Ézai 1 - Kazambale lé Sebe Sauunu 1979

Bale we pla élé munu lɛ

¹ We lé Amosi be Ézai a fe balelawefele nya Juda valé Jérusalɛm ma, yee lé ke ’ko. É a fe Ozias koo, Jotam koo, Akaz koo, Ézékia koo, wo plale Juda munu nwiin bléyi va.

² Lanu, ’ka tɔné dɔ; tɛrɛ, ’i an ban i tɔné nya, naa, Gakelebale a wefena. É léma: Maa nénu pa yé wo tin an yuɛ va, naa, wo nwa an ma.

³ Dirigɔné ézan dɔɔ yé sokofalezan éé fɛ no ’é lɛ fɛan gi, é a dɔɔ; Izraɛl ’ka we do kpen dɔɔa lo; ’wuo ’ka anlé munu ta lo.

⁴ Wenyanékɛlɛ bɛn, wo gale nyɔ; wa é fanle weplenu nya, wa bɛn nyané nya, wa né sɛrɛlenu nya. Wo sɔn vɔ maa, Gakelebale ma, wo nyé yéli maa, Izraɛl lé Mi Sauun ma. Wo si an ma baa.

⁵ Dé kalé nwale an ma gi gya, mɛ nya lé maa we lɛdɔa ka gi é dɛrɛɛ? Gyɛ a ka ’wuo ma fɛfaana, yé ka bli faa a yaana.

⁶ É sia wo gane buli fɔɔ yé é bɔ wo nwiin, wo zinna do kpen ’ka lo. Tuolenu koo, nyɛ dɔle wo kɔlɛnu gi valé manɔn kuru kwakwanu koo, wo saa ɛ ke wo ma; wo ’ka wo paan lo, wo ’ka sɔ vuruan wo ta lo, wo ’ka nyɔnɔ paan wo gi lo.

⁷ Kalé tɛrɛ vo é pla yé kalé flanu kyɛ ble. Bɛnnu kalé féinu si ka lee ka yuɛ va; wo ’wii kalé fɛnu ta yé wo wo sɛrɛ bélé bwigimunu zo.

⁸ Siɔn munu vo bélé banwuliné zo é do dɔrɔféi; wo vo bélé sunbanwuliné zo zianféi; wo vo bélé fla lé wo diri a zi, a zo.

⁹ Dé lai sunyanu lé Gakelebale ’ka kɔɔn ko tɔɔtɔɔ pɔné vo lɛ lo, ’té ko kɛlɛ bélé Sɔdɔm zo, ’té ko valé Gɔmɔɔ bɔ ékema.

¹⁰ Sɔdɔm munu nwiinzannu, ’ka tɔné dɔ Gakelebale dére lɛ. Gɔmɔɔ munu, ’ka kolé Bale lé bélidɔwe ban ka tɔné nya.

¹¹ Gakelebale léma: Maa mɛ ɛ kɛla kalé saraka kiɛre nyaa? An kan kalé ’blagɔnénu lé wa kyɛ blé, é valé diriné nyɔnɔnu nya. Dirigɔnénu koo, ’blanu koo, boligɔnénu koo, wo nyɛ ’ka an gi nanaan lo.

¹² Dé ka da an ’lɛ, de ɛ fe ka lɛ léé, ka zén anlé gɔrɔ gii?

¹³ Té ka an ban boafɛ nya é dɛrɛ lo; lasikɔrɔpo koo, moné dɛrɛ fɛtinu koo, flinyinu valé zénle ékevanu koo, wo faa an bli la naanaa. Wenyané lé ka kɛla kalé fɛti blɛnnu bléyi va, maa ’ka dɔa ’bɛ nyi wuo lo.

¹⁴ Kalé moné dɛrɛ lé we kɛlɛle valé kalé fɛtinu za a an gi. Wa kɔné nya an bli gi yé wo kɔné sile an wɔlɛgi nyaa.

¹⁵ Dé ka bɛ soi an vazia, an yara sié ka la; dé ka ba kiɛre zoro, an ’ka ’bɛ maan lo; ka bɛnu a migyɛbɛnu nya.

