Esitɛɛ 5 - Kazambale lé Sebe Sauunu 1979

Esitɛɛ minwiinzan blɛn valé Aman laa fɛti la

¹ A yi yaazan nya, Esitɛɛ élé tɔvarɔnu zén é ta yé é dɔ minwiinzan blɛn lé ’doo gi, minwiinzan blɛn yiinakɔn ’léé yɛrama. Té minwiinzan blɛn a é nyanale élé webleblin ta, élé fuakɔn ’léé yɛrama.

² Minwiinzan blɛn é minwiin le Esitɛɛ ye aan wo é dɔle ’doo gi, é a ye é zin, yé minwiinzan blɛn élé plaminwiin kyanyili soi Esitɛɛ va. Yé Esitɛɛ bié yé é bɛ mane plaminwiinyili ’ko zɔ ma.

³ Yé minwiinzan blɛn lé a lɛ léé: Minwiin le Esitɛɛ, mɛ fɛ léé? I a mɛ fɛ ɛ vaa? Dé é a anlé fuatɛrɛ bɛ do nyaoo, maa ’bɛ no i lɛ.

⁴ Esitɛɛ a zi pa léé: Dé é sɔ minwiinzan blɛn lɛ, yee valé Aman é da kyɔ fɛti lé maa a ma’lɛrɛ azé nya bɛ, ana.

⁵ Yé minwiinzan blɛn léé: ’Ka go Aman laa é nya do, bélé fɛan zo lé é sɔ Esitɛɛ lɛ, a zo. Fɛti lé Esitɛɛ a ma’lɛrɛ bɛ, minwiinzan blɛn valé Aman go ana.

⁶ Yé dé wa dɔrɔ minina bléyian va, minwiinzan blɛn lé Esitɛɛ lɛ léé: Mɛ we va lé i kee? Wo dan a kɛlɛ lɛ i lɛ. Mɛ fɛ ɛ sɔ i lɛɛ? Dé fuatɛrɛ bɛ do léé, i dan a ye lɛ.

⁷ Esitɛɛ a zi pa léé: We lé maa ke a va na, fɛ lé é sɔ an lɛ na, yee lo.

⁸ Dé minwiinzan blɛn an ye mi zin nya, yé dé é sɔ minwiinzan blɛn lɛ léé, fɛ lé maa laa, é a nɔ yé é anlé blibɔmawe lɛ sɔɔ, é a lé minwiinzan blɛn valé Aman ’é da é ziin fɛti bɛ lé maa dan a kɛlɛ lɛ wo lɛ bɛ, ana; yé tɛlɛ maa dan we zi pa lɛ minwiinzan blɛn dére yɛrama.

Aman kwa kuli léé, ’é Maadosé gyɛ

⁹ ’Bɛ yi nya, Aman bɔra é ginanale nya, ’té a bli a drɔɔ. Naa, dé é Maadosé ye minwiinzan blɛn lé gɔrɔ ’léé, ’té ’bɛ ’ka nwa lɛ yé ’bɛ é kɔɔ a yuɛ va lo, a bli fli Maadosé ma kaii.

¹⁰ Naa, duowo, ébo kun yé é go élé kɔn ’léé. ’Bɛ zuo é mi nwunvɔ é béénu valé é na Zérɛs laana.

¹¹ Aman élé fua tɔbɔle lé we fe wo lɛ, é benu ’léé fe, we faa lé minwiinzan blɛn a kɛlɛ a lɛ a tɔ nwale nya bɛ, é ’bɛ fe, yé dɔna lé minwiinzan blɛn a nɔ a lɛ, ’té é mini tɔzannu valé ’bɛ leemunu ta bɛ, é ’bɛ fe wo lɛ é ziin.

¹² Yé é lé é ziin léé: Maa do kpen ’té lé minwiin le Esitɛɛ an laa, é valé minwiinzan blɛn nya, fɛti lé é a kɛlɛ, ana, yé é an laa é ziin élé fɛna, maa valé minwiinzan blɛn nya tɛlɛ zé na.

¹³ Naa, duowo, dé maa Juifi mi Maadosé ye é nyanale minwiinzan blɛn lé gɔrɔ ’léé, ’té we ’ko faa sele saan an gi.

¹⁴ A na Zérɛs valé a béénu faa lé a lɛ léé: É a lé wo yili do kɛlɛ, a torole é bɔ mɛtrɛ yɔ do wɔlɛ soru, yé tɛlɛ bladi bé laa minwiinzan blɛn lee léé, ’wo Maadosé dun a ma. ’Bɛ zuo yé ’i go fɛti ’ko kɛlɛna minwiinzan blɛn va, i ginanale nya. We ’ko sɔ Aman lɛ é baba, yé é léé, ’wo yili ’ko kɛlɛ.