Ézai 17 - Kazambale lé Sebe Sauunu 1979

Bale é dan we lɛdɔ lɛ Siri valé Izraɛl gi

¹ Balelawe lé Ézai a fe Damas ma, yee lo. Ka ye, Damas ’ka dan kɛlɛ lɛ fla nya é dɛrɛ lo; é dan kɛlɛ lɛ é ’bin nya é pla.

² Munu fwi Aroɛɛ flanu ta, wo wo vo trubɛnu lɛ; woo yiié ’bɛna yé mi do kpen ’ka kana zén‐é wo gi lo.

³ Guliyɔɔkɔn ’ka Éfraim tɛrɛ la é dɛrɛ lo. Damas lé fuatɛrɛ koo, é ziin; Sirinu lé wo vo, wozé é dan kɛlɛ lɛ bélé Izraɛl munu tɔbɔle zé kɛlɛ fɛan zo, a zo. Lai sunyanu lé Gakelebale ɛ fe.

⁴ ’Bɛ yi la, Jakɔb tɔbɔle yi é dan ga lɛ; bua lé é a wo bɛ, é dan kwéé lɛ.

⁵ É dan kɛlɛ lɛ bélé ’sa lé ’sagyɛzan a gyɛ, a gɔ zo; ’té wo ’sanwun ’léé bɔié yé wa sia Réfaim lé gɔworona na, a zo.

⁶ É dan vo lɛ bélé ɔliviyili gɔ ma zo, ’té wa yili nyɔɔn, ’té a poro fié valé yaa vo a nwiin yé a poro ziɛn valé soru vo a bɛnu ’léé, a zo. Gakelebale Izraɛl lé Bale ɛ fe.

⁷ ’Bɛ yi la, mi é dan é yuɛ vɔ lɛ é Kɛlɛzan lɛ; é dan é yuɛ vɔ lɛ Izraɛl lé Mi Sauun lɛ;

⁸ é ’ka é yuɛ vɔa yobannanu lé é a kɛlɛ éboan, wo ta lo. Asataté yonu valé yiribɔnu lé é wo kɛlɛ bɛ, é ’ka dan é bɔn‐in bɔrɔ lɛ wo ma é dɛrɛ lo.

⁹ ’Bɛ yi la, alé fla plɛplɛnu é dan kɛlɛ lɛ bélé pɔrɔ lé wa wo yé wa fiafia vɔ, ana zo, gɔnu nwiin; wo dan fwi lɛ ana Izraɛl munu ’lɛ. É dan kɛlɛ lɛ bwi nya.

¹⁰ Naa, Bale lé é ka si we gi, ka gi san ’bɛ ma, i yɔɔwuogɔlɛ sele saan i gi, azama. Ka féi pa yonu zé nya, ka dɔrɔyili suru bale bɛnu lɛ.

¹¹ Dé i wo suru i gɔrɔ bo wo zi, ’bɛ zuo sɛ tɔɔn a vwi bi, naa, dé i ginanabléyi bɔ a sole we ma, ’té é a é fou nya. É a gyɛ lé a lia ’ka lo, a nya.

¹² Oo, munu kiɛre a wena; wo vun éé wé bélé wɛyi vun wele zo. Bɛnnu bɔ gyɛ, woo gi éé wé bélé ’yiyoro plɛplɛnu gi wele zo.

¹³ ’Bɛnu gi éé wé bélé ’yi blɛnnu vun zo; naa, Bale bon‐ɛn wo nya, yé wo vlanburu baa. É wo bin bélé gɔ nwiin fu éé ’sapɛɛ sian fɛan zo, a zo, bélé vungoi lé barikoko a sian, a zo.

¹⁴ Dé nyanadi pa tɔɔn, wo guru zana a gi fiaa; dé tu ’ka tan kini lɛ lo, ’té wo fwi é kwakwa. Munu lé woo ’wiié ko ta, ’té woo fɛnu sié ko lee gla nya, wozé é dan kɛlɛ lɛ fɛan zo, yee lé ke bɛ.