Ébrunu 12 - Kazambale lé Sebe Sauunu 1979

Kazambale éé we lɛdɔa kaa gi

¹ Kaa zi gunu a é dɔrale ’bɛ zo wenayemunu kiɛre nya bélé lati zo, bɛwemalé kaa é ziin, fɛnu lé woo kaa bɛn dɔa, kaa wo faa pla ma, yé kaa sɔn vɔ wenyanékɛlɛbli ma, yé kaa vlan buru kaa yarapalale nya vlan za kɛlɛna lé, a lɛ ke é sole kaa ’lɛ bɛ, ana ma,

² ’té kaa yuɛ a Jézu lɛ téiin, yee ɛ ke kaalé blipale ti valé a lɛsɔɔzan nya. Ginanale lé ke a ’lɛ mi bɛ, a yele we ma lé é nyané ble yiliblan ta, yé é yaragyɛwe ye we pla nya, yé é nyana Kazambale lé fuablin bɛyilazia.

³ Mi lé wenyanékɛlɛmunu dɔ a ma plɛplɛ yé é ’wuo dɔ wo wuo, ’ka bɔn‐in bɔrɔ ’bɛzan ma; ’bɛ é dan bɔ lɛ ka va, ’té ka wɔlɛ gi ’ka nyaa ka ma lo, ’té ka fuu ’ka sié ka ta lo.

⁴ Ka a guli danna wenyané ma, naa, ka ’ka tan dɔ lɛ a ma plɛplɛ fɔɔ yé ka nyɛ é so lo.

⁵ We lé Bale a pla ka lɛ, ka gi san ’bɛ maa? É we pla ka lɛ bélé é benu zo, yé é léé: An be, dé Mizambale we lɛdɔ i gi, té bé ye boawe nya lo, Yé dé é we pla i lɛ, té i fuu é si i ta lo ma.

⁶ Naa, mi lé é sɔ Mizambale lɛ, éé we lɛdɔa a gi, Yé munu faa lé éé wo yé é benu nya, éé wo blaan vlewɔlɛ nya.

⁷ ’Ka ’wuo dɔ welɛdɔle ka gi wuo. Ka a Kazambale benu nya, amalé éé a kɛla ka lɛ a zo. Naa, né lé a ti ’ka we lɛdɔa a gi lo, ’bɛzan a kyɛɛn?

⁸ Dé wo ’ka we lɛdɔa ka gi bélé fɛan zo lé munu éé we lɛdɔa ’wolé nénu gi, a zo lo, ’té ka a bwɛlanénu nya; ’té ka ’ka be bozennu nya lo.

⁹ É ziin, kaa tinu éé we lɛdɔa kaa gi tɛrɛ la ’ko, ’té kaa wo lɛdɔama, naa, é ’ka lé kaa pla é ziin kaa lagi Ti wuo, vole é yuɛma we gi loo?

¹⁰ Kaa tinu éé we lɛdɔa kaa gi bléyi ke nya, wa ye é zima kaazé nya fɛan zo, a zo, naa, Kazambale éé we lɛdɔa kaa gi wezin kɛlɛle kaa lɛ we ma yé kaa kɛlɛ sauun ’é zo.

¹¹ A pélisiana, welɛdɔle mi gi a bligikyɛ?-?dɔwe nya, é ’ka ginanawe nya lo, ’bɛ a webozen nya, naa, é voéla, munu lé welɛdɔle wo gi wo kun, wo kɛlɛle tegele valé wolé tɛrɛla néné é dan kɛlɛ lɛ a ma tɔnɔ nya.

Té ka diéra lo

¹² Bɛwemalé, ka bɛ lé wo ke é zanale ka ma, É valé ka powuo lé wo wɔlɛ gi nyaa, ’ka wo dɔ plɛplɛ,

¹³ yé ’ka tawo zi drɔle ta yé kalé tun?-?boganenu é dan béli lɛ, yé ka powuo?-?wɔlɛ ’ka dan so lɛ é ke ’léé lo.

¹⁴ ’Ka kwa kuli yé ka vo mi faa va drɔɔ, yé ’ka kɛlɛ sauun. Dé mi ’ka kɛlɛ lɛ sauun lo, é ’ka dan Mizambale ye lɛ lo.

