Esitɛɛ 1 - Kazambale lé Sebe Sauunu 1979

Asuérus fɛti kɛlɛ

¹ We ’ko bɔ Asuérus bléyi va. Asuérus pla tɛrɛ yɔ suiɛdo wɔlɛ sɔrafié nwiin, é sia Ende tɛrɛ ma fɔɔ yé é bɔ Étiopi tɛrɛ ma.

² Asuérus a é nyanale élé webleblin ta alé fla blɛn lé wa laama Suz bɛ, ana.

³ A plale mi nwiin lɛɛ yaazan nya, é fɛti do kɛlɛ élé tɛrɛ la mi blɛnnu faa koo, é leezannu koo, wo lɛ. Pɛɛsnu valé Mɛdenu lé sunya nwiinzannu koo, plaminwiin tɛrɛnu ta mi blɛnnu valé mi segelenu koo, wo zén ékeva alé fɛna.

⁴ Élé tɛrɛ la fuafɛ blɛnnu tagɔɔn yé é élé fua tɔbɔle blɛn zima tagɔɔn é ziin yi kiɛre nya. É a tagɔɔn yi yɔ sɔraziɛn wuo.

⁵ Yi ’konu giéle zuo, munu faa lé wo ke fla blɛn Suz ta, é sia mi blɛnnu ma yé é bɔ mi kiénénu ma, minwiinzan blɛn fɛti kɛlɛ wo lɛ yi sɔrafié élé kɔn ’léé gɔrɔ gi yilinu wuo.

⁶ Sɔ fu blɛnnu koo, sɔ tinu koo, sɔ ti drɔndrɔnnu koo, wa é dunle bale funu valé bale ti drɔndrɔnnu nya gɔɔlifu kpɔwɔlɛnu ma. Wa balenu dɔ kɔn wɛyilinu lé wo wo kɛlɛ gɔlɛfu plɛplɛnu nya, wo ma. Yialafɛnu lé wo wo kɛlɛ gɔɔlifu valé kyan nya, wa dɔra kɔn lɛɛ gi. Wo kɔn lɛɛ ’ko kɛlɛ karo sɔɔn koo, a fu koo, a bile nyananyanazannu koo, a tinu koo, wo nya.

⁷ Woo mini?-?fɛnu tɔa munu lɛ kyan ’yiminikana gɔnɔ faa gi. Minwiinzan blɛn fɛ nɔ é bli zin nya, amalé dɔrɔ kɛlɛ kiɛre.

⁸ Naa, wo ’ka munu nyunuan gla nya léé, wo nwɛ mini lo, naa, minwiinzan blɛn lé é leezannu lɛ léé, ’wo we kɛlɛ munu lé woo dan, wolé blibɔmawe yɛrama do do.

⁹ Minwiinzan blɛn na Vasiti ézé fɛti kɛlɛ lomu lɛ minwiinzan blɛn Asuérus lé fuakɔn gi.

Minwiin le Vasiti é zana lɛgama

¹⁰ Miblale sɔrafié ana, woo minwiinzan blɛn Asuérus lé nyanama paan. Méuman koo, Bizta koo, Aabona koo, Bigita koo, Abagita koo, Zétaa koo, Kaaka koo, woo lé. Minwiinzan blɛn dɔrɔ minile sia é bɔ a yi sɔrafiézan ma, ’té nwɛ a a gyɛna yé a gi nana.

¹¹ É lé miblale sɔrafié lɛ léé, ’wo da é na Vasiti nya é va, ’té ’bɛlé tɔkoro a é ’wuo ma, a nɔnɔmi nagɔɔnle mi blɛnnu valé munu lɛ we ma. Naa, a yara a é nɔnɔmi kaii, azama.

¹² Naa, dé miblalenu minwiinzan blɛn dére fe a na Vasiti lɛ, é léé, ’é ’ka gona lo. Yé minwiinzan blɛn bli fli é baba, yé a bli nwa.

¹³ Tɔɔn, minwiinzan blɛn we fe wedɔɔmunu lé wo bléyinu lé we dɔɔ bɛ, wo lɛ. Naa, a zo lé woo minwiinzan blɛn lé we yuɛ gi boo munu lé wo bélidɔwenu dɔɔ, wo yuɛ va.

¹⁴ Minisi sɔrafié lé wo si Pɛɛs valé Médi tɛrɛ la, ’té a se a wo lɛ léé, wo bié minwiinzan blɛn sɔnɔ woboan, ’té wo ke é nyanale a bɛ gi, wa a punma. Kaaséna koo, Sétaa koo, Adimata koo, Taasis koo, Mérɛs koo, Maaséna koo, Mémukan koo, woo lé.

¹⁵ É léé: Minwiinzan blɛn Asuérus wean pa miblalenu ’léé é na Vasiti dawe nya yé é ’ka a lɛdɔ lɛ a ma lo, é a lé wo mɛ we kɛlɛ a lɛ bélidɔwe yɛramaa?

¹⁶ Mémukan a zi pa minwiinzan blɛn valé minisinu lɛ léé: Minwiinzan blɛn saa lɛan a na Vasiti we naané kɛlɛ lo. Mi blɛnnu faa koo, minwiinzan blɛn Asuérus lé bɛntɛrɛ do do faa la munu koo, wo lɛ lé é a kɛlɛ.

¹⁷ Naa, we lé minwiin le a kɛlɛ, lomu faa é dan a ’ma lɛ, yé wo danserele bo lɛ a nya ’wo zananu ma. Wo dan a fe lɛ léé: Minwiinzan blɛn Asuérus a fe yi la léé, ’wo da minwiin le Vasiti nya ’é lɛ, yé Vasiti ’ka go lɛ lo.

¹⁸ Yé é sia ’bɛ bléyi va Pɛɛs valé Médi nwiinzannu nanu lé wo we ’ko ’ma, wo dan a fe lɛ ’wo zananu lɛ ’bɛ zo, yé é dan kɛlɛ lɛ lɛgamawe valé mi blifliwe nya.

¹⁹ Dé é dɔ minwiinzan blɛn gi é zima, é a lé wo bélidɔwe do kɛlɛ léé, té Vasiti é bɔra é dɛrɛ minwiinzan blɛn Asuérus ’lɛ lo, yé le bɛ lé ’bɛ mini a ta, minwiinzan blɛn ’é minwiin le lé tɔ nɔ ’bɛ lɛ. ’Wo bélidɔwe ’ko gyɛ Pɛɛs valé Mɛdenu lé sɛbɛ lé, wo ’ka a tavɔɔan lo bɛ, a gi, yé ’wa zana dɔɔ.

²⁰ Minwiinzan blɛn lé fuatɛrɛ a blɛn fɛan zo, wo dan yee alé bélidɔwe ’ko gi ’ma lɛ a ta fɛfaana. Dé wo zananu a mi blɛnnu nyaoo, dé wa mi kiénénu nyaoo, lomu faa é dan wo lɛdɔ lɛ a ma.

²¹ We ’ko sɔ minwiinzan blɛn valé élé minisinu lɛ. Yé minwiinzan blɛn we kɛlɛ Mémukan dére ta.

²² É sɛbɛ pa élé bɛntɛrɛ gi munu faa lɛ zia, wo dére gi, wolé sɛbɛ gyɛbɛ yɛrama do do. É a é gyɛle sɛbɛnu gi léé, é a lé gɔnénu faa ’é kɛlɛ ’wolé kɔnzannu nya, yé dé wean sɔ wo lɛ, ’wa kɛlɛ.