Esitɛɛ 3 - Kazambale lé Sebe Sauunu 1979

Aman zi ye yé é léé, ’wo Juifinu gyɛ

¹ We ’ko giéle zuo minwiinzan blɛn Asuérus Agaga mi Amédata be Aman tɔ nwa blɛn. É we faa se kɛlɛ a lɛ, yé é a pla ’é bɛgimunu faa nwiin.

² Minwiinzan blɛn wuomunu faa lé wo ke é dɔle minwiinzan blɛn lé gɔrɔ ’léé, woo powuo zunwo, ’té woo ’wuo tuaan Aman lɛ. Naa, a zo lé minwiinzan blɛn a fe alé we ma. Naa, Maadosé ’ka é powuo zunwo pelo, yé é ’ka é ’wuo tuaan pelo.

³ Yé minwiinzan blɛn wuomunu lé wo ke é dɔle minwiinzan blɛn lé gɔrɔ ’léé bɛ, wo lé Maadosé lɛ léé: Mɛwemalé i minwiinzan blɛn dére lɛgaan a maa?

⁴ Fɛan zo lé wo we ’ko fé a lɛ yi faa do do ma, ’té é ’ka é tɔné dɔa wo lɛ lo, amalé wo we ’ko zuo fe Aman lɛ, léé, dé Maadosé é bɔalɛ é vo we ’ko kɛlɛna yifaama a zoo? yé wa ye. Naa, Maadosé lé wo lɛ léé, ’é a Juifi mi nya, azama.

⁵ Yé Aman a ye léé, Maadosé ’ka é powuo zun lɛ yé é ’wuo tua ’é lɛ lo, amalé a bli fli kaii.

⁶ Dé é Maadosé do kpen gyɛ, ’bɛ a a yuɛ gi kiéné. Naa, wo Maadosé bɛn gɔɔn a lɛ, amalé é a a va léé, ’é Maadosé bɛn kulu ga. Juifinu faa lé wo ke Asuérus lé bɛntɛrɛnu la, ’é wo kulu ga.

⁷ Asuérus plale minwiin lɛɛ vu ta fiézan nya, Nisan moné lé ke moné vininzan nya bɛ, a nya lé wo purim zun, ’bɛ gi léé, ’munnu zunle. Wa zun Aman yuɛ va Juifinu kulugamoné valé a yi sile a va we ma. Yé wolé ’munnu moné vu ta fiézan lé yi vu ta yaazan gyɛ. Yee lé ke Adaa moné nya.

⁸ Yé Aman lé minwiinzan blɛn Asuérus lɛ léé: Munu lɛ do a é sɔɔlale ilé tɛrɛnu faa ta, wa é yɛrama. Wozé bélidɔwenu a é sile munu faa zé ma, yé wo ’ka minwiinzan blɛn lé bélidɔwe ta tawo lo. Dé minwiinzan blɛn wo vo woboma, ’bɛ tɔnɔ ’ka minwiinzan blɛn ma lo.

⁹ Dé é sɔ minwiinzan blɛn lɛ, ’wo bélidɔwe do gyɛ léé, ’wo wo gyɛ zamaga nya. Yé maa dan gɔɔlifu talan baa soru nɔ lɛ kominu lɛ, yé wa pa minwiinzan blɛn lé gɔɔlipafɛ gi.

¹⁰ ’Bɛ zuo minwiinzan blɛn é bɛmazéné si yé é a nɔ Juifinu nyanézan Agaga mi Amédata be Aman lɛ.

¹¹ Yé minwiinzan blɛn lé Aman lɛ léé: Gɔɔlifu koo, munu ’ko koo, maa wo nɔ i lɛ. Dé é sɔ i lɛ bé kɛlɛ wo nya fɛan zo, bé kɛlɛ wo nya.

¹² Minwiinzan blɛn ’élé sɛbɛgyɛmunu laa moné vininzan yi vu ta yaazan nya, yé wo sɛbɛnu gyɛ Aman dérenu yɛrama. Wa gyɛ minwiinzan blɛn lé minisinu koo, bɛntɛrɛnu lé é ke é plale wo nwiin, wo faa do do nwiinzannu koo, alé munu va mi blɛnnu koo, wo lɛ. É a gyɛ bɛntɛrɛ ’konu dére gi wolé sɛbɛ gyɛbɛ yɛrama do do. Wo sɛbɛ ’konu gyɛ minwiinzan blɛn Asuérus tɔ gi, yé wo wo ’léé béé, yé wo alé tɔmase dɔra wo ta a bɛmazéné nya.

¹³ Vlanburuzannu go sɛbɛ ’konu nya minwiinzan blɛn lé bɛntɛrɛ faa la, léé, ’wo Juifinu kulu ga, ’wo wo gyɛ, ’wo wo faa gyɛ za ma. Miboronénu valé mi kwakwanu koo, né kiénénu valé lomu koo, ’wo wo faa gyɛ yi do kpen nya ékeva, yé ’wo ’wii wolé fɛnu faa ta; ’wo wo gyɛ moné vu ta fiézan lé ke Adaa moné nya, a yi vu ta yaazan nya.

¹⁴ Wa gyɛ yee sɛbɛnu gi léé, é a lé wo bélidɔwe ’ko zana dɔɔ bɛntɛrɛ do do faa la, yé munu ma é vo é ’lɛrɛle yi ’ko nya.

¹⁵ Vlanburuzannu go é kelekele minwiinzan blɛn dére ta. Wo bélidɔwe ’ko zana dɔɔ fla blɛn Suz na é ziin. Bléyian va lé minwiinzan blɛn valé Aman a nwɛ minina, ’bɛ bléyi va fla blɛn Suz dɔ é gane ta.