Esitɛɛ 2 - Kazambale lé Sebe Sauunu 1979

Esitɛɛ kinin minwiin le nya

¹ We ’konu giéle zuo, dé minwiinzan blɛn Asuérus bli dɔrala, é gi bɔrɔ Vasiti lé we ma. We lé ’bɛ a kɛlɛ, wo valé we lé wa fe ’bɛlé we nya, wo sele dɔ a gi.

² Minwiinzan blɛn leemunu lé ’é lɛ léé: É a lé blɛnnu lé wo ’ka gɔné dɔɔa lo, ’té wo ke é nɔnɔmi bɛ, ’wo wo gini minwiinzan blɛn zé nya.

³ É a lé minwiinzan blɛn é mi nwunvɔ élé bɛntɛrɛ faa la, léé, blɛnnu lé wo ke é nɔnɔmi, ’té wo ’ka gɔné dɔɔa lo, ’wo wo zén ékeva lomu lé zén‐ékevakɔn gi fla blɛn Suz ta, yé wo wo bɛ pa miblale Égé lé é ke lomu tabinzan nya, a lee. Yé fɛnu faa lé wo mawe ke wo gi wo zurufɛnu valé wo ma nyɔnɔnu nya, é dan a nɔ lɛ wo lɛ.

⁴ Yé wo va blɛn lé é dan sɔ lɛ minwiinzan blɛn lɛ, é dan kɛlɛ lɛ minwiin le nya Vasiti pa gi. We ’ko sɔ minwiinzan blɛn lɛ, yé é a kɛlɛ a zo.

⁵ Juifi mi do a fla blɛn Suz ta. Wa laama Maadosé. Bɛnjamɛn mi Kis be Siméi be Jaii be lé.

⁶ Babilɔn nwiinzan blɛn Nébukanɛsaa yee Kis kun Jérusalɛm, é valé Juda nwiinzan blɛn Jékonia nya, yé é go wo nya luu gi.

⁷ A bu bwe lu Aadasa lé wa laama Esitɛɛ bɛ, é a pa. Naa, ’bɛ ti valé ’bɛ bu ga, azama. Yee blɛn ’ko a é zima yé é a é nɔnɔmi kaii. Dé a ti valé a bu ga, Maadosé a si yé é a pa bélé ’é giné zo.

⁸ Dé wo minwiinzan blɛn dére valé alé bélidɔwe zana dɔɔ, dé wo blɛnnu kiɛre zén ékeva fla blɛn Suz ta, yé wo wo bɛ pa Égé lee, wo Esitɛɛ si é ziin, yé wo go a nya minwiinzan blɛn lé kɔn gi, yé wa bɛ pa lomu tabinzan Égé lee.

⁹ Blɛn ’ko sɔ a lɛ é baba, yé é a ye léé, é a é zima. Fɛnu lé a mawe ke wo gi a zurufɛnu valé a blefɛnu nya, é wo nɔ a lɛ é kele. Kɔn lé a zin mini lomu lé kɔn faa ta, é a si yé é a nɔ Esitɛɛ lɛɛ. É blɛn sɔrafié si yé é wo pa Esitɛɛ va.

¹⁰ Esitɛɛ ’ka é sina valé é dɔgɔnɔ fe lɛ mi do lɛ lo, a dinni be Maadosé a yi ga a lee, azama.

¹¹ Yé yi faa do do ma, ’té ’bɛ éé goo ’té ’bɛ éé dan lomu lé kɔn gɔrɔ ’léé, dé Esitɛɛ a drɔɔ? dé wa mɛ kɛlɛna a lɛɛ? a gi dɔɔle we ma.

¹² Blɛnnu éé goo minwiinzan blɛn Asuérus va do do, wenu lé wo lomu bélidɔ a nya léé, wa kɛlɛ lɛɛ do gi bɛ, wo kɛlɛle zuo lé wo go. ’Bɛ lɛɛ duo gi, ’té wa ’wo ma saa ’lɛrɛna. Wo miré nyɔnɔ saa giéan ’wo ma moné suiɛdo, yé wo lia ginzannu valé lomu lé lasikɔrɔnu saa giéan ’wo ma moné suiɛdo.

