Ébrunu 9 - Kazambale lé Sebe Sauunu 1979

Lagi fɛna sauun valé tɛrɛla fɛna sauun

¹ Gipawe vinin zé Bale bɔle lé bélidɔwenu ana é ziin, yé alé fɛna sauun ana tɛrɛ la.

² Wo sɔkɔn dɔ webozen nya. Wa gi vininzan laama fɛna sauun, yé fintran koo, tablé koo, Bale ’lɛburunu koo, wo ana ’bɛna.

³ Sɔ fiézan lé ke kɔnmi nya, wa zuo zia laama fɛna sauun tinle.

⁴ Balebanna lé wa kɛlɛ kyan nya, ’té é ke lasikɔrɔ zé nya bɛ, é valé gipawe pagikɛsu lé wo kyan sele a ma, wa ’bɛna. Kyanbɔ lé mana ke a gi koo, Arɔn lé tawomayili lé é nɛɛ yé a vwi bi koo, gɔlɛfén lé gipawe ke é gyɛle a ta koo, wa gipawe pagikɛsu gi.

⁵ Gipawe pagikɛsu ta loru Kazambale lé sérubɛnnu ana, ’té wo furɔ éé zén‐é nyanai zén mi la nyanana ta. Bléyi ’ko ’ka wo ma we do do faa febléyi nya lo.

⁶ Wo fɛ ’konu faa pla ’wo plana a zo. Balebanmunu éé wɔraan yifaama sɔkɔn gi vininzan na, wolé balebannyanama pale we ma.

⁷ Naa, Balebanmunu ’lɛzan do kpen ɛ goo kɔnmi zi lɛɛ do gɔnɔ do. Dé abozen lé wenyané valé munu lé wenyané ma wi nyɛ ’ka a lee lo, é ’ka goo ’bɛna lo.

⁸ We ’ko nya Léli Sauun a gɔɔn léé, bléyian va lé sɔkɔn vininzan ke é dɔle, ’té fɛna sauun tinle lé zi lɛ ’ka tan so lɛ lo.

⁹ We ’ko a bélé fɛfoto lé we zo fɔɔ yé kaazé bléyi é bɔ. Bléyian va lé we ’ko ana, munu éé Balebanfɛnu no, ’té woo sarakanu boo, naa, ’bɛ zo Balebɔle ’ka gun sié mi ma lo. Mi ’bɛ gi dɔɔ é bli gi.

¹⁰ Balebanle ’ko zo a tɛrɛla bélidɔwe nya é pla; fɛblele koo, minifɛnu koo, fɛ valé mi zurubɛ faa koo, ’bɛnu a a ma wenu nya, yé wo vo ana fɔɔ yé we tavɔɔ bléyi bɔ.

¹¹ Naa, Krist da Balebɔzi dɛrɛ nya; yé yee ɛ ke ’bɛlé Balebanmunu ’lɛzan nya; sɔkɔn lé ke blɛn, é zima é mini a koɛzan ta, é go ’bɛ gi. Mi ’ka ’bɛ sɔkɔn dɔ lɛ lo, ’bɛ gi léé, é ’ka tɛrɛ ’ko lé wa kɛlɛ, a tafɛ do nya lo.

¹² Krist go fɛna sauun tinle na gɔnɔ do bléyi faa zé nya; é ’ka go lɛ ana boligɔné valé diriné nyɛ nya lo; naa, é go ébo nyɛ nya é lee. É kaa tabo ’bɛ zo ’té. We bɛ ’ka ’bɛ zuo monomono lo.

¹³ Dirigɔné valé boligɔné nyɛ koo, dirida yee lé wa nwɛɛn‐an munu lé wo Bale sɔnné sɛrɛ, wo ta, ’bɛ koo, dé ’bɛnu we si munu nwiin yé wo kɛlɛ ’wo bwenu nya mi do é ziin,

¹⁴ ’té Krist nyɛ nii? ’Bɛzé ’ka minié loo? Léli lé é ’ka gaan lo, ’bɛ nya lé ébo nɔ Kazambale lɛ saraka lé gun ’ka a ma lo, a nya. Kaa kɛlɛwenu lé wo tɔnɔ ’ka lo, a nyɛ ’ka dan wo si lɛ kaalé wevasibli gi yé kaa kɛlɛ Bale yuɛmale bɔzannu nya loo?

