Éfez munu 4 - Kazambale lé Sebe Sauunu 1979

Kazambale Léli lé nanale

¹ Bɛwemalé, maa, Mizan lé bokɔngizan, maa we plaan ka lɛ léé, we lé wo ka laa a ma, ’ka tawo a yɛrama;

² ’ka tawo bo kɛlɛle kiéné koo, bli drɔɔ koo, bli tiéé koo, wo nya; ’ka ’wuo dɔ ka ke wuo sɔlɛle nya;

³ nanale lé Kazambale Léli a nɔ ka lɛ, ’ka kwa kuli léé, té é san ka lee lo. Kalé vole drɔɔ ’é kɛlɛ ka lɛ bélé bawɔrɔ zo, yé ’ka nanale polu dɔ ’bɛ nya.

⁴ Fɛan zo lé Kazambale ka laa yé ka bli kɛlɛ we do kpen lɛ, a zo duo lé kɔlɛ a do kpen, yé Kazambale Léli a do kpen,

⁵ Mizan a do kpen, blipale a do kpen, batizé a do kpen,

⁶ Kazambale a do kpen, é a mi faa Ti nya; é a wo faa nwiin, é a wo faa worona, yé é a wo faa gi.

⁷ Naa, wo zin kɛlɛ ko va mi do do faa lɛ Krist lé blɛ kɛlɛbɛ yɛrama.

⁸ Bɛwemalé é a é gyɛle sɛbɛ gi léé: É go aan wo la gi, É go luunu nya; Yé é blɛnu kɛlɛ munu lɛ.

⁹ É go loru, ’bɛ gi lé nɔɔ? ’té dé é ’ka a zunle nya é vinin tɛrɛ wuo lo.

¹⁰ Mi lé é zun tɛrɛ wuo, yee duo ɛ go lanu faa ta loru, fɛnu faa fanle we gi.

¹¹ Alé blɛnu lé ke ’ko: é mi kenu kɛlɛ nwunvɔmunu nya; é a kenu kɛlɛ Balelayemunu nya; é a kenu kɛlɛ wenéné fezannu nya; é a kenu kɛlɛ léglizigimunu pazannu valé wepaamigizannu nya,

¹² gun sile Kazambale lé munu ma we gi, yé wo bɔ Kazambale va nyanama pale lɛ, yé wo Krist kɔlɛ dɔ gligli.

¹³ We ’konu é dan vo lɛ ana fɔɔ yé kaa faa bli é vo we do lɛ, yé kaa faa é Kazambale Be dɔɔ, yé kaa faa é tin yé kaa yara é kini bélé Jézu yara a é kinile fɛan zo, a zo.

¹⁴ Amalé té kaa kɛlɛ nénu zo é dɛrɛ lo; té kaa bli é kɛlɛ we faa lɛ lo; té kaa go wepaale faa zuo lo; té mi tablezannu é kaa saan wolé dabli kɛlɛle valé wolé suyɛn dére nya lo;

¹⁵ naa, kaa webozen fé sɔlɛle nya, ’té kaa tin‐é bɛ faa ma, mi lé é ke kaa ’wuo nya, a gi, ’bɛ gi léé, Krist.

¹⁶ Kɔlɛvafɛnu faa a é yerele ékema yé wo kɛlɛ fɛ zénle ékeva plɛplɛ do nya, gane plinna valé bɛ plinna miinnu lé we ma, yé Krist ma lé a tinle éé sié, plɛplɛ lé é ke a kɔlɛvafɛnu do do zé nya é zima bɛ, a yɛrama, ’té kɔlɛ ébo dɔa gligli sɔlɛle gi.

Dɔbɛ dɛrɛ lé kaa a yé Krist gi

¹⁷ We lé maa a fé, ’té maa a plaan ka lɛ Mizan tɔ nya, yee lé é ke ’ko: Yolémunu lé woo tawoo boblɛn ’wuogibɔrɔlenu yɛrama bɛ, té ka tawo é dɛrɛ wo zo lo.

¹⁸ Wolé we ’léé a é vole, wa wo tanyila, yé wo tɔné gi a é yuyu, amalé wo ’ka a gi dɔɔa léé, Kazambale éé mi bélié lo.

¹⁹ Nyɛ ’ka zén‐é wo gi lo, wo ’wobo nɔ we vɔnle lɛ, tiridɔwe gɔnɔ faa kɛlɛle we gi bélé blii lé.

²⁰ Yé ka ’ka a ’ma lɛ léé, Krist lé we a ’bɛ zo lo,

²¹ ’té dé ka alé we ’ma webozen nya, ’té webozen lé é ke Krist gi, ’té ’bɛ yɛrama lé wo we paa ka gi.

²² Wa paa ka gi léé, blami dɔbɛ lé é ke kalé tɛrɛla kyɛn zé nya, ’té é vɔn blibɔmawe saanlenu ma bɛ, ’é si ka lee,

²³ yé Kazambale Léli ’é ka kɛlɛ mi dɛrɛnu nya ka ’wuogibɔrɔlenu gi,

²⁴ yé dɔbɛ dɛrɛ lé wa kɛlɛ Kazambale yɛrama tegele valé sauun, ’té éé sié webozen va bɛ, ’ka ’bɛ si.

²⁵ Bɛwemalé, ’ka sɔn vɔ viéwole ma, yé ka va mi do do faa ’é weboen fe é bɔluzan lɛ, naa, kaa faa a kɔlɛ do vafɛnu nya.

²⁶ Yé dé ka bli fli té ka wenyané kɛlɛ monomono lo. Té yiri é vɔ kalé bliflile ma lo,

²⁷ yé té ka zi lɛ so yonufaatagɔné lɛ lo.

²⁸ Mian é kyeenwo é kyɛn, té é kyeenwo é dɛrɛ lo; naa, ’é nyanama pa yé ’é wezin kɛlɛ é bɛnu nya, mi lé, a mawe ke fɛ do gi, fɛ nɔle ’bɛzan lɛ we gi.

²⁹ Té dére naané do kpen é bɔra ka ’léé lo, naa, dére zima lé éé mi dɔa gligli, ’té munu lé wa maan, ’té éé wo drɔɔ voo bɛ, ’ka yee ɛ fe é febléyi nya ma.

³⁰ Té ka Kazambale Léli ’namawe kɛlɛ lo, a nya lé Kazambale fɛ dɔ ka ma taboyi zé nya.

³¹ We nyanale koo, zapale koo, bliflile koo, zɔdɔle koo, mitɔsɛrɛwe koo, we lɛrɛlɛrɛ gɔnɔ faa koo, woo faa ’é si ka méléna ma.

³² ’Ka kɛlɛ ka ke ma mi zinnu nya, é valé mi ma wedɔɔzannu nya, yé ’ka ka ke ma we vo, bélé fɛan zo lé Kazambale ka ma we vo Krist gi, a zo.