Esitɛɛ 8 - Kazambale lé Sebe Sauunu 1979

Wo Juifinu ta béli dɔ sɛbɛ gyɛ

¹ ’Bɛ yi duo nya, minwiinzan blɛn Asuérus Juifinu nyanézan Aman lé kɔn nɔ é na Esitɛɛ lɛ; Esitɛɛ Maadosé gɔɔn minwiinzan blɛn lɛ, yé é a alé mi nya fɛan zo, é a gɔɔn minwiinzan blɛn lɛ.

² Minwiinzan blɛn lé bɛmazéné lé é a nɔ kɔɔn Aman lɛ yé é a si é pa gi bɛ, é a si é bɛ ma sin yé é a nɔ Maadosé lɛ. Esitɛɛ é ziin, ’bɛ é Maadosé dɔ Aman lé kɔngimunu nwiinzan nya.

³ ’Bɛ zuo Esitɛɛ go é ziin we fe lɛ minwiinzan blɛn lɛ. É dia tɛrɛ va yé é ’wuo wɔra a gane wuo, é wuvɔ, é zanté vɔ a lɛ léé, we lé Agaga mi nyané Aman ke kɔɔn a va léé, wa kɛlɛ bɛ, a yi ’é ga. Juifinu gyɛle lé é ’wuo gi bɔrɔ a nya bɛ, té a lɛ é sɔɔ lo.

⁴ Minwiinzan blɛn élé plaminwiin kyanyili soi Esitɛɛ lɛ. É nwa yé é dɔ loru minwiinzan blɛn ’lɛ.

⁵ Yé é léé: Dé é sɔ minwiinzan blɛn lɛ, yé dé maa a yuɛ gi bɔ, yé dé we ’ko a minwiinzan blɛn yuɛ gi tegele, yé dé an sɔ a lɛ, sɛbɛnu lé Agaga mi Amédata be Aman a gyɛ bɛ, ’wo sɛbɛnu gyɛ, wo yigale we ma. Sɛbɛnu lé é wo gyɛ Juifinu lé wo ke minwiinzan blɛn lé tɛrɛ faa la, wo gyɛle zamaga nya we gi bɛ, woo lé.

⁶ Naa, we tɔntɔn é bɔa anlé munu ma an yuɛ va kaa? Yé an bɔa an bɛn kulu gana yele lɛ kaa?

⁷ Minwiinzan blɛn lé é na Esitɛɛ valé Juifi mi Maadosé lɛ léma: Ka ye, maa Aman lé kɔn nɔ Esitɛɛ lɛ. É nwa Juifinu ma léé, ’é wo gya, amalé wa dun yili ma.

⁸ Wenu lé wo sɔ ka lɛ Juifinu zé nya, ’ka wo gyɛ maa, minwiinzan blɛn tɔ gi, yé ’ka anlé tɔmase dɔra a ta an bɛmazéné nya; naa, dé wo lɛtrɛ do gyɛ minwiinzan blɛn tɔ gi yé walé tɔmase dɔra a ta alé bɛmazéné nya, wo ’ka bɔa yee sɛbɛ ’ko yigale lɛ lo.

⁹ ’Bɛ bléyi va, moné yaazan lé wa laama Sivan moné, a yi yɔ do wɔlɛ yaazan nya, wo minwiinzan blɛn lé sɛbɛgyɛmunu laa. We faa lé Maadosé wo fe bɛ, wo wo gyɛ sɛbɛnu ta. Wo wo gyɛ Juifinu koo, minisinu koo, gbɔrɔnamanu koo, bɛntɛrɛ yɔ suiɛdo wɔlɛ sɔrafié lé wo sia Ende tɛrɛ ma fɔɔ yé wo bɔ Étiopi tɛrɛ ma bɛ, wo nwiinzannu koo, wo lɛ. Wa gyɛ ’bɛ tɛrɛ ’konu faa dére gi wolé sɛbɛ gyɛbɛ yɛrama do do, yé wa gyɛ Juifinu dére gi wozé sɛbɛ gyɛbɛ yɛrama.

¹⁰ Wo wo gyɛ minwiinzan blɛn Asuérus tɔ gi yé wa lɛ tan yé wo minwiinzan blɛn lé bɛmazéné dɔra a ta yé wo wo nɔ vlanburuzannu lɛ. ’Bɛnu vɔ minwiinzan blɛn lé wisoonu ta, yé wo go wo nya.

¹¹ Lɛtrɛ ’konu nya lé minwiinzan blɛn zi nɔ Juifinu lɛ léé, dé wa flaoo fla‐an ta, ’wo zén ékeva wona, ’wobozen takuunle we ma. Yé bɛnnu faa lé ’bɛnu é dan gulidanfɛnu sia lɛ yé ’bɛnu é guli vɔ wo lɛ minwiinzan blɛn lé tɛrɛnu faa la bɛ, ’wo ’bɛnu sɛrɛ tata, ’bɛnu faa ’é ga za ma, ’bɛnu nanu valé nénu nya ’wo va. É zi nɔ wo lɛ é ziin léé, ’wo ’wii wo pagifɛnu ta,

¹² yé é a lé wo we ’konu faa kɛlɛ yi do kpen nya minwiinzan blɛn lé tɛrɛnu faa la; moné vu ta fiézan lé wa laama Adaa moné bɛ, a yi vu ta yaazan nya lé wo we ’ko kɛlɛ.

¹³ Wo bélidɔwe do gyɛ lɛtrɛ ’konu gi léé, ’wa zana dɔɔ tɛrɛ do do faa la, yé a sele é dɔ munu faa gi léé, Juifinu ma a é ’lɛrɛle yi ’ko la wozé lɛgi pale wo nyanézannu ma we gi.

¹⁴ Vlanburuzannu vɔ minwiinzan blɛn lé wisoonu ta yé wo go é nya do é kelekele minwiinzan blɛn dére ta. Wo bélidɔwe ’ko zana dɔɔ é ziin fla blɛn Suz ta.

¹⁵ Maadosé si minwiinzan blɛn lé fɛna, ’té tɔvarɔ lé a yuɛɛ ke glayiayou valé é fu nya bɛ, é a a ta; ’té kyankoro blɛn a a ’wuo ma, ’té lɛnsɔ varɔ blɛn ti drɔndrɔn a é zénle a ta. Fla blɛn Suz munu siaa ginanale blɛn nya.

¹⁶ We zin valé ginanawe koo, ginanale blɛn valé tɔbɔle koo, wo ɛ ke Juifinu zé nya ’bɛna.

¹⁷ Tɛrɛ faa valé fla faa lé minwiinzan blɛn dére valé alé bélidɔwe bɔ wona, ginanale koo, ginanale blɛn koo, fɛti sɛné valé a blɛnnu koo, woo saa ɛ ke ana Juifinu zé nya. Juifinu lee kanale zén tɛrɛ ’ko la munu kiɛre gi, amalé wo wobozen kinin Juifinu nya.