Éfez munu 6 - Kazambale lé Sebe Sauunu 1979

Mi lɛdɔmale valé sɔlɛle

¹ Nénu, ’ka ti valé ’ka bu lɛdɔma Mizan lé we yɛrama, naa, ’bɛ a tegele.

² ’I ti valé ’i bu lɛdɔma, ’bɛ a bélidɔwe vininzan lé Bale a ma blikɛlɛlɛdére fe, a nya,

³ yee lé ke léé, ’bé kɛlɛ, i gi nanale we ma yé i mɔn tɛrɛ la.

⁴ Yé ’kaa né tinu, té ka kalé nénu bli fli lo, naa, ’ka wo pa wo drɔle nya, é valé Mizan lé we paale nya wo gi.

⁵ Mi wuomunu, kazannu lé wo ke tɛrɛlamunu nya, ’ka wo lɛdɔma, kanale valé manyɔɔnle nya, bli do nya bélé fɛan zo lé ka a kɛlɛna Krist ɛ lɛ, a zo.

⁶ Té ka kɛlɛ wo yuɛ va saa na lo, bélé fɛan zo lé ka a kalé we kɛlɛna munu yuɛ va néné, a zo lo, naa, ’ka kɛlɛ bélé Krist wuomunu lé wo ke Kazambale lé blibɔmawe kɛlɛna wo bli faa nya, wo zo.

⁷ ’Ka wo lɛdɔma bli zin nya, bélé Mizan lɛdɔmale zo, té ka a kɛlɛ munu lɛdɔmale zo lo.

⁸ Ka a gi dɔɔ léé, kaa faa va mi do do, dé é a luu nyaoo, dé é a miné nyaoo, wezin lé é a kɛlɛ é dan a ma ban ye lɛ Mizan va.

⁹ Yé ’kaa wozannu, ’ka yee duo ɛ kɛlɛ wo lɛ. Té ka we pla wo lɛ bliflile nya lo. Ka a gi dɔɔ léé, ka valé wozan a do, é a la gi, yé a va mi, é ’ka mi naginian é kɔlɛ ma lo.

Kazambale lé gulidanfɛnu

¹⁰ We pɔné lé é ke ’ko: ’ka dɔ gligli Mizan gi, alé plɛplɛ lé a glɛ ’ka lo, a nya.

¹¹ ’Ka Kazambale lé gulidanfɛnu faa zén ka ta, ka dɔle gligli we ma yonufaatagɔné lé gi kinilenu ma.

¹² Naa, kaa ’ka buo sié tɛrɛlamunu ma lo; naa, la worona wemaplɛplɛzannu koo, fɛnu lé woo wo lɛdɔama koo, tɛrɛ ’ko la gunuti nwiinzannu koo, léli lɛrɛlɛrɛnu lé wo ke fɛna lorunu na koo, wo ma lé kaa buo sié.

¹³ Bɛwemalé, ’ka Kazambale lé gulidanfɛnu faa si, ka dɔle gligli we ma bléyi nyané va, yé wo faa kelele zuo, yé ka vo guliwuo?-?volɛzannu nya.

¹⁴ Bɛwemalé, ’ka dɔ gligli; webozen ’é kɛlɛ ka gyɛn kyɛsidi nya, yé we tegele ’é kɛlɛ ka golɛtayɔɔfɛ nya;

¹⁵ fuu dɔle mi ta lé éé sié vole drɔɔ lé Wenéné fele va, ’ka ’bɛ wo ka gane ma sawalanu nya;

¹⁶ yé é ziin, wenu faa gi, ’ka blipale si ka botakuunfɛ nya Satan lé dinwɔlɛnu lé, kyɛnɛnɛ ke wo ma, kalé wo dirile we gi.

¹⁷ Yé é ziin, ka silewegi lé é ke kanakoro nya, ’ka a sia, é valé Kazambale Léli lé gwɔun lé é ke Kazambale dére nya bɛ, a nya.

¹⁸ Bléyi faa ma, ’ka ba gɔnɔ faa zoro Kazambale Léli nya yé ’ka zanté gɔnɔ faa vɔ Kazambale Léli nya. ’Ka yara pa we ’ko kɛlɛle ta ka sɔbɛla nya, yé ’ka bazoro Kazambale lé munu faa lé we ma.

¹⁹ ’Ka bazoro an tɔ ma é ziin, léé, dé an kun Wenéné lé ke é yɔɔle, a fele ma, Bale ’é a fedére nɔ an lɛ yé maa fe anbo ma bli ta plɛplɛ nya.

²⁰ Wenéné ’ko lé we ma lé gɔgɔbale a maa Kazambale bɛgizan ma. ’Ka laa Bale lee léé, maa a fe an fuu nya an ta, é a lé maa fe fɛan zo, a zo ma.

Weale voélazan

²¹ Kaa sɔlɛbwe Tisik, yarapawelazan wuozan Mizan gi, é dan an tawe faa fe lɛ ka lɛ, ka é ziin, an mawe koo, an kɛlɛwe koo, kalé a faa dɔɔle we gi.

²² Maa a pa zia ka va anbo yuɛ va, kalé ko tawe ’male we gi, é valé ka bli dɔralale we gi.

²³ Tibale valé Mizan Jézu Krist, ’wo sɔlɛle valé blipale nɔ bwenu lɛ ma, yé ’wo wo vo drɔɔ ma.

²⁴ Munu faa lé Kaazan Jézu Krist sɔ wo lɛ sɔlɛle bozen nya, Bale ’é zin kɛlɛ wo lɛ ma.