¹⁶ ’Ka zuru, ’ka kɛlɛ tegele; ’ka si an yuɛ gi ka kɛlɛwe naanénu nya; ’ka daan wenaané kɛlɛle ma.

¹⁷ ’Ka wezin kɛlɛle draan, ’ka kwa kuli léé, kalé we ’é kɛlɛ tegele. Munu lé wa kle pana wo ta, ’ka wo takuun; ’ka we tegele kɛlɛ ti valé bu galazannu lɛ, ’ka dɔ zanagalalomu zuo.

¹⁸ Gakelebale léma: ’Ka da, kaa ana we fe. Dé kalé wenyané ka bli tié tiritiri bélé gla’yi zo‐oo, ka bli é dan kɛlɛ lɛ fu tata bélé glasépun zo; dé wo kɛlɛ sɔɔn bélé gulimagyan zo‐oo, ka bli é dan kɛlɛ lɛ fu tata bélé kununu lii zo.

¹⁹ Dé ka an lɛdɔma bli drɔɔ nya, ka dan fɛ zinnu ble lɛ tɛrɛ ’ko la.

²⁰ Naa, dé ka ’ka a nyi si lɛ lo, dé ka nwa an ma, ka dan ga lɛ gwɔun ’léé, maa Gakelebale ɛ fe, azama.

Wenyané kɛlɛ fla

²¹ É kɛlɛ ka yé fla lé a tamunu a turu yarapawelazannu nya, woo goo bale bɛnu zuo bélé bɔrɔdɛ le zoo? A tamunu faa, woo we drɔle kɛla turu, ’té kɛlɛle tegele a wo va; sin, munu lé woo munu ma we blé, ’té woo wo gya wobo yuɛ va, wa wo va.

²² Kalé gɔɔli nɔla gɔɔlifu bo nya; kalé dɔrɔ a é vɔɔle ’yi nya.

²³ Ka nwiinzannu a nwamimazannu nya yé wa kyeenwozannu béénu nya. Blɛfɛ sɔ wo faa lɛ, ’té woo vlan buruwo tɔnɔfɛnu zuo. Wo ’ka we tegele kɛla ti valé bu galazannu lɛ lo, yé wo ’ka zanagalalomu lé we blé lo.

²⁴ Bɛwemalé, Mizan, lai sunyanu lé Gakelebale, Izraɛl lé Mi Plɛplɛ léma: Maa dan we do kɛlɛ lɛ an mazannu lɛ, yé an bli é dɔrala, yé maa dan anzé lɛgi pa lɛ an nyanézannu ma.

²⁵ An dan fɛ duun lɛ i lɛ; an dan ilé gɔɔlifu bo ’yibo lɛ bélé gwɛn lé wa zén a va. An dan lɛe wɔlɛnu si lɛ a ma.

²⁶ Maa dan ilé weblezannu dɔ lɛ bélé é vinin zé zo, yé maa dan ilé weplamilɛzannu dɔ lɛ bélé é vinin zé zo. Wo dan i laa lɛ é ziin, yarapawelafla.

²⁷ Siɔn é dan si lɛ we gi élé we drɔle ma. Siɔn munu lé wo zi nɔla, wo dan si lɛ we gi ’wo kɛlɛwe tegele ma.

²⁸ Naa, nwamimazannu valé wenyanékɛlɛmunu, wo faa é dan sɛrɛ lɛ tata, yé munu lé wo sɔn vɔ Gakelebale ma, wo dan zamaga wo lɛ.

²⁹ Térébɛnt yilinu lé woo ka gi nanaan, yara é dan ka gyɛ lɛ wolé we ma. Zianféinu lé wo ke ka ginanamafɛ nya, ka yuɛ é dan tana lɛ wolé we ma.

³⁰ Ka dan kɛlɛ lɛ bélé térébɛnt yili lé a laa yuru, yee valé zianféi lé ’yi ’ka a ma lo, a zo.

³¹ Mi plɛplɛ é dan kɛlɛ lɛ bélé ’sapɛɛ zo, yé alé nyanama é dan kɛlɛ lɛ bélé kyɛ flɛnné zo. Wo fiénu kyɛ é dan ble lɛ ékeva yé a dirizan ’ka dan kɛlɛ lɛ ana lo.