Esitɛɛ 9 - Kazambale lé Sebe Sauunu 1979

Juifinu wozé lɛgi pa ’wo nyanézannu ma

¹ Moné vu ta fiézan lé wa laama Adaa moné bɛ, a yi vu ta yaazan nya, yian nya lé wonɔ minwiinzan blɛn dére tawe valé alé bélidɔwe kɛla bɛ, a yi bɔ. Yian nya lé Juifinu nyanézannu a va kɔɔn léé, wo pla wo nwiin ’bɛ yi nya, é ’ka kɛlɛ lɛ ’bɛ zo lo. Juifinu ɛ pla ’wo nyanézannu nwiin.

² Juifinu zén ékeva wolé flanu ta, minwiinzan blɛn Asuérus lé bɛntɛrɛ faa ta, munu lé ’bɛnu ke kɔɔn a va léé, ’wo wo gya bɛ, ’bɛnu gyɛle we ma. Yé mi do kpen ’ka bɔ lɛ dɔle lɛ wo ma lo. Naa, Juifinu lee kanale zén munu faa gi, azama.

³ Yé bɛntɛrɛ faa nwiinzannu koo, minisinu koo, gbɔrɔnamanu koo, minwiinzan blɛn lé kominu koo, wo bɔ Juifinu va; Maadosé lee kanale gligli zén wo gi, azama.

⁴ Naa, Maadosé a plɛplɛ minwiinzan blɛn lé kɔn gi yé a tɔ a nwɛɛnna bɛntɛrɛ faa ta, naa, a plɛplɛ gi a gona gyɛle nya, azama.

⁵ Juifinu wo nyanézannu faa gyɛ gwɔun nya. Wo wo gyɛ za ma. Munu lé wo za ke ’bɛnu gi, wo we kɛlɛ ’bɛnu lɛ wolé blibɔmale yɛrama.

⁶ Juifinu mi gyɛ fla blɛn Suz ta. Wo mi wuru fié mi yɔ soru gyɛ za ma.

^7-10 Wo Juifinu nyanézan Amédata be Aman négɔné vu faa bɔrɔ bo. Paasandata koo, Dalfɔn koo, Asipata koo, Porata koo, Adalia koo, Aridata koo, Paamasita koo, Arizai koo, Aridai koo, Vajézata koo, woo lé. Naa, wo ’ka ’wii lɛ wo pagifɛnu ta lo.

¹¹ ’Bɛ yi nya, munu lé wo wo gyɛ fla blɛn Suz ta bɛ, wo wo ’léé fe minwiinzan blɛn lɛ.

¹² Yé minwiinzan blɛn lé é na Esitɛɛ lɛ léé: Juifinu mi gyɛ fla blɛn Suz ta, wo mi wuru fié mi yɔ soru valé Aman benu vu gyɛ za ma. Yé minwiinzan blɛn lé bɛntɛrɛ pɔnénu ta zé é dan kɛlɛ lɛ kaa? Mɛ we ɛ sɔ i lɛɛ? Wo dan a kɛlɛ lɛ i lɛ. I a mɛ va é ziin? I dan a ye lɛ.

¹³ Esitɛɛ a zi pa léé: Dé é sɔ minwiinzan blɛn lɛ, é a lé wo zi nɔ Juifinu lé wo ke Suz, wo lɛ léé, ’wo we kɛlɛ tɛlɛ, kyɔ zé bélidɔwe yɛrama. Yé Aman be vu lé wo wo gyɛ bɛ, ’wo wo galenu dun yili ma.

¹⁴ Yé minwiinzan blɛn léé, ’wa kɛlɛ a zo ma. Wo bélidɔwe ’ko zana dɔɔ Suz. Wo Aman be vu ’konu gale dun;

¹⁵ yé Juifinu lé wo ke Suz, wo zén é ziin ékeva Adaa moné yi vu ta ziɛnzan nya, yé wo mi wuru do mi yɔ soru gyɛ Suz. Naa, wo ’ka ’wii lɛ wo pagifɛ do kpen ta lo.

¹⁶ Juifinu bɛnu lé wo ke minwiinzan blɛn lé bɛntɛrɛ faa la, wo zén ékeva yé wo ’wobozen takuun. Wobo si ’wo nyanézannu lee yé wo vo woboma. Munu lé wo za ke ’bɛnu gi bɛ, wo ’bɛnu va mi baa yɔ do wɔlɛ vu ta sɔrafié mi wuru soru gyɛ. Naa, wo ’ka ’wii lɛ wo pagifɛ do kpen ta lo.

Purim lé fɛti

¹⁷ We ’konu bɔ Adaa moné yi vu ta yaazan nya. Juifinu flin a yi vu ta ziɛnzan nya. Yé wa kɛlɛ ginanayi valé fɛtikɛlɛyi nya.