¹⁵ ’Ka yuɛ pa kabozen va, léé, té mi do é vuru Kazambale lé zin ma lo; mi sɛrɛwenu lé woo blan sié é kele bɛ, té wo wɔra ka méléna yé wo gi bɔrɔ pa mi ma yé mi kiɛre é sɛrɛ lo.

¹⁶ ’Ka yuɛ pa kabozen va, té pɛnpɛnnégyɛzan é kɛlɛ ka méléna lo; mi lé Balebɔwe ’ka a ma lo bélé Ézau zo, té ’bɛzan ’é kɛlɛ ka méléna lo. É dɔna dan fɛ pala do kpen va.

¹⁷ Ka a gi dɔɔ léé, é voéla é sɔ aan wo Ézau lɛ léé, ’é ti ’é drɔɔ vo, é a ma laa yuɛyi bɔrale nyaoo, wean éé ’bɛ kɛla yé a ti é dére nɔla, é ’ka ’bɛ ye lɛ lo, yé wo sɔn vɔ a ma duowo.

¹⁸ Ka ’ka é bielé tɛrɛla gɔ lé mi a yé, ’té kyɛ éé blé a nwiin bɛ, a sɔnɔ lo; lati koo, gunutinu koo,

¹⁹ fu plɛplɛ koo, béli vun koo, dére plɛplɛnu lé, dé munu a ’ma, wo léé, té ’wo ’bɛ zo dére bɛ ’ma lo, ’bɛ koo, ka ’ka é biéle wo sɔnɔ lo.

²⁰ Gɔ sɔnné lé wa pa léé, té wo mane a ma lo, dé é a wi nyaoo, dé é mane gɔ ma wa gyɛ gɔlɛ nya, ’bɛ kɛlɛ wo ma plɛplɛ.

²¹ Yé we lé é kɛlɛ wo yuɛ va bɛ, é a kana zén migiwe nya fɔɔ yé Moizi léé, ’bɛ kana blɛn valé gligli zén é gi.

²² Naa, ka a é biéle Siɔn gɔ sɔnɔ, Bale yuɛmale lé fla lé ke lagi Jérusalɛm nya koo, lanjenu kiɛre lé wo nɔnɔ ’léé ’ka lo, ’té wa fɛti kɛlɛna bɛ, woo koo,

²³ Kazambale lé né vininzannu lé wo tɔ ke é gyɛle lagi mi, wo zénle ékeva koo, Bale lé ke mi faa lé weblezan nya bɛ, yee koo, munu tegele lélinu lé gun ke é sile wo ma bɛ, wo koo,

²⁴ Jézu lé é ke gipawe dɛrɛ gizan nya, yee koo, Jézu nyɛ lé é nwɛɛn yé a zuowe fila vɔ é mini Abɛl zé ta bɛ, yee koo, wo sɔnɔ lé ka ke é biéle.

²⁵ ’Ka yuɛ pa kabozen va, mi lé ke we fena ka lɛ, té ka sɔn vɔ a dére ma lo. Munu lé wo sɔn vɔ Moizi lé é we fe wo lɛ tɛrɛ la ’ko, a dére ma, dé Bale we lɛdɔ wo gi ’naan, ’té kaa nii? Dé kaa sɔn vɔ mi lé é ke we fena lagi loru bɛ, ’bɛzan dére ma, Bale ’ka dan we lɛdɔ lɛ kaa gi loo?

²⁶ Bale dére tɛrɛ ma nyɔɔn é vinin, yé sin é lé kaa lɛ léé, é dan fɛnu ma nyɔɔn lɛ é ziin gɔnɔ do, tɛrɛ saa kaan lo, la koo é ziin.

²⁷ Yé é ziin, gɔnɔ do lé é a fe bɛ, ’bɛ gi léé, a kɛlɛfɛnu lé wo ma é dan nyɔɔn lɛ é dan wo si lɛ ana, a koɛnu lé wo ma ’ka dan nyɔɔn lɛ lo, wo vole ana we gi.

²⁸ Naa fuatɛrɛ lé ke kaazé nya, ’bɛ ma ’ka dan nyɔɔn lɛ lo, amalé kaa Bale bɔ vɔ yé kaa bɔ a bɔbɛ lé é sɔ a lɛ, a nya, a lɛdɔmale valé kanale a lee nya.

²⁹ Naa, kaalé Bale a é ziin kyɛ lé éé fɛ faa blé, a nya.