siɔn gɔ nwiin, ana.