¹⁸ Munu lé wo ke Suz bɛ, wo zén ékeva a yi vu ta yaazan valé ziɛnzan nya, yé wo flin a yi vu ta soruzan nya. Yé wa kɛlɛ fɛtiyi valé ginanayi nya.

¹⁹ Bɛwemalé Juifinu lé wo ke féi béi la, ’té gɔrɔ ’ka wolé flanu zi bɛ lo, woo fɛti kɛla, ’té woo fɛ blé, ’té wo gi éé nanaan, ’té woo fɛ no ’wo ke lɛ Adaa moné yi vu ta ziɛnzan nya.

²⁰ Maadosé we ’konu gyɛ sɛbɛ ta, yé é sɛbɛ ’konu pa zia Juifinu faa lé wo ke minwiinzan blɛn Asuérus lé bɛntɛrɛ faa ta bɛ, wo lɛ. Wo lé wo ke baa, é valé wo lé wo ke é pu bɛ, woo faa lé.

²¹ É a gyɛ wo lɛ léé, ’wo fɛti kɛlɛ Adaa moné yi vu ta ziɛn valé yi vu ta soru nya lɛɛ faa do do ma.

²² Yi ’konu nya lé wo vo wobo ma wobozen sile nya ’wo nyanézannu lee. Yé yee moné lé wolé bli kyɛdɔle nɔla ginanale nya yé di kinile wo gi nɔla wolé fɛti kɛlɛle nya bɛ, a sele ’é dɔ wo gi, yé wo yee yi ’konu kɛlɛ fɛti valé ginanayinu nya, ’té woo blɛ kɛla ’wo ke lɛ, yé munu lé we do ’ka wo lee lo, ’té woo fɛ no ’bɛnu lɛ ’bɛ yi nya.

²³ We lé Juifinu a kɛlɛle péli sia lao kɔɔn bɛ, yé Maadosé yee we duo gyɛ wolé sɛbɛ gi bɛ, wo léé, wo dan a kɛlɛ lɛ.

²⁴ Naa, Juifinu faa nyanézan, Agaga mi Amédata be Aman a a va kɔɔn léé, ’é wo gya za ma, yé é purim zun, ’bɛ gi léé, é ’munnu zun léé, ’é wo gya yé ’é wo sɛra tata.

²⁵ Naa, dé Esitɛɛ go minwiinzan blɛn va, minwiinzan blɛn a fe yé wa gyɛ sɛbɛ gi léé: Wenyané lé Aman é gi bɔrɔ kɔɔn a nya léé, ’é a kɛla Juifinu lɛ bɛ, é nɔla yeebozen ta, yé wo yee valé é benu dun yili ma.

²⁶ Bɛwemalé wo yi konu tɔ pa Purim, ’bɛ gi léé, ’munnuzunyinu. Sɛbɛ ’konu giwe yɛrama, wenu lé wa ye woboan, é valé wenu lé é bɔ wo ma, wo yɛrama,

²⁷ Juifinu dɔ a ta léé, wo yee yi fié ’ko lé we kɛla lɛɛ faa do do ma, a bléyi valé a kɛlɛbɛnu lé wa gyɛ sɛbɛ gi, wo yɛrama. Té a yi é ga monomono lo. Wo we ’ko gyɛ wobozen koo, wo kulunu koo, munu faa lé ’bɛnu zén wo va, ’bɛnu koo, wozé nya.

²⁸ É a lé yi ’konu sele ’é dɔ wo gi, yé ’wo wolé we kɛlɛ wo kulu é kulunu va, wo gɔnɔ faa gi, bɛntɛrɛ faa do do valé fla do do ta. Yé é ’ka lé ’wo yee Purim yi ’konu yi ga Juifinu va lo. Yé té a sele é saan wo kulunu gi lo.

²⁹ Abisail lu minwiin le Esitɛɛ valé Juifi mi Maadosé sɛbɛ gyɛ a gɔnɔ fiézan nya Purim lé sɛbɛ gi dére dɔle gligli we ma.

³⁰ Wo sɛbɛnu pa Juifinu faa lɛ zia minwiinzan blɛn Asuérus lé bɛntɛrɛ yɔ suiɛdo wɔlɛ sɔrafié faa ta. Vole drɔɔ dére valé yarapale we ta dére ɛ ke yee sɛbɛnu gi.

³¹ Yé wo wo béli dɔ a nya léé, ’wo Purim yinu kɛlɛ wo kɛlɛbléyi lé wa dɔ bɛ, a yɛrama, bélé fɛan zo lé Juifi mi Maadosé valé minwiin le Esitɛɛ a fe wo lɛ, a zo, ’té wobozen a nyi si léé, wo koo, wo kulunu koo, wo dan a kɛlɛ lɛ, a zo. Wo lé wo lɔrɔ sɔn, yé wo wuvɔ ’bɛ bléyi va bɛ, woo lé.

³² ’Bɛ zo lé Esitɛɛ dére Purim lé we dɔ gligli, yé wo we ’ko gyɛ sɛbɛ gi.