Ébrunu 13 - Kazambale lé Sebe Sauunu 1979

We lé a kɛlɛle sɔ Kazambale lɛ

¹ ’Ka yara pa bwenu lɔrɔpale ta.

² Té ka gi é san bɛn sile ma lo. Naa, a kɛlɛle nya lé mi kenu yiana nɔ lanjenu lɛ, ’té wo ’ka a gi dɔɔa léé, wa lanjenu nya lo.

³ Bokɔngimunu sele ’é dɔ ka gi ma, bélé ka ɛ ke bokɔn gi. Munu lé woo nyané blé, wo sele ’é dɔ ka gi ma, bélé ka ɛ ke nyané ’ko blena.

⁴ Munu faa ’é kalé le sile valé bo sile tɔ zin fe ma; té kalé yialafɛ tiri ’é dɔ lo ma. Naa, pɛnpɛnnégyɛzannu koo, le bɛ valé gɔné bɛ ginizannu koo, Kazambale é dan wolé we ble lɛ.

⁵ Té ka tawo gɔɔli sɔle ka lɛ yɛrama lo; fɛnu lé wo ke ka lee, ’wo fɛnu lɔrɔ si ka ma ma. Naa, Kazambale bozen a fe léé: Maa ’ka dan i vo lɛ é pla monomono lo; yé maa ’ka dan sɔn vɔ lɛ i ma pelo.

⁶ Bɛwemalé, kaa bɔa a fele lɛ webozen nya léé: Mizambale éé bɔa an va, an ’ka dan kana lɛ fɛ do kpen lee lo; Mɛ lé blami é bɔa a kɛlɛle lɛ an lɛɛ?

⁷ Ka zilɛzannu lé wo Kazambale dére fe ka lɛ é vinin bɛ, wo sele ’é dɔ ka gi ma, wo wolé tɛrɛla nyaa fɛan zo, ’ka bɔn‐in bɔrɔ ’bɛ ma; kalé blipale ’é kɛlɛ bélé wozé zo ma.

⁸ Jézu Krist a é dɔbɛ duo gi yese, kyɔ, lɛɛfaama, a glɛ ’ka lo.

⁹ Té ka we paale dɛrɛ bɛnu nyi si lo. Naa, mi bli dɔle gligli zin nya fila vɔ é mini fɛblelenu lé, wo tɔnɔ ’ka é blemunu ma lo, wo ta.

¹⁰ Kaalé balebanna do a; munu lé woo nyanama paan sɔkɔn gi, a se ’ka wo lɛ léé, wa ta fɛ ble lo.

¹¹ Winu lé Balebanmunu ’lɛzan éé goo wo nyɛ nya fɛna sauun na wenyané ’yibofɛ nya, woo wo kyɛ blé fla gini ma.

¹² Bɛwemalé Jézu é ziin, munu kɛlɛle sauun abozen nyɛ nya we gi lé é nyané ble flan nwun zi.

¹³ Bɛwemalé, kaa go a va fla nwun zi mi; yaragyɛwe lé é ’wuo dɔ a wuo, kaa ’wuo dɔ yee duo wuo ma.

¹⁴ Kaa nyanalafla ’ka tɛrɛ la ’ko lo. Naa, fla lé é dan da lɛ bɛ, a ’lɛ lé kaa ke a vɔna.

¹⁵ Jézu lé we ma lé kaa Kazambale tɔ zin fele boo saraka nya Kazambale lɛ yifaama. Kaa lɔlunu lé wa tɔ bɔraan gɔrɔ la, wolé saraka lé.

¹⁶ Yé té ka gi é san wezin kɛlɛle valé fɛ nɔle kiɛre ma lo ma; a zo sarakanu lé Kazambale éé wo ban‐ɛn blé.

¹⁷ ’Ka ka zilɛzannu lɛdɔma, yé ’ka ’wuo dɔ wo wuo ma; naa, wa ka boennu tabinna, yé wa gi dɔɔ léé, Bale é dan a zuo laa lɛ ’wo lee, amalé wa kɛlɛna ’bɛ yɛrama. Ka kɛla fɛan zo yé wo ka tabin ginanale nya yé é ’ka kɛla wo ma gi kyɛ nya lo, ’ka kɛlɛ. Dé wo bli kyɛ dɔ ka tabinle we ma, ’té kazé tɔnɔ ’ka lo.

¹⁸ ’Ka bazoro kolé we ma; é sɔ ko lɛ léé, ko we faa kɛlɛ tegele, amalé é dɔ ko gi léé, kolé wevasibli ’ka we dɔna ko nwiin lo.

¹⁹ An bli faa nya lé, maa léé, ’ka kɛlɛ ma, an gole ka va é ziin é kele we gi.

²⁰ Mi vo drɔɔ Bale lé é ’Blatabinzan blɛn, Kaazan Jézu si gamunu va, yé é da a nya é ziin, gipawe lé é ’ka nyaan lo, a dɔ plɛplɛ nyɛ nya bɛ,

²¹ ’é ka bɛ sɔ we zinnu faa kɛlɛle nya ’é blibɔmawe lɛsɔɔle we gi ma; yé we lé é sɔ a lɛ, ’é yee ɛ kɛlɛ ka gi Jézu Krist nya ma; ’wo fua nɔ a lɛ lɛɛ faa ma, té a glɛ é dɔ lo. Amɛɛn.

²² Bwenu, kalé zanté, we lé maa pla ka lɛ ’ko, ’ka ’ma ma; naa, sɛbɛ lé maa a gyɛ ka lɛ, sɛbɛ tégéléné lé.

²³ Ka a gi dɔɔ léé, wo daan kaa bwe Timoté ma. Dé é da an va é kele, ’té maa valé yee é dan go lɛ ka va.

²⁴ An we ka zilɛzannu faa va, é valé Kazambale lé munu faa va. Itali tɛrɛ la munu we ka va.

²⁵ Kazambale ’é ka faa drɔɔ vo ma.