Esitɛɛ 4 - Kazambale lé Sebe Sauunu 1979

Juifinu bli kyɛ dɔ yé wo lɔrɔ sɔn

¹ We lé é bɔ, Maadosé a ’ma aan wo, élé sɔ fia, yé é bɔlɔ zén é ta, yé é kyɛyee ’wii é ta. ’Bɛ zuo, é go fla vuun la blikyɛdɔ siaale plɛplɛ nya.

² Yé é go fɔɔ minwiinzan blɛn lé gɔrɔ ’léé lé, ana gole yi ke é gale gyɛbosɔ zénzannu faa lee, ana.

³ Bɛntɛrɛ faa lé minwiinzan blɛn déretawe valé alé bélidɔwe bɔ ana, ana Juifinu faa vo bli kyɛdɔle blɛn gi. Woo lɔrɔ sɔn‐o, woo wuvɔa, ’té woo dunnuan, yé wo va mi kiɛre éé yiaan bɔlɔ la, é valé kyɛyee gi.

⁴ Esitɛɛ wuomunu valé alé miblalenu da we ’ko fe lɛ a lɛ, yé kana blɛn zén minwiin le gi. É sɔnu pa Maadosé lɛ zia léé, ’é bɔlɔ si ’é ta yé é sɔ zén é ta. Naa, é ’ka a nyi si lɛ lo.

⁵ ’Bɛ zuo, miblale Atak lé minwiinzan blɛn a nyana Esitɛɛ sɔnɔ bɛ, é ’bɛ laa yé é ’bɛ pa zia léé, ’bɛ ’é go we laa Maadosé lee léé, mɛ we ɛ bɔɔ? We ’ko si kyɛɛn?

⁶ Atak go Maadosé va fla vuun la minwiinzan blɛn lé gɔrɔ ’léé.

⁷ Yé we faa lé é bɔ, Maadosé a zuo fe a lɛ. Yé gɔɔli ’léé lé Aman a fe léé, ’é a paan minwiinzan blɛn lé gɔɔlipafɛ gi Juifinu gyɛle we ma bɛ, é a zuo fe a lɛ.

⁸ Yé bélidɔwe sɛbɛ lé wa zana dɔɔ Suz, wo kulu gale we ma bɛ, é sɛbɛ ’ko do nɔ a lɛ léé, ’é wo nagɔɔn Esitɛɛ lɛ, yé ’é a bɔngi kini we ’konu faa ma. Yé é léé: Bé fe Esitɛɛ lɛ léé, ’é go minwiinzan blɛn va, yé ’é zanté vɔ a ma élé munu lé we ma, yé a nyanai ’é zén wo ta.

⁹ Atak da yé é Maadosé dérenu fe Esitɛɛ lɛ.

¹⁰ Esitɛɛ Atak pa zia léé, ’é go a fe Maadosé lɛ léé,

¹¹ minwiinzan blɛn leemunu faa valé alé bɛntɛrɛ la munu faa a gi dɔɔ léé, é a bélidɔwe nya léé, dé le léé, ɛɛ, dé gɔné léé, dé é wɔra minwiinzan blɛn lé kɔn worona a va mi, ’té é ’ka a laa lɛ lo, ’wa gyɛ ’é ga. Dé mian minwiinzan blɛn élé plaminwiin kyanyili soi a lɛ, ’bɛzan do kpen ɛ vo é yuɛma. Yé maa, an yi yɔ do wɔlɛ vu lo, ’té é ’ka tan an laa lɛ lo.

¹² Dé wo Esitɛɛ dére fe Maadosé lɛ,

¹³ Maadosé a zi pa Esitɛɛ lɛ léé, té é dɔ i gi léé, i a minwiinzan blɛn lé kɔn gi, bɛwemalé bii do kpen ɛ dan so lɛ we ’ko lee Juifinu faa va lo.

¹⁴ Naa, dé i vo é tadɔle sin, Juifinu takuunle valé wo sile we gi éé sié fɛ bɛna yé bii valé i ti lé kɔngimunu é zamaga wo. Dé we ’ko lé we ma lé i kɛlɛ minwiin le nya bléyi ’ko vaa? De ɛ ’bɛ gi dɔɔ?

¹⁵ Esitɛɛ léé, ’wa fe Maadosé lɛ léé:

¹⁶ ’I go, Juifinu faa lé wo ke Suz, ’i wo zén ékema, yé ’ka lɔrɔ sɔn wo nya anlé we ma. Té ka fɛ ble lo, té ka fɛ mini lo, é béli valé é yiéyi fɔɔ yi yaa. Maa é ziin, maa valé an wuolomu é dan lɔrɔ sɔn lɛ a zo. ’Bɛ zuo, dé bélidɔwe aoo, dé é ’ka looo, an dan wɔra lɛ minwiinzan blɛn va. Dé an gaan‐oo, ’té an gaan é wo.

¹⁷ We faa lé Esitɛɛ a fe, Maadosé go yé é wo faa kɛlɛ.