¹³ ’Bɛ zo lé blɛnnu é go minwiinzan blɛn va do do. Dé é a sina lomu lé kɔn gi yé é go minwiinzan blɛn lé kɔn gi, fɛ faa lé é sɔ a lɛ, wa no a lɛ.

¹⁴ Blɛn do é go nyanadi minwiinzan blɛn va. Yé ’bɛ é tu kini, yé wo goan lomu lé kɔn fiézan gi, yé wa bɛ pa miblale Saasagaz lé ke minwiinzan blɛn bwɛnu tabinzan nya, a lee. Dé a lɔrɔ ’ka tan minwiinzan blɛn gyɛ lɛ yé ’bɛ a laa é tɔ nya lo, ’té é ’ka tan go lɛ ’bɛ va lo.

¹⁵ Abisail lu Esitɛɛ lé a dinni be Maadosé a si é lu nya bɛ, dé a goyi bɔ minwiinzan blɛn va, miblale Égé lé ke minwiinzan blɛn lé lomu tabinzan nya, fɛnu lé é wo nɔ, yee saa lé Esitɛɛ a si yé é ’ka fɛ bɛ ma laa lɛ lo. Esitɛɛ kɛlɛ é zin munu faa lé wa ye, wo yuɛ gi.

¹⁶ Minwiinzan blɛn Asuérus plale mi nwiin lɛɛ sɔrafiézan lé moné vuzan lé wa laama Tébɛt, a nya lé wo go Esitɛɛ nya a va alé fuakɔn gi.

¹⁷ Esitɛɛ sɔ minwiinzan blɛn lɛ yé é gié lomu bɛnu faa ta. Yé é kɛlɛ a yuɛ gi é zin, yé a bli kɛlɛ a ma é zin yé é mini blɛn bɛnu faa ta. É tɔkoro wo a ’wuo ma yé é a kɛlɛ minwiin le nya Vasiti pa gi.

¹⁸ Minwiinzan blɛn fɛti blɛn kɛlɛ élé minisinu koo, é leemunu koo, wo lɛ, Esitɛɛ tɔ gi. É flinle nɔ élé bɛntɛrɛnu lɛ, yé é blɛfɛnu nɔ é bli zin nya minwiinzan blɛn lé fɛnɔbɛ gi.

Maadosé minwiinzan blɛn so we gi

¹⁹ Dé wo blɛnnu zén ékeva a gɔnɔ fiézan nya, ’bɛ bléyi va ’té Maadosé a é nyanale minwiinzan blɛn lé gɔrɔ ’léé.

²⁰ Esitɛɛ ’ka é sina valé é dɔgɔnɔ gɔɔn lɛ mi do lɛ lo, naa, a dinni be Maadosé a yi ga a lee, azama, yé é Maadosé déretawenu kɛlɛ tegelee, bélé é a ’bɛ lee bléyian va, ’bɛ zo.

²¹ ’Bɛ bléyi duo va, dé Maadosé a é nyanale minwiinzan blɛn lé gɔrɔ ’léé, minwiinzan blɛn lé miblalenu fié Bigitan valé Térɛs lé wo ke kɔn ’léé tabinzannu nya bɛ, wo bli fli minwiinzan blɛn Asuérus ma, yé é sɔ wo lɛ léé, ’wa gyɛ.

²² Maadosé we ’ko gi dɔɔ yé é a fe minwiin le Esitɛɛ lɛ, yé ’bɛ a fe minwiinzan blɛn lɛ yee Maadosé tɔ nya.

²³ Dé wo we ’ko gi kuli, dé wa ye léé, webozen lé, wo woo miblale fié ’ko gyɛ wo dunle nya yili ma. Yé wo we ’ko gyɛ minwiinzan blɛnnu lé sɛbɛ gi minwiinzan blɛn yuɛ va.