Ézai 16 - Kazambale lé Sebe Sauunu 1979

Moab munu lé we kɛlɛ tɔntɔn

¹ ’Ka ’blanénu pa zia tɛrɛ nwiinzan lɛ. ’Ka wo si Séla, bwi gi, yé ’ka wo pa Siɔn munu lɛ zia gɔ nwiin.

² Moab lomu a bélé miané lé ke danna a gi, a zo; Moab lomu a bélé miané sua zo Aanɔn lé ’yi kinina.

³ ’I we pla ko lɛ, ’i we tegele kɛlɛ ko lɛ; ’i i furɔ zén ko ta é yiéyi bélé gunu zo; munu lé wa wo zuo binna, ’i wo yɔɔ. Té i vlanburuzan liwo lo.

⁴ Moab munu lé ke lulazannu nya, ’i zi nɔ wo lɛ léé, wo nyana i va. ’I wo yɔɔ misɛrɛzan lee. Naa, yaale mi ta é dan nyaa lɛ, yé fɛ sɛrɛle é dan nyaa lɛ. Mi lé é tɛrɛ zɔn é gane nya, a ta é dan saan lɛ.

⁵ Dé é sɔ mi lɛ léé, élé webleblin dɔ gligli, ’é kɛlɛ mi zin nya ma. Wo dan a ye lɛ léé, David kululazan do, yarapawelazan do, é dan nyana lɛ ana; é a weblezan lé wedrɔle sɔ a lɛ bélé mi béé zo, a nya, ’té a fuu a a ta we tegele kɛlɛna.

⁶ Ko Moab munu lé boblɛn dɔɔ, boblɛn lé é mini a lɛ, yee lé; abo bɔle koo, abo nwale koo, alé mi naginile é yuɛ zuo koo, alé boadérenu koo, ko wo dɔɔ.

⁷ Bɛwemalé Moab munu a dunnuna Moab tɛrɛ lé we ma, wo faa a dunnuna. Ka dan bamaflin lɛ Kii‐Arésɛt ’bin la, wa sɛrɛ naané.

⁸ Naa, Esibɔn lé féinu faa vo é gɔ nya; yé bɛnnu nwiinzannu Sibima lé dɔrɔyilinu faa kini; yee dɔrɔyilinu gi go gyɛle nya fɔɔ Jaézɛɛ, yé é go fɔɔ bwi gi, yé a bɛnu bɔ fɔɔ wɛyi zi.

⁹ An wuvɔ é ziin Sibima lé dɔrɔféi ta, bélé an wuvɔ Jaézɛɛ ta fɛan zo, a zo. Esibɔn‐oo, Esibɔn, Éléaléoo, Éléalé, an yuɛyi zén‐é ka ta; naa, gulidandére we kalé féinu ta.

¹⁰ Ginanale san ka lee kalé féinu lé we ma; ka ’ka lɛrɛ vɔa kalé dɔrɔféi é dɛrɛ lo, yé ka gi ’ka nanaan ana é dɛrɛ lo. Dɔrɔkɛlɛzan ’ka dan dɔrɔ zɔn lɛ ’é gane nya é dɛrɛ dɔrɔkɛlɛwoli gi lo. Maa ginana siaale dɔ.

¹¹ É ziin, an gi éé nyɔɔn‐an an ma bélé kɔnɔ bale nyɔɔnle zo Moab lé we ma, yé an dunnuan an gi Kii‐Arɛs lé we ma.

¹² Woo Moab munu yé, ’té wo ’wobo wɔlɛ gi nyaa ’wo ma gɔ nwiin yobannanu na. Woo goo bazoro lɛ ’wolé fɛna tinle na, yé wo ’ka we do kpen yé lo.

¹³ Dére lé Gakelebale a fe ana mɔn Moab lé we ma, yee lé ke bɛ.

¹⁴ Yé sin Gakelebale léé: É sia kyɔ ’ko lɛɛ yaa, nyanamapazan lé lɛɛ nɔnɔle yɛrama, Moab tɔbɔle é dan kɛlɛ lɛ serelebomafɛ nya, ’bɛ valé alé migu blɛn faa nya. Fɛ lé é vo, é dan kɛlɛ lɛ kiéné, é vo sɛ ’té é ’ka boenwo lo.