Ézai 10 - Kazambale lé Sebe Sauunu 1979

^1-2 Munu lé woo bélidɔwe naané bɔraan koo, sɛbɛgyɛmunu lé wo ’ka weblesɛbɛ gya mi dére ta lo, ’té wo ’ka a nyi sié léé, wo nyanégyɛzannu lé we ble lo, ’té woo anlé munu va wenaanébɔmazannu lé se sié wo lee, ’té woo we kɛlɛ zanagalalomu lɛ bélé wo blewi lé, ’té woo fɛ sié ti valé bugalazannu lee bélé gulizarafɛ sile zo. Wenaané ’é kɛlɛ wo lɛ ma.

³ Dé ka guru zanagizannu si baa, ka dan kɛlɛ lɛ kaa welɛdɔmigi yi nyaa? Ka dan vlan buru lɛ mi kyɛn ɛ va, yé ’bɛ é bɔ ka vaa? Ka dan kalé fuafɛnu yɔɔ lɛ kyɛɛn?

⁴ Mi kenu é dan vo lɛ é plinle wolé luufla ta; mi kenu é dan dia lɛ é gale. Dé ’bɛ faa bɔoo, ’bɛ ’ka alé bliflile ta zanaan lo, ’té a bɛ a wo gyɛn gi duowo.

Asirinu nwiinzan blɛn kɛlɛ Bale lé nyanamapafɛ nya

⁵ Asiri munu, anlé blifli vlewɔlɛ, wenaané ’é kɛlɛ ka lɛ ma. Vlewɔlɛ lé ke a lee, é a anlé bliflile nagɔɔnfɛ nya.

⁶ Maa wo pa zia bɛn nyané va, munu lé an bli ke flina wo ma, maa wo nwunvɔ ’bɛnu va, léé, ’wo ’wii ’bɛnu ta yé ’wo gulizarafɛ si, yé wo ’bɛnu zɔn ’wo gane nya bélé voli zo zia.

⁷ Naa, é ’ka dɔ lɛ Asiri munu gi ’bɛ zo lo; wo ’ka wo bɔn‐in bɔrɔ lɛ ’bɛ zo lo. Fɛ guru zanale a gi saa lɛ lé wo bɔn‐in bɔrɔan, ’té wa a va léé, ’wo bɛn kiɛre nyaa.

⁸ Naa, wo léé: Ko nwiinzan kiénénu, wo ’ka bélé minwiinzan blɛnnu zo loo? Kalno munu zé ’ka kɛlɛ lɛ bélé Kaakémis munu zé zo loo?

⁹ Amat munu zé ’ka kɛlɛ lɛ bélé Aapad munu zé zo loo? Samari munu zé ’ka kɛlɛ lɛ bélé Damas munu zé zo loo?

¹⁰ Bɛntɛrɛnu lé wolé miyilinu ke kiɛre, an bɛ sɔ wo nya, ’té wolé miyilinu a kiɛre é mini Jérusalɛm valé Samari zé ta.

¹¹ We lé maa kɛlɛ Samari valé élé miyilinu lɛ ’naan, a zo duoan maa dan a kɛlɛ lɛ Jérusalɛm valé élé miyilinu lɛ loo?

¹² Naa, dé Mizan élé we kɛlɛle faa lɛ sɔɔ Siɔn gɔ nwiin koo, Jérusalɛm koo, wona faa, maa dan we lɛdɔ lɛ Asirinu nwiinzan blɛn gi, a kɛlɛwenu lé alé boblɛn a nagɔɔn a lɛ, wo ma, ’bɛ valé alé mi naginile é yuɛ zuo nya.

¹³ Naa, é léé: An bɛ plɛplɛ nya lé an we kɛlɛ; anlé wedɔɔle nya lé maa a kɛlɛ, naa, maa a ’wuoatazan nya. Maa munu nyanana tɛrɛ fɔnɔ, yé maa wolé fɛwezannu si gla nya, maa minwiinzannu si wolé webleblinnu ta gla nya bélé nyanazan zo;

¹⁴ maa munu lé fuafɛnu si bélé mi éé miané nyɛné sié é kɔn gi fɛan zo, a zo, yé maa tɛrɛ faa si wo lee bélé miané lé é sɔn vɔ é nyɛné ma yé wa sia a pa gi, a zo. A do kpen ’ka é bɛa kɔɔ lɛ lo, é ’ka é lɔlu ’furu vɔ lɛ an ma lo, é ’ka we lɛ lo.

¹⁵ Zaa ébo tɔ bɔa, mi lé éé nyanama paan a nya, a lɛɛ? Sii éé dére blɛnblɛn fé, mi lé éé nyanama paan a nya, a lɛɛ? ’Bɛ a bélé fɛan zo lé vlewɔlɛ ’é nwazan nyunu léé, ’bɛ ’é nwa, bélé yili ’é duunzan nwa, a zo.

