Éfez munu 5 - Kazambale lé Sebe Sauunu 1979

’Ka tawo ka va kinile yɛrama

¹ ’Ka kɛlɛ Kazambale zuosonazannu nya, sɔlɛnénu wezannu zo.

² ’Ka tawo ka ke va sɔlɛle nya, Krist kɛlɛwe ma. Kaa sɔ a lɛ, yé ébozen nɔ Kazambale lɛ kaalé we ma bélé blan valé saraka gin néné zo.

³ Pɛnpɛnnégyɛle koo, we tiridɔle gɔnɔ faa koo, blibɔle fɛ ma koo, té wo ’bɛ do kpen tɔ ’ma ka méléna lo. ’Bɛ zo lé é ke é zima Kazambale lé munu zé nya.

⁴ Dére naanénu koo, boawenu koo, mi gisonawenu koo, we ’konu ’ka ka baagiwe nya lo; té wo wo ’ma ka ta lo ma. Naa, ’wo bɔvɔwenu ɛ ’ma ka ta ma.

⁵ Naa, ’ka a dɔɔ é zima ma, dé é a pɛnpɛnnégyɛzan nyaoo, dé é a we tiridɔle kɛlɛzan nyaoo, dé é a bli bɔ gɔɔli mazan nyaoo, ’bɛ gi léé, miyilibɔzan, ’bɛnu va mi do kpen ’ka dan tɔnɔ ble lɛ Krist valé Kazambale lé fuatɛrɛ la lo.

⁶ Té mi do é ka saan dére boanu nya lo ma. We ’konu ɛ dan Kazambale lé bliflile nya tɔnégiplɛplɛzannu ma.

⁷ Té ka nana wo va monomono lo.

⁸ É li, ’té ka a gunutinu va, yé sin ka va a é kinile Mizan gi. ’Ka tawo ka va kinile yɛrama.

⁹ Naa, mi va kinile tɔnɔ lé ke wezin gɔnɔ faa koo, we tegele gɔnɔ faa koo, webozen gɔnɔ faa koo, wo nya.

¹⁰ We lé é sɔ Mizan lɛ, ’ka yee ɛ nagini;

¹¹ yé gunutinu lé nyanamanu lé mi ’ka tɔnɔ yé wo gi lo, té ka wo pa lo, naa, ’ka wo yi ga.

¹² Naa, we lé wa kɛla kyeen gi, a fele a yaragyɛwe nya;

¹³ naa, we faa lé wa yi ga, san a ta bɔraan, naa, we faa lé é ke é bɔrale é a bélé san zo.

¹⁴ Bɛwemalé wo léé: Bii lé i ke yiɛna, ’i vuo, ’I vuo mi galenu va, Yé Krist é dan i va kini lɛ.

¹⁵ Bɛwemalé, ’ka yuɛ pa ka giégane va; té ka tawo bélé ’tugyɛmunu zo lo; naa, ’ka tawo bélé wedɔɔmunu zo.

¹⁶ Bléyi ’ko a bléyi nyané nya, bɛwemalé té ka bléyinu sɛrɛ é pla lo.

¹⁷ Bɛwemalé, té ka kɛlɛ ’tugyɛzannu nya lo, naa, Mizan lé blibɔmawe a fɛan zo, ’ka a dɔɔ ma.

¹⁸ Té nwɛ é ka gyɛ lo ma, ’bɛ a we vɔnle nya, naa, Kazambale Léli ’é ka kun ma.

¹⁹ ’Ka we fe ka ke lɛ Lɛrɛvɔsɛbɛ gi lɛrɛnu koo, Bale tɔbɔlɛrɛnu koo, lélilɛrɛnu koo, wo vɔle nya. ’Ka lɛrɛ vɔ yé ’ka Mizan bɔ vɔ ka bli faa nya a tɔ zin fele nya.

²⁰ ’Ka ka Ti Bale bɔ vɔ yifaama we faa ma, Kaazan Jézu Krist tɔ nya,

²¹ yé ’ka pla ka ke wuo Jézu Krist lee kanale nya ma.

Gɔné valé é na lé we

²² ’Kaa gɔné nanu, ’ka pla ka zananu wuo bélé fɛan zo lé ka ke Mizan wuo, a zo.

²³ Le zana a le nwiinzan nya, bélé fɛan zo lé Krist ke léglizi nwiinzan nya, ’té é ke a kɔlɛ nya yé é a a siéwegizan nya é ziin bɛ, a zo.

²⁴ Fɛan zo lé léglizi ke é plale Krist wuo, a zo duo lé é a lé lomu ’é pla ’wo zananu wuo we faa gi.

²⁵ ’Kaa le zananu, ka nanu ’é sɔ ka lɛ, bélé fɛan zo lé léglizi sɔ Krist lɛ, a zo ma, yé ébozen nɔ alé we gi,

²⁶ a kɛlɛle sauun we gi, yé é a gi bɔ ’yi valé é dére nya.

²⁷ Léglizi tɔbɔle ’ko, ’té a tiri ’ka lo, ’té a ma ’ka é yurule lo, ’té gun do kpen ’ka a ma lo, ’té é ke sauun valé wéiin, Jézu a a va léé, ’é a ye ébo zé nya, amalé ébo nɔ alé we gi.

²⁸ A zo duo lé é a lé gɔnénu nanu ’é sɔ ’wo lɛ bélé wobozen kɔlɛ sɔ wo lɛ fɛan zo, a zo. Mian a na sɔ a lɛ, é sɔ ébozen lɛ é ziin.

²⁹ Mi do kpen kɔlɛ za ’ka ébozen gi monomono lo; naa, éé fɛblele no a lɛ, ’té éé a paan é zima, bélé Krist éé léglizi zé kɛla fɛan zo, a zo.

³⁰ Kaa a a kɔlɛvafɛnu nya, azama.

³¹ Bɛwemalé é a lé gɔné é si é ti valé é bu va, yé é péli vɔ é na va, yé wo fiénu ’é kinin mi do kpen nya.

³² Weyɔɔle ’ko a blɛn. Maa we ’ko fé Krist valé léglizi lé we ma.

³³ Yé é ziin, ka faa nanu ’é sɔ ka lɛ bélé kabozen zo ma, yé ’kaa lomu, ’ka zananu lɛdɔma ma.