Ézai 11 - Kazambale lé Sebe Sauunu 1979

Bɛntɛrɛ lé é vo drɔɔ

¹ Izai bɛ do é dan dɔ lɛ é ma bélé yilibɛ zo, yé a suni do é dan fɔn lɛ a ta.

² Gakelebale Léli é dan nyana lɛ ’bɛzan gi; Wedɔɔléli lé, ’wuoataléli lé, Weplamilɛléli lé, plɛplɛléli lé, Gikiniléli lé, kana Gakelebale lee léli lé.

³ Kanale Gakelebale lee a alé flinle nya; É ’ka dan we ble lɛ, we lé é a ye é yuɛ nya, ’bɛ yɛrama lo. É ’ka dan we gi bɔi lɛ, we lé é a ’ma é tɔné gi, ’bɛ yɛrama lo.

⁴ Naa, é dan nyanégyɛmunu lé we ble lɛ é boen ma; Yé é dan tɛrɛ la nyanaizénlamunu lé we gi bɔi lɛ tegele; É dan tɛrɛlamunu bla lɛ é dére nya bélé vlewɔlɛ zo, Yé é dan mi nyanénu gyɛ lɛ ’é ’léé fu nya.

⁵ Wetegele é dan kɛlɛ lɛ a nyana wuo kyɛsidi nya. Yé yarapale we la é dan kɛlɛ lɛ a gyɛn kyɛsidi nya.

⁶ Glau valé ’blané é dan nyana lɛ ékeva, Yé kua valé boliné é dan yii lɛ ékeva; Diriné koo, golizrané koo, wi lé wa pa yé ’é bua, ’bɛ koo, wo dan vo lɛ ékeva, Yé né kiéné é dan go lɛ wo nya.

⁷ Dirida valé urisi é dan lu ble lɛ ékeva, Yé wolé nénu é dan yia lɛ ékeva; Golizra é dan lu ble lɛ bélé diri zo.

⁸ Nyɔmané é dan zana gyɛ lɛ ménénwunnu yɛrɛ ’léé, Yé né kiéné é dan é bɛ wo lɛ bɔménéluzanuo yɛrɛ gi.

⁹ Wo ’ka dan wenaané kɛlɛ lɛ anlé gɔ sauun faa nwiin lo, Yé wo ’ka dan fɛ sɛrɛ lɛ ana lo; Naa, Gakelebale dɔɔle é dan tɛrɛ ta sɔɔla lɛ, Bélé ’yi éé wɛyi wɔlɛ ma sɔɔlaan fɛan zo, a zo.

¹⁰ ’Bɛ yi la, gɔn lé é fɔn Izai ma, É dan kɛlɛ lɛ drapo nya migɔnɔnu lɛ; Bɛnnu faa é dan nɔla lɛ a vazia, Yé fuasan é dan kɛlɛ lɛ a nyanana nya.

Lulamunu wo dan da lɛ ’wo pa gi

¹¹ ’Bɛ bléyi duo nya, Mizan é dan é bɛ soi lɛ a gɔnɔ fiézan nya, alé mi pɔnénu lé wo vo, wo tabole we gi, ’té wo ke é sɔɔlale Asiri tɛrɛ valé Éjipiti tɛrɛ koo, Patrɔs valé Étiopi tɛrɛ koo, Élam valé Sinéaa valé Amat koo, wɛyi worona tɛrɛnu koo, wona.

¹² É dan drapo nwa lɛ bɛnnu zé nya; Izraɛl munu lé wo ke lulazannu nya, é dan wo zén lɛ ékeva, yé Juda munu lé wo ke é sɔɔlale, é dan wo si lɛ tɛrɛ glɛ ziɛn sina yé é wo faa zén ékeva.

¹³ Éfraim munu ’ka dan maawo lɛ é dɛrɛ lo; wo nyané lé ke Juda munu gi, ’bɛ yi é dan ga lɛ. Éfraim munu ’ka dan maawo lɛ Juda munu va é dɛrɛ lo. Juda munu ’ka dan bla gié lɛ ’wo péli ma yé wa pla Éfraim munu nwiin é dɛrɛ lo.

¹⁴ Wo dan ’wo péli vɔ lɛ do yé wo nwa Filisitinu ma yirivɔnazia, yé wo fɛ si yirinwanazia munu lee gla nya. Édom munu valé Moab munu é dan kɛlɛ lɛ gulizarafɛ nya wo lɛ; Amɔn munu é dan pla lɛ wo wuo.

¹⁵ Wɛyi lé ke Éjipiti tɛrɛ bɛ do la, Gakelebale é dan a blan sina do béli lɛ; é dan é bɛ nwa lɛ yuu ta yé é fu fɛ plɛplɛ; é dan a yoro kɛlɛ lɛ sɔrafié, yé munu é dan a kini lɛ sawala nya ’wo gane ma.

¹⁶ Alé munu pɔnénu lé wo vo yé wo so Asirinu lee, é dan zi pla lɛ wo lɛ bélé fɛan zo lé é zi pla Izraɛlnu lɛ wo fwiyi la Éjipiti tɛrɛ la, a zo.