Ézai 13 - Kazambale lé Sebe Sauunu 1979

Bale é dan we lɛdɔ lɛ Babilɔn gi

¹ Babilɔn ma we lé Bale a gɔɔn Amosi be Ézai lɛ, yee lé ke ’ko.

² ’Ka drapo nwa gɔlɛgɔ nwiin, ’ka siaa gulidandére nya Babilɔn nyanézannu lɛ. ’Ka tɔmase kɛlɛ wo lɛ ka bɛ nya yé ’wo da yaamitamunu lé flagɔrɔ ’léé.

³ Anlé sunyanu lé maa wo si a va, an dére nɔ wo lɛ; anlé nyanazannu, anlé bliflile lɛsɔɔzannu, maa wo laa. Munu lé wo gi nana an blɛn ma, maa wo laa.

⁴ ’Ka tɔné dɔ. Fɛ vun a wena gɔ nwiin bélé mi gu vun wele zo. Bɛntɛrɛnu lamunu valé bɛnnu lé wo zén ékeva, wo vun wele lé. Sunyanu lé wo dan guli dan lɛ, wa ’wolé gulili sina lai sunyanu lé Gakelebale ’lɛ.

⁵ Wo si tɛrɛ baa la, wo si la glɛ sina yé wo da. Gakelebale valé élé bliflile lɛsɔɔzannu, wo dan ana tɛrɛ faa sɛrɛ lɛ.

⁶ ’Ka dunnu, naa, Gakelebale lé yi bɔ é pu; Plɛplɛfaazan lé fɛ sɛrɛle a dana.

⁷ Bɛwemalé mi faa bɛ é dan ga lɛ é ma, yé mi faa zuru é dan vɔ lɛ.

⁸ Di kini wo gi; nyɛ zénle wo gi é dan wo kun lɛ kleblele nya. Woo plɛn‐an bélé né yaa le zo. Wo dan dɔ lɛ dan‐uun, ’té woo ’wo ke ginian wo ’léé nya; wo yara kyɛ é dan dɔ lɛ.

⁹ Ka ye, Gakelebale lé yi bɔ. Yi nyané lé, blifliyi valé wɛwɛbabané yi lé. É dan wenyanékɛlɛzannu kulu ga lɛ yé tɛrɛ ta é dan vo lɛ tété.

¹⁰ Naa, lagi monénénu valé pɔrɔ kunnu monénénu wo ’ka dan bi lɛ é dɛrɛ yé wo wo san ye lo. Dé yiri nwa tɔɔn, ’té gunu dɔra a ta yé moné ’ka dan bi lɛ é dɛrɛ lo.

¹¹ Maa dan we lɛdɔ lɛ tɛrɛlamunu gi, an blifliwe lé wa kɛlɛ, a we ma. Maa dan we lɛdɔ lɛ mi naanénu gi wolé weple lé we ma. Maa dan boblɛnzannu lé boblɛn nyaa lɛ; maa dan yaamitazannu lé mi naginile wo yuɛ zuo lé we nyaa lɛ.

¹² Mi we é dan dɔ lɛ bélé kyan we a fɛan zo, a zo. Mi we é dan dɔ lɛ Ofii kyan we zo.

¹³ Bɛwemalé maa dan lanu puo lɛ. Tɛrɛ dɔralafɛ ma é dan nyɔɔn lɛ lai sunyanu lé Gakelebale bli flile we ma, a wɛwɛbabané yi la.

¹⁴ Wo faa do do é dan nɔla lɛ ’wolé munu va; wo faa do do é dan fwi lɛ yé wo go ’wolé tɛrɛ la bélé plɛn‐an lé di kini a gi, a zo, bélé trubɛ lé a tabinzan ’ka lo, a zo.

¹⁵ Munu faa lé wo bɔ wo ma, wo dan wo fɔn lɛ; munu faa lé wo wo kun, wo dan wo gyɛ lɛ gwɔun nya.

¹⁶ Wo dan wolé nénu ’wii lɛ wo yuɛ va; wo dan wolé kɔnnu ’wii lɛ, yé wo dan zɔwɛgyɛ lɛ wo nanu ta gla nya.

¹⁷ Maa dan Mɛdenu nwa lɛ wo ma; gɔɔlifu ’ka ’bɛnu yuɛ gi bɔa lo, yé ’bɛnu bli ’ka bɔa kyan ma lo.

¹⁸ Wo dan pɛniɛnu gyɛ lɛ wolé sa nya; wo nyanai ’ka dan zén lɛ wolé nénu ta lo; wo yuɛ ’ka dan dɔ lɛ né do kpen ma lo.

¹⁹ Babilɔn, bɛntɛrɛnu lé wɛɛwɔlɛ, Kaldé munu lé ’lɛrɛfɛ, wolé bokɛlɛgi blɛn fɛ, é dan kɛlɛ lɛ bélé Sɔdɔm valé Gɔmɔɔ lé Bale wo sɛrɛ, a zo.

²⁰ Mi ’ka dan nyana lɛ ana é dɛrɛ monomono lo. Munu ’ka dan kɛlɛ lɛ ana é dɛrɛ monomono lo. Arabunu ’ka dan wolé sɔkɔnnu dɔ lɛ ana lo. ’Blatabinmunu ’ka dan ’wolé trubɛnu yii lɛ ana lo.

²¹ Bwigiwinu é dan ana si lɛ ’wo yiina nya yé kurubélinu é dan ana kɔnnu fan lɛ. Miané lé duonu é dan a kɛlɛ lɛ ’wo nyanana nya yé bolinu é dan zana gyɛ lɛ ana.

²² Gwenu é dan we lɛ wolé fuakɔnnu gi; bwigiblénnu é dan we lɛ wolé zanagyɛagikɔnnu gi. Alé bléyi bɔ é pu. Alé yinu ’ka vo lɛ grɔgrɔ lo.