Ébrunu 5 - Kazambale lé Sebe Sauunu 1979

¹ Naa, Balebanmunu ’lɛzan faa lé wo wo si munu méléna, woo wo dɔa Kazambale lé nyanamapazannu nya munu lé we ma, blan nɔle valé wenyanénu ma saraka bole Kazambale lɛ we gi.

² Balebanmunu ’lɛzan a mi tɔɔtɔɔ nya, bɛwemalé éé bɔa tanyilamunu valé mi sanlenu mawe dɔɔle lɛ.

³ É a blami nya, amalé é a lé é sarakanu bo ébo lé wenyanénu ma, bélé fɛan zo lé éé a boo munu lé wenyanénu ma, a zo.

⁴ Mi do kpen ’ka dɔna blɛn ’ko sié lo, ’té dé Kazambale ’ka a laa lɛ lo, bélé fɛan zo lé é Arɔn laa, a zo lo.

⁵ Yé Krist é ziin, é ’ka Balebanmunu ’lɛzan dɔna blɛn si lɛ éboan lo, naa, mi lé é a fe a lɛ léé: Bii a an be nya, Maa i yaa kyɔ, ’bɛzan ɛ dɔna ’ko nɔ a lɛ, ’bɛ gi léé, Bale ɛ nɔ.

⁶ Bale a fe é ziin léé: Bii a Balebanzan nya lɛɛ faa zé nya, Mɛlkizédɛk dɔbɛ yɛrama.

⁷ Bléyian va lé Jézu a blami nya, é bazoro yé é zanté vɔ Kazambale lé, éé bɔa a sile lɛ ga lee, a lɛ; é bazoro siaale plɛplɛ valé yuɛyi sole nya. Yé é pla Bale wuo é zima amalé Bale a ’ma.

⁸ Webozen nya, é a Bale Be nya, naa, duowo, alé nyanéblele ɛ lɛdɔmale paa a gi.

⁹ Gun si Bale Be ma aan wo, é kɛlɛ bélile lé a glɛ ’ka lo, a bɔrazan nya, munu lé wa lɛdɔama, wo lɛ.

¹⁰ Yé Kazambale bozen a dɔ Balebanmunu ’lɛzan nya Mɛlkizédɛk dɔbɛ yɛrama.

Té ka diéra lo

¹¹ Wenu lé maa a a va léé, maa fe ka lɛ we ’ko ma, wa di, naa, ka tɔné gi kɛlɛ yuyu amalé wo gi fele ka lɛ a tɔntɔn.

¹² Naa, ka lé ka namɔn, ’té é a kɔɔn léé, ka kɛlɛ wepaamigimunu nya, ka mawe a a gi léé, ’wo Kazambale lé we pélisiana vininnu paa ka gi é ziin. Ka kinin munu lé wo mawe ke a gi léé, ’wo nyɔ minian, ’té wo ’ka fɛ plɛplɛ va lo, wo nya.

¹³ Miomian éé nyɔ minian, we tegele dére ’ka a kunwo lo, naa, é a né kiéné nya.

¹⁴ Naa, fɛ plɛplɛ blele a munu lé wo tin, ’té wevasile wo kun, ’té a zin koo, a nyané koo, wa dɔɔ bɛ, wozé nya.