Ébrunu 4 - Kazambale lé Sebe Sauunu 1979

¹ Blivolɛdére lé Bale a fe léé, é dan élé flinle nɔ lɛ munu lɛ, ’bɛ dére ana é ziin tan, bɛwemalé ’ka kana, dé é da kle ka va mi kenu ma.

² Fɛan zo lé wo Wenéné ’ko fe kaa lɛ, a zo duo lé wa fe wo lɛ é ziin, naa, dére lé wa fe wo lɛ, é ’ka bɔ lɛ blipale ma munu lé wa ’ma, wo bli gi lo, bɛwemalé a tɔnɔ do kpen ’ka kɛlɛ lɛ wozé nya lo.

³ Naa, Bale a fe aan wo léé: ’É bli fli, amalé ’é ’ébo ’nyɔɔn léé, ’É ’ka dan ’élé flinle nɔ lɛ wo lɛ lo, flinle lé é a fe bɛ, kaa lé kaa bli vo a lɛ, kaa a ye. Weboen lé, é sia tɛrɛ bɔrale ma, Kazambale lé nyanama nyaa;

⁴ naa, Kazambale lé sɛbɛ yi sɔrafiézan lé we fe fɛdona ’ko zo, léé: A yi sɔrafiézan nya Kazambale flin élé nyanama ma. Yee kaan loo?

⁵ Yé sɛbɛ lé maa fe lao bɛ, ’bɛ ana é ziin. É léé: Maa ’ka dan anlé flinle nɔ lɛ wo lɛ lo.

⁶ Naa, duowo, mi kenu é dan flinle ’ko ye lɛ, yé munu lé wo Wenéné ’ko ’ma é vinin, wo ’ka bli vo lɛ a lɛ lo, amalé wo ’ka flinle ’ko ye lɛ lo.

⁷ Bɛwemalé Kazambale yi bɛ dɔ, yee lé ke kyɔ nya. Lɛɛ kiɛre giéle zuo é we fe David lɔlu nya, dére lé maa a fe ka lɛ lao bɛ, a nya. É léé: Kyɔ, dé ka a dére ’ma, Té ’ka tɔné gi kɛlɛ é yuyu lo.

⁸ Naa, dé é vo léé, Jozué flinle nɔ wo lɛ kɔɔn, ’té Kazambale ’ka a fé ’bɛ zuo léé, ’é yi bɛ dɔa lo.

⁹ Amalé yi sɔrafiézan lé flinle ana tan Kazambale lé munu zé nya.

¹⁰ Bɛwemalé mian é Kazambale lé flinle ’ko ye, éé nyanaan élé nyanamanu ma, bélé fɛan zo lé Kazambale nyana ézénu ma, a zo.

¹¹ Amalé kaabo tunu flinle ’ko yele we gi, léé, té mi do kpen é Juifinu lé Bale lɛgale a ma zuosona lo. Dé é a kɛlɛ, ’té éé saan.

¹² Naa, Kazambale dére a é yuɛma, yé a ’lɛ a, yé a ’lɛ mini gwɔun‐o gwɔun‐an a ’léé ke fié, a ta, yé éé wɔraan fɔɔ yé éé mi boen valé é léli kini‐é ékema, yé éé mi wɔlɛ vɔna é ke ’léénu valé mi zununu kinié ékema yé éé migiblinu lé we valé mi bɔn‐in bɔrɔlenu lé we va sié.

¹³ Kɛlɛfɛnu va fɛ do kpen ’ka é yɔɔle Kazambale lee lo, naa, wo faa a é porole, yé wo faa ta a é bɔrale mi lé é a lé kaa kaalé we zuo fe a lɛ, a yuɛ gi.

Jézu a Balebanmunu ’lɛzan nya

¹⁴ Kazambale be Jézu a kaalé Balebanmunu ’lɛzan lé é go lanu gi, a nya, amalé kaa vo gligli blipale lé kaa fe léé, é a kaazé nya bɛ, a gi.

¹⁵ Balebanmunu ’lɛzan lé é ’ka bɔaléé, é nyanai zén kaa lé kaa ke tɔɔtɔɔ, kaa ta lo, ’bɛzan ’ka kaazé nya lo. Naa, fɛan zo lé woo kaa gi daan, a zo duo lé wa é gi dan bɛ faa ma, yé é ’ka wenyané do kpen kɛlɛ lɛ duowo lo.

¹⁶ Bɛwemalé kaa bié zinblin sɔnɔ bɔn gi kinile nya ma, a nyanai zénle kaa ta we gi, yé dé we bɔ kaa ma bléyian va, yé é zin kɛlɛ kaa lɛ yé é bɔ kaa va.