Ébrunu 3 - Kazambale lé Sebe Sauunu 1979

Jézu mini Moizi lɛ

¹ Bɛwemalé, ka lé ka ke an bwenu nya Kazambale va, ’té é ka laa la gi bɛ, ’ka bɔn‐in bɔrɔ Jézu ma do. Bale a pa zia léé, kaalé blipale mawe lé kaa fé, ’é kɛlɛ a gi nwunvɔzan valé Balebanmunu ’lɛzan nya.

² Jézu é yara pa mi lé ’bɛ a dɔ nwunvɔzan valé Balebanmunu ’lɛzan nya bɛ, ’bɛlé we ta, bélé fɛan zo lé Moizi é yara pa we la élé munu faa méléna, a zo.

³ Naa, fɛan zo lé kɔndɔzan tɔ a é bɔle é mini kɔn bozen la, a zo duo lé wa ye léé, a yara a léé, ’wo Jézu tɔ bɔ é mini Moizi zé ta.

⁴ Dé é a kɔn‐o kɔn‐an nya, mi ɛ dɔ, naa, mian é fɛ faa kɛlɛ, yee lé é ke Kazambale nya.

⁵ Naa, Moizi kɛlɛ yarapawelazan nya Kazambale lé kɔn faa gi bélé miwuozan zo, yé we lé Bale é dan a fe lɛ, é kɛlɛ a gi wenayezan nya;

⁶ naa, Krist kɛlɛ yarapawelazan nya bélé mi be lé ke é plale ébo lé kɔn nwiin, a zo. Yé kaa a alé kɔn nya, ’té dé kaa bli vo é pale gligli, yé kaa bli vo we lé éé kaa gi nanaan, a lɛ, fɔɔ yé kaa bɔ a ’wuoplana.

Flinle ana Bale lé munu zé nya

⁷ Bɛwemalé Léli Sauun a fe ’ko zo, léé: Kyɔ, dé ka a dére ma,

⁸ Té ka tɔné gi kɛlɛ a ma é yuyu bélé fɛan zo lé ka tranu a kɛlɛ, yé wo nwa Bale ma, ’Té woo Bale gi daan bwi gi bléyian va, a zo lo.

⁹ Ka tranu an gi dan bwi gi Yé wo an bli tiéé nagini Yé wo an kɛlɛwenu ye lɛɛ yɔ fié wuo, té ka tɔné gi kɛlɛ é yuyu bélé wozé zo lo.

¹⁰ Yé é ziin, an bli gi kyɛ dɔ ’bɛ bléyi vamunu lé we ma, yé maa léé: Wo saanbli a wo gi yifaama; Wo ’ka anlé zinu dɔɔ lɛ lo.

¹¹ Bɛwemalé an bli fli yé maa anbo ’nyɔɔn léé, Maa ’ka dan anlé flinle nɔ lɛ wo lɛ lo.

¹² Bwenu, ’ka yuɛ pa kabozen va; bli nyané lé é ’ka vo we lɛ lo, té ’é kɛlɛ ka va mi do gi fɔɔ yé é diéra Bale yuɛmale zuo lo.

¹³ Naa, ’ka we pla ka ke lɛ yi faa do do ma, tu valé é kinile ma, té ka yi lɛbɛn lo, léé, té wenyané é dabli kɛlɛ ka va mi do kpen lɛ yé a tɔné gi é kɛlɛ yuyu lo.

¹⁴ Kaa bli a Kazambale lɛ é vinin fɛan zo, dé kaa bli vo a lɛ ’bɛ zo fɔɔ yé kaa bɔ a ’wuoplana, ’té kaa a Krist gizannu nya.

¹⁵ Dé Kazambale lé sɛbɛ a fe léé: Kyɔ, dé ka a dére ’ma, Té ka tɔné gi kɛlɛ a ma é yuyu bélé nwa Bale ma bléyi vamunu zé zo lo.

¹⁶ Wo lé wo nwa mi ma we ’male zuo, dé é ’ka munu faa lé wo si Éjipiti tɛrɛ la, ’té Moizi a wo ’lɛ, wo nya lo, ’té denu léé?

¹⁷ Dé é ’ka munu lé wo wenyané kɛlɛ, ’té wo galenu dia bwi gi, wo nya lo, ’té denu ma lé Kazambale bli fli lɛɛ yɔ fié wuoo?

¹⁸ Dé é ’ka munu lé wo Kazambale lɛgama, wo nya lo, ’té denu lɛ lé Kazambale ébo ’nyɔɔn léé, ’é ’ka dan ’élé flinle nɔ lɛ wo lɛ loo?

¹⁹ ’Ko zo lé ko yé léé, wo bli ’ka é pale lo, amalé wo ’ka bɔ lɛ flinle ’ko yele lɛ lo.