Esitɛɛ 7 - Kazambale lé Sebe Sauunu 1979

Esitɛɛ Aman gi bɔra yé wa gyɛ

¹ Minwiinzan blɛn valé Aman go fɛti kɛlɛna minwiin le Esitɛɛ va.

² A yi fiézan ’ko nya, wa dɔrɔ minina bléyian va, minwiinzan blɛn lé é ziin Esitɛɛ lɛ léé: Minwiin le Esitɛɛ, mɛ we va lé i kee? Wo dan a kɛlɛ lɛ i lɛ. Mɛ fɛ ɛ sɔ i lɛɛ? Dé fuatɛrɛ bɛ do léé, i dan a ye lɛ.

³ Minwiin le Esitɛɛ a zi pa léé: Oo minwiinzan blɛn, dé maa i yuɛgi bɔ, dé minwiinzan blɛn a ye é zima, ’é an vo é yuɛma ma. We lé maa a laa, yee lé ke bɛ; yé ’é anlé munu si we gi; we lé é sɔ an lɛ, yee lé ke bɛ.

⁴ Naa, maa koo, anlé munu koo, wo ko dan, léé, ’wo ko kulu ga, ’wo ko bɔrɔ bo, ’wo ko sɛrɛ tata. Dé é vo kɔɔn léé, wo ko dan kɛlɛle luunu valé wuolomu nya we gi, ’té maa ’ka we sié a ta lo. Naa, dé ’bɛ zoɛ fɛ blɛn san minwiinzan blɛn lee, mɛ fɛ lé nyanézan é dan a nɔ lɛ a pa gii?

⁵ Tɔɔn minwiinzan blɛn lé é na Esitɛɛ lɛ léé: De léé? Mi lé é sɔ a lɛ léé, é ’bɛ zoɛ we kɛlɛ, é a kyɛɛn?

⁶ Esitɛɛ a zi pa léé: Yaamitazan, minyanézan, mi nyané Aman bɛ, yee lé. Di kini Aman gi minwiinzan blɛn valé é na yuɛ va.

⁷ Yé minwiinzan blɛn bliflile zi, é nwa fɛti zi yé é go élé kɔn ’léé gɔrɔ gi yilinu wuo. Naa, dé Aman a ye léé, ézé nyaa minwiinzan blɛn bli gi, é vo zanté vɔna minwiin le Esitɛɛ lɛ léé, ’bɛ é vo é yuɛma.

⁸ Dé minwiinzan blɛn si élé gɔrɔ gi yili wuo, dé é da é pa gi fɛtikɛlɛkɔn gi, é a ye léé, Aman ébo vuli yialafɛ lé Esitɛɛ ke a ta bɛ, a ta. Yé é léé: ’Ii! zɔwɛ lé é a gya an na ta anbo lé kɔn gii? Dé dére ’ko bɔra minwiinzan blɛn ’léé, tɔɔn, wo sɔ zén Aman ’wuo ma.

⁹ Mi blalenu vazan do lé wa laama Aabona, é lé minwiinzan blɛn lɛ léé: Bé ye, Maadosé lé é minwiinzan blɛn so ga lee bɛ, Aman yili do kɛlɛ léé, ’wo Maadosé ’ko dun a ma, yee yili ’ko torole a mɛtrɛ yɔ do wɔlɛ soru; é a é dɔle alé fɛna. Yé minwiinzan blɛn léé: ’Wo Aman dun yee yili ma ma.

¹⁰ Yé wo Aman dun yili lé é a kɛlɛ kɔɔn Maadosé zé nya bɛ, a ma. Yé minwiinzan blɛn bliflile ta zana.