¹⁵ We ’ko ma lé Krist kɛlɛ gipawe dɛrɛ gizan nya; wenyanénu lé munu a kɛlɛ bléyian va lé wo ke gipawe vininzan va, é ga wo sile wo lee we gi, munu lé Bale wo laa, tɔnɔ lé é ’ka nyaan lo, ’té Bale a fe léé, é dan a nɔ lɛ wo lɛ bɛ, wolé a blele we gi.

¹⁶ Dé mi do ’é zaragulisɛbɛ gyɛ, é a lé é ga faa yé wo sɛbɛ tawe kɛlɛ.

¹⁷ Woo zaragulisɛbɛ la we kɛla mi gale zuo; dé sɛbɛgyɛzan ’ka tan ga lɛ lo, ’té yee sɛbɛ tawe lɛ ’ka tan sɔɔ lɛ lo.

¹⁸ We ’ko ma lé, gipawe vininzan é ziin, wa dɔ plɛplɛ nyɛ nya, ’bɛ gi léé, fɛ do ga a gi.

¹⁹ Dé Moizi bélidɔwe sɔnné tɛtɛnénu fe munu faa lɛ faa, ’bɛ zuo yé diriné valé boligɔné nyɛ koo, ’yi koo, ’blakyɛɛsɔ sɔɔn valé izopéyili bɛné koo, é wo si yé é nyɛ nwɛɛn bélidɔwe sɛbɛ valé munu ta, yé é léé:

²⁰ Gipawe lé Kazambale a fe léé, ka valé ’wonu a kɛlɛ, a dɔ plɛplɛ nyɛ lé ke ’ko.

²¹ A zo duo lé é nyɛ nwɛɛn sɔkɔn valé Balebɔfɛnu faa ta.

²² Weboen lé, dé é a bélidɔwe nya, é vo sɛ yé fɛnu faa gi é bɔ nyɛ nya, yé dé nyɛ zanale ’ka lo ’té mi ma we vole ’ka lo.

Krist lé ke wenyané nyaafɛ nya

²³ Naa, maa léé, sɔkɔn valé é gifɛnu a bélé fɛfoto zo, é a bélé lagifɛ bozen zuosonafɛnu zo. Dé wo fɛ boen zuosonafɛ ’lɛ dɔ saraka ’ko zonu bole nya, é a lé wo lagifɛ bozen ’lɛ dɔ sarakanu lé ke é zima é mini tɛrɛ la zé ta, a nya.

²⁴ Fɛna sauun lé mi a kɛlɛ fɛ boen zuosonafɛ nya, Krist ’ka wɔra lɛ ’bɛna lo. É wɔra la bozen gi yé ébo dɔ Kazambale yara sin kaalé we gi.

²⁵ É ’ka wɔra lɛ ’bɛna ébozen nɔle saraka nya gɔnɔ kiɛre nya lo, bélé fɛan zo lé Balebanmunu ’lɛzan éé wɔraan lɛɛ do gɔnɔ do wi nyɛ nya é lee fɛna sauun na, a zo lo;

²⁶ dé é a a zo, é sia tɛrɛ bɔrale ma ’té é a kɔɔn léé, Krist é nyané ble gɔnɔ kiɛre nya, naa, lao, lɛɛnu nyaana, é bɔra gɔnɔ do kpen nya, yé ébo nɔ saraka nya wenyané nyaale we gi.

²⁷ Naa, Bale a fe léé, mi faa é gaan gɔnɔ do kpen, ’bɛ zuo yé é wolé we ble.

²⁸ A zo lé Krist é ziin, é ébo nɔ gɔnɔ do kpen mi kiɛre lé wenyané nyaale we gi, yé é dan da lɛ a gɔnɔ fiézan nya; é ’ka dan da lɛ wenyané nyaale we ma lo, é dan da lɛ munu lé wo ke a lɛbɛnna, wo sile we gi we ma.