¹⁶ Bɛwemalé Asirinu nwiinzan lé sunyanu lé wo fuu ke wo ta, Mizan lai sunyanuzan é dan wo kwéé lɛ. Wenuan ma lé Asirinu nwiinzan kɛlɛ blɛn, é dan kyɛ sɔn lɛ wo wuo yé alé kyɛ lɛ é dan si lɛ.

¹⁷ Izraɛl vakinisan é dan kɛlɛ lɛ kyɛ nya, yé alé Mi Sauun é dan kɛlɛ lɛ kyɛnɛnɛ nya, yé ’bɛ é dan Asirinu nwiinzan lé léliyilinu valé danannu ble lɛ yi do kpen nya.

¹⁸ Yé yee kyɛnɛnɛ é dan alé pɔrɔwɔlɛ blɛn valé alé féifɛ zinnu ble lɛ é ta lé kɔn‐an; é dan kɛlɛ lɛ bélé gyɛkɛlɛzan lé a fuu faa si a ta, a zo.

¹⁹ Alé pɔrɔ gi yilinu lé wo vo, wo bɔa wo nɔnɔle lɛ, yé né kiéné éé bɔa a ’léé gyɛle lɛ.

²⁰ ’Bɛ yi la Izraɛl pɔné lé wo vo, Jakɔb kulunu lé wo so we lee, wo ’ka dan vɔ lɛ ’wo blazan zi é dɛrɛ lo; wo dan vɔ lɛ Gakelebale Izraɛl lé Mi Sauun lé wo pale ke a ta, a zi.

²¹ Wo lé wo vo, Jakɔb lé munu lé wo vo, wo dan da lɛ Plɛplɛzan Bale va.

²² Izraɛloo, Izraɛl, dé ilé munu kɛlɛ kiɛre bélé wɛyi gɔɔn ma nyéné zo, a pɔné lé wo vo, wo saa ɛ dan da lɛ wo pa gi; é dan wo guru zana lɛ a gi kpɔ, yé bɛ lé we ma lé wo dan we tegele kɛlɛ lɛ kiɛre.

²³ Yé guruzanaagiwe lé é a fe léé, é dan a kɛlɛ lɛ kpɔ, Mizan, lai sunyanu lé Gakelebale, é dan a lɛ sɔɔ lɛ ana tɛrɛ faa la.

²⁴ Naa, Mizan, lai sunyanu lé Gakelebale léma: Anlé munuoo, anlé munu, ka lé ka nyanaan Siɔn, té ka kana Asirimi lee lo. É a ka blana vlewɔlɛ nya é wo; éé yili nwaan ka ma bélé Éjipiti munu a kɛlɛ ka lɛ fɛan zo, a zo.

²⁵ Naa, a bléyi vo sɛ yé we lɛdɔle ka gi é dan nyaa lɛ, ’bɛ zuo an bli é dan fli lɛ Asirimi ma, a kulu gale we ma.

²⁶ Lai sunyanu lé Gakelebale é dan plén duun lɛ a lɛ, é Madian munu gyɛ Orɛb gɔlɛ lé fɛna fɛan zo, a zo. É yili nwa wɛyi ta fɛan zo Éjipiti tɛrɛ la, é dan a nwa lɛ wo ma a zo.

²⁷ ’Bɛ yi la alé kɔné lé é a dɔ ka nwiin, an dan a si lɛ, yé an dan luubale kini lɛ ka bɔrɔ ma. Dé ka bua blɛn, ka dan ka bɔrɔmabale kini lɛ.

²⁸ É dan nwa lɛ Ajat ma, é dan Migrɔn kini lɛ, é dan élé kɔné vo lɛ Mikimas.

²⁹ Yé wo gié zi ’léé kiéné na yé wo yii Géba; Rama munu ma nyɔɔn, Saul lé fla Gibéa fwi.

³⁰ Galim munu, ’ka siaa plɛplɛ. Lais munu, ’ka yuɛ pa kabo va; Anatɔt munu, we tɔntɔn da ka va.

³¹ Madaménas munu kini ékema, Gébim munu a fwina.

³² Wo dan yii lɛ Nɔb do, ’bɛ zuo yé é dan é bɛ nwa lɛ Siɔn munu lé gɔ ma, Jérusalɛm lé gɔpané ma.

³³ Ka ye, Mizan, lai sunyanu lé Gakelebale é dan yilibɛnu yéli lɛ gla nya. Wo lé wo ke blɛn, é dan wo so lɛ a ma; wo lé wo ke é nwale loru, é dan wo yéli lɛ.

³⁴ É dan pɔrɔwɔlɛ blɛn sɛrɛ lɛ, Liban pɔrɔ bozen‐oo, Plɛplɛfaazan é dan a sɛrɛ lɛ.