Ébrunu 6 - Kazambale lé Sebe Sauunu 1979

^1-2 Bɛwemalé Krist lé we vininzannu lé wa paa ka gi, té kaa vo ’bɛ saa ma lo. Sɔnvɔle mi kɛlɛwenu lé ke bélé fɛ gale zo, wo ma, ’bɛ koo, bli vole Kazambale lɛ koo, batizé lé we paale koo, bɛ plale mi ta koo, gamunu nwale koo, welɛdɔle mi gi lé a glɛ ’ka lo koo, ’bɛ faa a a pélisia la we nya, amalé té ka vo ’bɛ saa ma lo. ’Ka yara pa we lé éé gun sié mi ma, a kɛlɛle ta.

³ Yé ko dan kɛlɛ lɛ a zo, ’té dé Kazambale a nyi si.

⁴ Munu lé, wo wo bɔn gi kini, ’té wo lagi blɛ ye, ’té wo ’wozé ye Léli Sauun va,

⁵ ’té wo Kazambale dére néné lɛdan, ’té bléyi lé é dan bɔ lɛ, wo alé plɛplɛ ’léé ye bɛ,

⁶ dé wo diéra, ’té wa Kazambale Be gyɛna é ziin yiliblan ta yé wa yaragyɛwe bɔna a ma, bɛwemalé mi ’ka bɔa dale lɛ wo nya wo pa gi yé wo ’wo bli nɔla é dɛrɛ lo.

⁷ Dé féi do a, yé lɛɛ da a ta gɔnɔ kiɛre nya, ’té éé wɔraan ana tɛrɛ nya, yé a pazannu tɔnɔ ye a ma di, ’té é a féi lé Kazambale bɛ zin a a ta, a nya.

⁸ Naa, dé éé léliyilinu valé goligyɛné baan, ’té é a sɔnvɔma tɛrɛ lé, é vo sɛ yé wo bale pa a ma, a nya. Alé we é dan nyaa lɛ a kyɛblele nya.

Bli vole we lɛ éé ko dɔa plɛplɛ

⁹ An blibɔmamunu, dé ko a we fena ’ko zo‐oo, é ’ka dɔ lɛ ko gi léé, kazé a ’bɛ zo lo. É a ko gi léé, kazé a fɛan zo, Bale é dan bɔ lɛ ka va.

¹⁰ Naa, Kazambale ’ka weple kɛla lo. Ka nyanama pa fɛan zo, ’bɛ sele a Kazambale gi. Ka a gɔɔn léé, Kazambale tɔ sɔ ka lɛ, alé munu mawe kɛlɛle nya fɛan zo, ’té ka a kɛlɛna tan bɛ, ’bɛ sele a a gi.

¹¹ É sɔ ko lɛ léé, ka faa ’é vo a kɛlɛna ka sɔbɛla nya fɔɔ yé we lé ka bli ke a lɛ, yé ka a ye.

¹² É sɔ ko lɛ léé, té ka yuɛ gi é blan lo, naa, munu lé wo ke blivolɛdére lɛsɔɔle yena, blipale valé yarapalale nya, ’ka kɛlɛ bélé wo zo.

¹³ Kazambale blivolɛdére fe aan wo Abraam lɛ, fɛ do lé é ke blɛn yé é mini yeebozen ta, é ’ka ’bɛ ye lɛ yé é ’bɛ ’nyɔɔn lo, bɛwemalé é ’ébozen ’nyɔɔn,

¹⁴ yé é léé: Weboen nya, maa dan i drɔɔ vo lɛ é baba, yé maa dan i kulu kɛlɛ lɛ di.

¹⁵ ’Bɛ zo lé, dé Abraam a lɛbɛn yarapalale nya faa, yé fɛ lé Kazambale a fe blivolɛdére nya, yé é a ye.

¹⁶ Dé munu a yo blena, fɛ lé ke blɛn é mini wobozen ta, yee lé wa blé yo nya, yé yoblele éé wo dére kɛla sɔbɛlawe nya, yé éé zavɔle nyaan.

¹⁷ We ’ko ma lé Kazambale ébo ’nyɔɔn. Munu lé Kazambale blivolɛdére fe wo lɛ bɛ, Kazambale a a va léé, é a gɔɔn wo lɛ léé, we lé é a ma kunna ye, é ’ka nɔlaan lo, amalé é blivolɛdére kɛlɛ sɔbɛlawe nya ébo ’nyɔɔnle nya.

¹⁸ Yé we fié ’ko lé wo ’ka nɔlaan monomono lo, ’té Kazambale ’ka bɔaléé, é viéwo wo gi lo, woo plɛplɛ no kaa lɛ. Kaa lé, kaa kaa yɔɔna ye, we fié ’ko, woo plɛplɛ no kaa lɛ, yé yee yɔɔna lé é ke blivolɛdére lé Bale a fe kaa lɛ, a nya.

¹⁹ Bli vole we lɛ ’ko, é a kaa gi kaa bélimafɛ blɛɛn boen nya. Éé goo fɔɔ yé éé wɔraan Balebangikɔn gi, sɔ lé wa kɛlɛ kɔnmi nya, a zi, yé ’bɛ a la gi.

²⁰ Ana lé Jézu wɔra kaa ’lɛvlɛ nya, kaa ’lɛgana nya, yé é kɛlɛ Balebanmunu ’lɛzan nya, Mɛlkizédɛk dɔbɛ nya, yé wo ’ka a tavɔɔan é dɛrɛ lo.