Ézai 14 - Kazambale lé Sebe Sauunu 1979

Lulamunu da ’wo pa gi

¹ Naa, Gakelebale é dan é nyanai zén lɛ Jakɔb lé munu ta. É dan Izraɛlnu si lɛ é ziin, é dan wo nyana lɛ kli wolé tɛrɛ la yé bɛnnu é dan nyana lɛ wo va, yé wo dan kɛlɛ lɛ Jakɔb lé munu nya do.

² Bɛn bɛ gi munu é dan Izraɛl si lɛ yé wo go wo nya Izraɛl lé tɛrɛ la, yé munu lé ’bɛnu da wo nya bɛ, ’bɛnu é dan kɛlɛ lɛ Izraɛlnu leegɔnénu valé wo leelomu nya, Gakelebale lé tɛrɛ la. Munu lé wo kɛlɛ ’bɛnu lé luu nya, ’bɛnu é dan kɛlɛ lɛ woé luu nya, yé wo dan pla lɛ yaawotazannu nwiin.

Bale we lɛdɔ Babilɔn nwiinzan blɛn gi

³ Dé Gakelebale flinle nɔ ka lɛ ka wɔlɛi nyaale ka ma valé kalé kleblele zuo, kalé luu gi nyanéblele zuo,

⁴ ka dan Babilɔn nwiinzan tɔ vɔ lɛ lɛrɛ nya ’ko zo léé: Éé! é kɛlɛ i lɛ é yi; yaako?-?tazan ’ka é dɛrɛ lo! Yaale ko ta nyaa!

⁵ Gakelebale mi nyanénu lé yili yéli; é plakonwiinzannu lé vlewɔlɛ yéli.

⁶ Mi lé éé munu blaan é wɛwɛ nya, ’té é ’ka daan fɛ duunle ma wo lɛ lo, mi lé é bɛnnu pla é wuo élé bliflile nya, sin, wa zuo binna, ’té wo nyanai ’ka zén a ta lo.

⁷ Tɛrɛ faa gi nana ’wo flinle valé ’wo vole drɔɔ we ma; woo ginanalɛrɛnu vɔa.

⁸ Siprɛyili boen, ’bɛ valé Liban tɛrɛ la sɛdrɛyilinu nya, wo gi a nanana i diale we ma, ’té wa fé léé: É sia i diale ma, mi do kpen ’ka dan ko vɔ lɛ é dɛrɛ lo.

⁹ Migale nyanana faa bɔ gyɛ i sile zia we ma; wo migalenu vuo, wo tɛrɛ la mi blɛnnu faa vuo i dale we ma; bɛnnu nwiinzannu faa nwa wo yiana.

¹⁰ Wo faa kun wefele ma i lɛ yé wo léé: Bii é ziin, i kɛlɛ bélé ko zo, plɛplɛ ’ka i lee lo. Kaa bɔ ékema sin.

¹¹ Ilé migisanmawe zun gamunu nyanana, ’bɛ valé ilé kpélé gyɛle nya. Ziri kɛlɛ i yialafɛ nya, ’té ziri a i tasɔ nya.

¹² Pɔrɔkunnu monéné, tukini gunu, i si la gi i dia kaa? Bii lé, guliwuo vo i lɛ bɛnnu nwiin, wo i dia tɛrɛ va.

¹³ I lé i bli gi léé: Maa dan go lɛ lai, maa dan anlé fuablin dɔra lɛ Bale lé monénénu ta loru; maa dan nyana lɛ munu zén ékeva gɔ nwiin yirinwana bɛbolazia glɛ la.

¹⁴ Maa dan nwa lɛ latinu ta loru, maa dan kɛlɛ lɛ bélé Loruzan zo.

¹⁵ Naa, wo i vuli migalenu nyanana, guru wɔlɛ ma.

¹⁶ Munu faa lé woo i yé, woo i naginian téiin, ’té woo ’wo gi daan ilé we ma, yé wo léé: Mi lé é tɛrɛ ma nyɔɔn yé é bɛntɛrɛnu zana a gi, yee lé ke bɛɛ?

¹⁷ Mi lé é tɛrɛ la munu gyɛ yé wo pagi vo bwi nya, ’té éé ’wiié flanu ta, ’té é ’ka daan munu lé é wo kun luu nya, wo ma lo, yee lé ke bɛɛ?

