Esitɛɛ 6 - Kazambale lé Sebe Sauunu 1979

Wo Madosé tɔ nwa yé wo Aman zun

¹ Yee béli duo nya, minwiinzan blɛn ’ka yi gyɛna lo, yé é léé, ’wo da élé tɛrɛlawe zuofesɛbɛ nya ’é lɛ. Yé wa ta fe minwiinzan blɛn lɛ,

² yé Bigitan valé Térɛs lé wo ke minwiinzan blɛn lé miblalenu nya yi la, ’té woo alé kɔn tabin‐é bɛ, fɛan zo lé wa yi la a va léé, wo minwiinzan blɛn Asuérus gya yé Maadosé we ’ko fe bɛ, wo yee we ’ko ye é gyɛle sɛbɛ gi.

³ Minwiinzan blɛn léé: Mɛ tɔ blɛn valé tɔbɔwe lé wa kɛlɛ Maadosé lɛ we ’ko gii? Minwiinzan blɛn wuomunu a zi pa a lɛ léé: É ’ka we do kpen ye lɛ we ’ko gi lo.

⁴ ’Bɛna lé minwiinzan blɛn léé: De ɛ ke gɔrɔ gii? ’Bɛ bléyi va ’té Aman da minwiinzan blɛn lé gɔrɔ gi, a fele we gi minwiinzan blɛn lɛ léé, ’wo Maadosé dun yili lé, yee Aman a kɛlɛ bɛ, a ma.

⁵ Minwiinzan blɛn wuomunu a zi pa léé: Aman ɛ ke é dɔle gɔrɔ gi. Yé minwiinzan blɛn léé: ’É wɔra ma.

⁶ Aman wɔra, yé minwiinzan blɛn lé a lɛ léé: Mi lé é sɔ minwiinzan blɛn lɛ léé, ’é a tɔ bɔa, é a lé wo mɛ we ɛ kɛlɛ ’bɛzan lɛɛ? Aman lé ’é bli gi léé: Dé é ’ka maa nya lo ’naan, é sɔ minwiinzan blɛn lɛ léé, é de ɛ tɔ bɔɔ?

⁷ Aman a zi pa minwiinzan blɛn lɛ léé: Mi lé é sɔ minwiinzan blɛn lé léé, ’é a tɔ bɔa,

⁸ é a lé ’wo minwiinzan blɛn tasɔ si do, yé wisoo lé minwiinzan blɛn éé vɔa a ta, ’té tɔkoro ke a ’wuo ma bɛ, wa si,

⁹ yé ’wo yee sɔ valé wisoo si yé wa nɔ minwiinzan blɛn lé mi blɛnnu vazan do lɛ; ’bɛ zuo ’wo sɔ ’ko zén mi lé é sɔ minwiinzan blɛn lɛ léé, ’é a tɔ bɔa bɛ, a ta, yé ’wo gié a nya flaworo dii wisoo ’ko ta, ’té wa tɔ ma gya léé, mi lé é sɔ minwiinzan blɛn lɛ léé, ’é a tɔ bɔa, ’ko zo lé wa kɛla a lɛ ma.

¹⁰ Minwiinzan blɛn lé Aman lɛ léé: ’I sɔ ’ko valé wisoo ’ko si é nya do, yé fɛan zo lé bé fe bɛ, bé kɛlɛ Juifi mi Maadosé lé ke é nyanale minwiinzan blɛn lé gɔrɔ ’léé bɛ, a lɛ. We faa lé bé fe bɛ, té bé do kpen vo lo.

¹¹ Yé Aman sɔ valé wisoo si. É sɔ zén Maadosé ta yé é gié a nya flaworo dii wisoo ta, ’té éé a tɔ ma gya léé: Mi lé é sɔ minwiinzan blɛn lɛ léé, ’é a tɔ bɔa, ’ko zo lé wa kɛla a lɛ ma.

¹² Maadosé go é pa gi minwiinzan blɛn lé gɔrɔ ’léé, yé Aman go é kele élé kɔn ’léé, é bli kyɛ dɔle nya, ’té sɔ a é zénle a ’wuo ma.

¹³ We faa lé é bɔ Aman ma, é a zuo fe é na Zérɛs valé é béénu faa lɛ. Yé alé wedɔɔzannu valé a na Zérɛs lé a lɛ léé: Maadosé lé i tɔ ta kun zanale ma a ’lɛ, dé ’bɛ a Juifi mi nya, ’té i ’ka bɔa we do kɛlɛle lɛ a lɛ lo. Naa, i tɔ ta é dan zana lɛ taawo.

¹⁴ Wa tan we fena aan wo, minwiinzan blɛn lé miblalenu da, yé wo go Aman nya é nya do, fɛti lé Esitɛɛ ke kɔɔn a kɛlɛna bɛ, ana.