Éfez munu 1 - Kazambale lé Sebe Sauunu 1979

Weale lé

¹ ’Kaa Kazambale lé munu lé ka ke Éfɛz, ’té ka ke Jézu Krist gi yarapawelazannu nya bɛ, an we ka va. Maa Pɔl lé, an kɛlɛ nwunvɔzan nya Kazambale lé blibɔmale nya, maa ɛ ke sɛbɛ ’ko gyɛna ka lɛ.

² Kaa Ti Bale valé Mizan Jézu Krist, ’wo zin kɛlɛ ka lɛ, yé ’wo ka vo drɔɔ ma.

Kaa drɔɔ a é vole Krist gi fɛan zo

³ Kazambale, Kaazan Jézu Krist Ti lé é kaa drɔɔ vo léli drɔɔ vole gɔnɔ faa nya fɛna lorunu na Krist gi, a drɔɔ ’é vo ma.

⁴ Krist gi lé Kazambale kaa si a va tɛrɛ bɔrale ’lɛ, kaa kɛlɛle a yuɛ va sauun valé wéiin we ma.

^5-6 Kaa sɔle Bale lɛ lé we ma lé, é a fe é kyɛn léé, é dan kaa si lɛ ébozen lé nénu nya Jézu Krist lé we ma, léé, alé zin blɛɛn lé é a kɛlɛ kaa lɛ élé néwezan gi, yé munu a tɔ zin fe a we ma. We ’ko a Bale lé blibɔmawe nya yé é a gi nana, amalé é a kɛlɛ.

⁷ Jézu nya lé é kaa tabo, ’bɛ gi léé, a nyɛ nya, yé Bale kaa ma we vo kaalé wenyanénu ma.

⁸ ’Bɛ zo lé Kazambale élé zin blɛn kɛlɛ kaa lɛ kiɛre wedɔɔle gɔnɔ faa valé gi kinile gɔnɔ faa nya.

^9-10 Kazambale lé blibɔmawe do lé ke é yɔɔle, nyanaizénmitafɛ lé é ke Krist nya bɛ, Bale a kɛlɛ é kyɛn, yé é a lɛ sɔɔ a lɛsɔɔbléyi nya, yé é kaa bɔn gi kini a nya. Yee lé ke ’ko: lagifɛnu faa koo, tɛrɛlafɛnu faa koo, Krist lé we ma lé wo zén ékeva yé é kɛlɛ wo nwiinzan nya.

¹¹ Kaa a Krist gi, amalé kaa a tɔnɔblezannu nya, naa, mi lé éé we faa kɛla ébozen lé blibɔmawe yɛrama bɛ, é kaa dɔ a nya é kyɛn ’é bɔn‐in danle nya, léé,

¹² kaa lé, kaa bli kɛlɛ Krist lɛ é vinin, kaalé we ma lé ’wo Jézu lé fua tɔ bɔ.

¹³ Ka é ziin, webozen dére lé é ke ka siéwegi Wenéné nya, ka a ’ma aan wo, ka bli vo a lɛ yé ka wɔra Krist gi, yé é fɛ dɔ ka ma Léli Sauun lé, wa nɔle we fe, a nya;

¹⁴ Léli Sauun a Kazambale bɛfɛ nya, kaalé tɔnɔ yele we ma, fɔɔ yé munu lé Kazambale wo lɔ élé fua tɔbɔle we ma, yé é wo tabo.

Pɔl lé bazorole

¹⁵ We ’konu faa lé we ma, maa a ’ma aan wo léé, ka bli a Mizan Jézu lɛ, yé Kazambale lé munu faa va sɔlɛle a ka gi,

¹⁶ maa Bale bɔ vɔa yifaama kalé we ma, an ’ka daan a ma lo; yé maa kalé we laan Bale lee bazorole nya.

¹⁷ We lé maa a laan kazé nya, yee lé ke ’ko: Kaazan Jézu Krist zé Bale, Fuasan faa Ti, ’é wedɔɔbli nɔ ka lɛ ma, yé ’é pa ka ta ma, kalé yeebozen dɔɔle we gi ma;

¹⁸ ’é ka bɔn‐in dɔ ka ma ma, yé we lé ka bli ke a lɛ alé ka laale we ma koo, tɔnɔ lé Bale a yé élé munu ma, ’bɛ a fua blɛɛn nya fɛan zo koo,

¹⁹ kaa lé kaa bli paan a lɛ, Kazambale a plɛplɛ é baba kaa mawe kɛlɛna fɛan zo koo, yé ka a dɔɔ.

²⁰ Élé plɛplɛ ’ko nagɔɔn Krist gi. É dɔ Krist ta go go yé é a nwa gamunu va yé é a nyana é bɛyilazia fɛna lorunu na;

²¹ wemaplɛplɛzannu faa koo, fɛ faa lé wa lɛdɔama koo, plɛplɛ faa koo, mi faa lé a se ke wo lɛ koo, tɔ faa lé mi éé bɔa a laale lɛ, dé é a bléyi ’ko va nyaoo, dé é a bléyi lé é dan bɔ lɛ bɛ, a va nyaoo, ’bɛ tɔ faa koo, Krist nyanana a wo faa nwiin loru baa.

²² Kazambale fɛnu faa pla Krist wuo, yé é Krist dɔ léglizi ’wuo nya,

²³ yé léglizi a Krist kɔlɛ nya, mi lé éé fɛ faa faan fɛfaana, léglizi a ’bɛzan lɛsɔɔle nya é ziin.