¹⁸ Iin, bɛnnu faa nwiinzannu wo faa do do yia wo vun gi wo tɔbɔle nya.

¹⁹ Naa, bii, wo i si baa i vun ma bélé yilibɛ lé é ’ka mi yuɛgi bɔa lo, a zo, bélé munu lé wo wo gyɛ gwɔun nya yé wo wo vuli gɔlɛnu guru gi, wo zo, bélé migale lé wa zɔn wo gane nya, a zo.

²⁰ Naa, i ilé tɛrɛ sɛrɛ, yé ilé we ma lé ilé munu zamaga wo, amalé ka valé wonu pavun ’ka do lo; wo ’ka dan bɛn nyané tɔ fe lɛ é dɛrɛ monomono lo.

²¹ ’Ka ma’lɛrɛ, ’ka wo faa benu gyɛ ékeva do wo tranu lé weplenu ma. Té wo nwa é dɛrɛ tɛrɛlamunu faa kelele guli nya we ma lo; té wo flanu pa é dɛrɛ tɛrɛ ’ko la lo.

Bale é dan Babilɔn sɛrɛ lɛ

²² Lai sunyanu lé Gakelebale léé: An dan nwa lɛ wo ma. Gakelebale léé: Babilɔn koo, a tamunu valé wo nénénu koo, an dan wo tɔ fwi lɛ yé an dan wo pagi san lɛ.

²³ Lai sunyanu lé Gakelebale léé: Maa dan a kɛlɛ lɛ ’téli nyanana valé ’yidɔna nya. Maa dan ana sia lɛ yé ana sia faané a fɛ sɛrɛle nya.

Bale é dan Asiri munu kulu ga lɛ

²⁴ Lai sunyanu lé Gakelebale ébo ’nyɔɔn léé: lin, we lé maa a fe léé, an dan a kɛlɛ lɛ, é dan bɔ lɛ; yé we lé an gi bɔrɔ a nya, a lɛ é dan sɔɔ lɛ.

²⁵ Maa dan Asirinu ’wii lɛ anlé tɛrɛ la; maa dan wo zɔn lɛ an gane nya anlé gɔnu nwiin; maa dan wolé luubale kini lɛ anlé munu bɔrɔ ma, yé maa dan wolé kɔné si lɛ wo nwiin.

²⁶ We lé é dɔ an gi tɛrɛ faa zé nya, yee lé ke bɛ. An bɛ lé é ke é soile bɛnnu faa ma, yee lé ke bɛ.

²⁷ É dɔ lai sunyanu lé Gakelebale gi ’ko zo, de ɛ dan dɔ lɛ a maa? A bɛ lé é a soi, mi kyɛn ɛ dan a pla lɛɛ?

Bale é dan Filisitinu kulu ga lɛ

²⁸ Minwiinzan blɛn Akaz galɛɛ nya, Ézai balelawe ’ko fe:

²⁹ Filisiti tɛrɛ lamunu, té ka gi é nana léé, ka bla vlewɔlɛ a é yélile, lo. Méné dɔgɔnɔ é dan né yaa lɛ bɔménéluzanuo nya, yé ’bɛ é dan né yaa lɛ dragɔn lé éé sié, a nya.

³⁰ Yé nyanégyɛzan babanu é dan fɛblele ye lɛ, yé wenaané bɔmamunu é dan nyana lɛ woboma; naa, maa dan ilé nénu gyɛ lɛ lɔrɔ nya yé ’wo ga. Yé i pɔné lé ’bɛ vo, wo dan ’bɛnu gyɛ lɛ.

³¹ Duoli, ’i dunnu; fla, ’i gyɛ bo. Filisitinu lé tɛrɛ faa tere, i ma ’é nyɔɔn. Naa, kyɛgoi a nwana yirinwana bɛbolazia; i nyanézannu lé sunya balenu a é tunule ékema.

³² Munu lé wo wo nwunvɔ, wo dan a zi pa lɛ wo lɛ nɔɔ? Wo dan a fe lɛ wo lɛ léé: Gakelebale Siɔn gane vɔ, yé alé munu lé wenaané bɔ wo ma, woo yɔɔna yé ’bɛna.