Ébrunu 8 - Kazambale lé Sebe Sauunu 1979

Gipawe dɛrɛ lé Balebanmunu ’lɛzan

¹ Wenu lé ko wo fe lao, wo va we blɛn lé é ke ’ko: Balebanmunu ’lɛzan ’ko zo ɛ ke kaazé nya; é a é nyanale Kazambale nyanana fuablin bɛyila la gi.

² Sɔkɔn bozen lé Mizambale a dɔ, ’té mi do kpen ’ka a dɔ lɛ bɛ lo, yee fɛna sauun ’kona lé é ke nyanama pana.

³ Wo Balebanmunu ’lɛzan faa dɔ Bale blannu nɔle valé sarakanu bole we gi; bɛwemalé, mi ’ko é ziin, é a lé é fɛ nɔ.

⁴ Dé é a kɔɔn tɛrɛ la, ’té é ’ka boenwo kɛla Balebanzan nya lo, naa, munu lé Balebanmunu lé woo Balebanfɛ no bélidɔwe yɛrama, wo ana.

⁵ Naa, weboen lé, Balebanmunu ’ko lé balebannyanama a bélé fɛfoto zo, é a bélé we zuosonale zo. Yee fɛ boen a la gi. Ko ’bɛ gi dɔɔ we lé Kazambale a fe Moizi lɛ, ’té ’bɛ a gona sɔkɔn dɔna bɛ, a ma. É lé a lɛ léé: ’I yuɛ pa ibozen va. A dɔbɛ faa lé maa a gɔɔn i lɛ gɔ nwiin ’ko, bé faa kɛlɛ ’bɛ yɛrama ’kyɛ.

⁶ Naa, sin, Jézu lé balebannyanama tɔ a é bɔle é mini Balebanzannu faa zé ta; yé é ziin, gipawe dɛrɛ lé Jézu ke a gizan nya, é a é zima é mini gipawe vininzan ta. Blivolɛdére lé wa fe gipawe dɛrɛ ma, ’bɛ a néné é mini blivolɛdére lé wa fe gipawe vininzan ma, a ta, amalé gipawe dɛrɛ mini.

⁷ Dé é vo léé, gun ’ka gipawe vininzan ma lo, ’té wo ’ka kɔɔn a fiézan kɛla lo.

⁸ Naa, Mizambale léé: Izraɛl munu lé we ’ka tegele lo, yé é léé: Mizambale léma: Ka ye, yi do é dan bɔ lɛ, Yé maa dan gipawe dɛrɛ kɛlɛ lɛ Izraɛl valé Juda munu va,

⁹ É ’ka bélé gipawe lé maa a kɛlɛ wo tranu va Yian ma lé maa zi sia wo nya Wo sile Éjipiti tɛrɛ la we gi, a zo lo. Naa, wo ’ka wo yara pa lɛ anlé gipawe kɛlɛle ta lo; Amalé maa Mizambale léé: An yara sié wo ta é ziin.

¹⁰ Naa, Mizambale léé: Gipawe lé maa dan a kɛlɛ lɛ Izraɛl munu va Yi ’konu zuo, yee lé é ke ’ko: Maa dan anlé bélidɔwenu pa lɛ wo ’wuo gi, Maa dan wo gyɛ lɛ wo bli gi Yé maa dan kɛlɛ lɛ wolé Bale nya, Yé wo dan kɛlɛ lɛ anlé munu nya.

¹¹ Mi do kpen ’ka dan we paa lɛ é bɔluzan gi lo, Yé mi do kpen ’ka dan we paa lɛ é bwe gi léé: ’I Mizambale dɔɔ, lo. Naa, é sia wo va né kiénénu ma, yé é bɔ wo va mi segelenu ma, Wo faa é dan an dɔɔ lɛ.

¹² Maa dan wo ma we vo lɛ wolé weplenu ma, Yé wolé wenyanénu sele ’ka dan dɔ lɛ an gi é dɛrɛ lo, ’bɛzama.

¹³ É a fe aan wo léé, gipawe dɛrɛ, ’bɛ gi léé, a vininzan kɛlɛ é kwa. Yee lé é kɛlɛ é kwa, ’té é kwa gyɛ bɛ, a sile ana bɔ é pu.