Ébrunu 7 - Kazambale lé Sebe Sauunu 1979

Balebanzan Mɛlkizédɛk dɔbɛ

¹ Mɛlkizédɛk ’ko, é a Salɛm munu nwiinzan nya, yé é a é ziin Bale lé é ke lagi loru, a banzan nya. Bléyian va lé Abraam si minwiinzannu kelena guli ma, Mɛlkizédɛk go a si lɛ zia yé é a drɔɔ vo.

² Yee ɛ lɛ lé Abraam fɛ faa vuzan nɔ. A tɔ gi léé, minwiinzan lé éé we tegele kɛla, yé é ziin, é a Salɛm nwiinzan nya, ’bɛ gi léé, minwiinzan lé éé mi voo drɔɔ.

³ A ti ’ka lo, a bu ’ka lo, a kulu ’ka lo, a pélisiana ’ka lo, yé é ’ka gaan lo, naa, é a Kazambale Be zo, yé éé voo Balebanzan nya lɛɛfaama, a glɛ ’ka lo.

⁴ Mi lé kaa tra Abraam gulizarafɛ zima zima vuzan nɔ a lɛ, é a blɛn fɛan zo, ’ka bɔn‐in bɔrɔ ’bɛ ma do.

⁵ Lévi kulunu lé woo Kazambale baan, a se a wo lɛ léé, munu é fɛvuzan nɔ wo lɛ bélidɔwe yɛrama; ’bɛ gi léé, wo bwenu lé wo ke Abraam kulunu nya, ’bɛnu ɛ fɛvuzan no wo lɛ.

⁶ Naa, Abraam fɛvuzan nɔ Mɛlkizédɛk lɛ, dɔlé té é ’ka Lévi kululazan nya lo, yé mi lé Bale blivolɛdére fe a lɛ, é ’bɛzan drɔɔ vo.

⁷ Naa, mi segele ɛ mi kiéné drɔɔ voo, ’bɛ ’ka zavɔwe nya lo.

⁸ Dé é a Lévinu lé we nya, wo lé wo fɛvuzannu nɔ wo lɛ, wa gazannu nya, naa, dé é a Mɛlkizédɛk lé we nya, mi lé wo fɛvuzannu nɔ a lɛ, Bale a ma we fe léé, é a é yuɛma.

⁹ ’Bɛ ta loru, Lévi lé wo fɛvuzan nɔ ’bɛ lɛ bɛ, dé Abraam fɛvuzan nɔ, ’té wo bɔaléé, wa fe léé, Lévi ɛ nɔ,

¹⁰ naa, bléyian va lé Mɛlkizédɛk go Abraam si lɛ zia, ’té wo ’ka tan nyɛ gyɛ lɛ Lévi ti boen nya lo.

¹¹ Balebannyanama lé wa nɔ Lévinu lɛ, é a bélidɔwe lé wa nɔ munu lɛ, a punsina nya. Naa, dé Lévi lé balebannyanama é bɔalɛ léé, é gun si mi ma ’naan, mɛmalé é a lé wo Balebanmunu ’lɛzan bɛ dɔ Mɛlkizédɛk dɔbɛ nya, ’té é ’ka Arɔn dɔbɛ nya loo?

¹² Naa, dé wo balebanbɛ tavɔɔ é a lé wo bélidɔwe tavɔɔ é ziin.

¹³ Naa, mian wo we ’konu fe alé we ma, é a bɛn bɛ gi mi nya, bɛn lé alé mi do kpen ’ka Kazambale baan lo, a gimi nya;

¹⁴ naa, kaa ye wéiin léé, Kaazan si Juda gɔnɔ gi; bɛn lé, Moizi ’ka a fe lɛ léé, balebannyanama a wozé nya lo, wo gɔnɔ gi lé é si.

^15-16 We ’ko na a é gɔɔnle kpaklaa. Balebanzan dɛrɛ lé wa dɔ Mɛlkizédɛk dɔbɛ nya bɛ, wo ’ka a dɔ lɛ Balebanzan nya tɛrɛla bélidɔwe nya lo. Bélile lé a glɛ ’ka lo, ’bɛ a a gi, ’bɛlé plɛplɛ ma lé wa dɔ Balebanzan nya, amalé we ’ko na a é gɔɔnle kpaklaa.

¹⁷ Naa, wo a ma we fe ’ko zo léé: Bii a yifaama Balebanzan nya Mɛlkizédɛk dɔbɛ nya.

^18-19 Bélidɔwe kyɛn ’ka plɛplɛ lo, yé a tɔnɔ ’ka lo. Bélidɔwe ’ka gun sié we do kpen ma lo, bɛwemalé wa yi ga, yé fɛ lé é ke é zima é mini bélidɔwe la, ’bɛ a pagi si, yé kaa bli a ’bɛ lɛ, amalé kaa biéan Kazambale sɔnɔ.

^20-21 ’Bɛ ta loru, Bale ’ka we ’ko kɛlɛ lɛ é pla lo; mi dɛrɛ lé Bale a dɔ Balebanzan nya bɛ, é a kɛlɛ sɔbɛlawe nya ’ébo ’nyɔɔnle nya. Dé Bale a Lévinu dɔna Balebanzannu nya, é ’ka ’ébo ’nyɔɔn lɛ ’bɛ we gi lo, naa, dé é a Jézu dɔna Balebanzan nya ’ébo ’nyɔɔn a we gi, yé é léé: Mizan bale ’nyɔɔn, yé é ’ka dan ’é dére nɔla lɛ lo, É léé: Bii a yifaama Balebanzan nya Mɛlkizédɛk dɔbɛ gi.

²² ’Bɛ zo lé Jézu kɛlɛ gipawe lé é ke é zima é mini a vininzan ta, a gizan nya.

²³ Yé é ziin, Balebanmunu a di é vinin, yé woo wo dɔa é ke zuo ke zuo. Yifaama woo gaan amalé wo ’ka bɔa mɔnle lɛ ana lo.

²⁴ Naa, Jézu ’ka gaan lo, bɛwemalé alé balebannyanama ta ’ka vɔɔan lo.

²⁵ Bɛwemalé, munu lé woo biéan Kazambale sɔnɔ Jézu tɔ gi, Jézu éé bɔa wo sile lɛ we gi tegele. É a é yuɛma lɛɛfaama ’té éé dɔa wolé we gi lɛɛfaama Kazambale ’lɛ, azama.

²⁶ Balebanmunu ’lɛzan ’ko zo, ’bɛ a kaazé nya é zima; é a sauun, we ’ka a nwiin lo, a bɔn gi tiri ’ka lo, é kan kini wenyanékɛlɛmunu ma, yé é a loru baa é mini lanu ta.

²⁷ Alé we ’ka bélé Balebanmunu ’lɛzan bɛnu zé zo lo. Yi faa do do ma woo Bale baan é vinin wobo lé wenyané ma, ’bɛ zuo yé wa baan munu lé wenyanénu ma. Naa, Jézu zé ’ka ’bɛ zo lo. É ébo nɔ Balebanfɛ nya gɔnɔ do kpen lɛɛ faa zé nya.

²⁸ Naa, bélidɔwe ɛ mi tɔɔtɔɔnu dɔ munu lé Balebanzannu nya; naa, bélidɔwe nɔle zuo Bale ébo ’nyɔɔn yé ’bɛ nya lé é Bale Be Jézu dɔ Balebanmunu ’lɛzan lé gun ’ka a ma lo, a nya, lɛɛfaama.