Ébrunu 2 - Kazambale lé Sebe Sauunu 1979

Kaa sile we gi a we blɛn nya

¹ Bɛwemalé, wenu lé kaa wo ’ma, é a lé kaa wo kɛlɛ kaa bli faa nya, dé wo da saan kaa gi.

² Naa, dére lé lanjenu a fe, dé a kɛlɛle lɛ sɔɔ, yé dé Bale we lɛdɔ ’é lɛgamamunu faa valé bélidɔwe sɛrɛzannu faa gi tegele, ’té kaa nii?

³ Dé kaa yara si silewegi blɛn ’ko zo ta, we é dan si lɛ kaa nwiin kaa? Mizan bozen ɛ silewegi ’ko lé we fe é vinin, yé munu lé wo we ’ko ’ma a ta, wo yee duo fe kaa lɛ é ziin,

⁴ yé Kazambale bozen wolé wenayedére dɔ plɛplɛ tɔmasenu koo, we blɛnblɛnnu koo, gyɛzorowe gɔnɔ faa koo, Léli Sauun lé blɛnu kɛlɛle élé blibɔmale nya koo, wo nya. Amalé, dé kaa yara si silewegi ’ko ta, we é dan si lɛ kaa nwiin kaa?

Kaa béliwe bɔrazan

⁵ Naa, tɛrɛ lé wo dan a kɛlɛ lɛ, ’té ko ke alé we fena bɛ, Kazambale ’ka lanjenu pla lɛ a nwiin lo.

⁶ Naa, mi do a fe fɛdona léé: Blami a mɛ fɛ nya yé ’bɛ sele éé dɔa i gii? Taa, blami be a mɛ fɛ nya yé i ’bɛ mawe kɛlaa?

⁷ Bé kɛlɛ kiéné é mini lanjenu ta bléyi sɛ nya, I fuasan valé tɔbɔle nɔ a lɛ plale mi nwiin tɔmase nya.

⁸ Yé i fɛnu faa pla a wuo. Naa, dé wa fe léé, Bale fɛnu faa pla mi wuo, ’bɛ gi léé, fɛ lé é ’ka a pla lɛ a wuo lo, é ’ka lo. Naa, duowo, ko ’ka tan a ye lɛ léé, fɛnu faa a é plale a wuo lo.

⁹ Fɛ lé ko yé, yee lé ke Jézu nya. Jézu kɛlɛ kiéné é mini lanjenu ta bléyi sɛ nya, yé sin ko a yé, ’té fuasan valé tɔbɔle a a lee, plale mi nwiin tɔmase nya, ga lé é a wo, a we ma. Kazambale lé zin nya lé é mi faa gi ga wo.

¹⁰ Naa, Kazambale lé, fɛnu faa ke azé nya, ’té é wo faa kɛlɛ bɛ, é sɔ a lɛ léé, mi kiɛre ’é kɛlɛ ’é benu nya yé ’é wo kɛlɛ fua nya, yé é a é zima léé, mi lé é wo béliwe bɔra bɛ, Kazambale ’é gun si a ma alé nyanéblele nya.

¹¹ Naa, mi lé éé munu kɛla sauun, é valé munu lé é wo kɛlɛ sauun, wo faa si gɔnɔ do kpen gi. Bɛwemalé, é ’ka yara gya wo laale ma é zuanénu lo.

¹² Naa, é a fe ’ko zo léé: Maa dan i tɔ bɔra lɛ an zuanénu va; Maa dan i tɔ zin fe lɛ zén‐ékevamunu va.

¹³ Yé é ziin, é léé: Maa dan anbozen bɛ pa lɛ i lee. Yé é lé é ziin léé: Maa lo; maa valé nénu lé Kazambale wo nɔ an lɛ, ko lo.

¹⁴ Naa, kɔlɛ lé nénu éé sié a nya wo ti valé wo bu va, yee kɔlɛ duo nya lé Jézu da. Yé a gale nya lé, mi lé gale lé plɛplɛ ke a lee, ’bɛ gi léé, yonufaatagɔné, yé é ’bɛzan kulu ga,

¹⁵ yé munu faa lé wo kɛlɛ luunu nya wolé tɛrɛla faa gi kanale ga lee we ma, yé é ’bɛnu si we gi.

¹⁶ Naa, webozen nya, lanjenu va‐an é da bɔ lɛ lo; naa, Abraam kulu va lé é da bɔ lɛ.

¹⁷ Bɛwemalé é a lé é kɛlɛ é zuanénu zo we faa gi, léé, ’é kɛlɛ Balebanmunu ’lɛzan lé a nyanai éé zén‐é ’té éé yara paan we la, a nya Kazambale lé nyanama gi, munu lé wenyanénu ’yibole we ma.

¹⁸ Naa, wo Jézu gi dan, yé é nyané ble a we ma, amalé sin, munu lé wa wo gi danna, é bɔalɛ léé, é bɔ wo va.