Ébrunu 11 - Kazambale lé Sebe Sauunu 1979

Blipale

¹ Fɛnu lé mi bli ke wo lɛ, blipale ɛ wo yé; fɛnu lé mi ’ka wo yé lo, blipale ɛ ke wo nagɔɔnzan nya.

² Munu vininnu lé blipale ma lé wo tɔ ye.

³ Blipale nya lé kaa a gi dɔɔ léé, Kazambale tɛrɛ kɛlɛ é dére nya, amalé fɛnu faa lé kaa yé kaa yuɛ nya ’ko, wo ’ka é kyɛn lo, naa, Bale dére ɛ wo bɔra.

⁴ Blipale nya lé saraka lé a zima mini Kain zé ta, Abɛl a bo Kazambale lɛ. Bɛwemalé wa ma we fe léé, é a mi tegele nya, yé é ziin Kazambale é ban‐ɛn ble; alé blipale lé we ma lé, Abɛl gaoo, ’té éé we fé duowo.

⁵ Énɔk lé blipale nya lé Kazambale a sia yé é ’ka ga lɛ lo. Kazambale ɛ a sia aléwemalé wo ’ka a ye lɛ é dɛrɛ lo; naa, a siale ’lɛ, wa ma we zin fe léé, é sɔ Kazambale lɛ,

⁶ naa, dé mi bli ’ka Kazambale lɛ lo, ’bɛzan ’ka bɔa sɔle lɛ Kazambale lɛ lo. Naa, mian éé biéan Kazambale sɔnɔ é a lé é pa a ta léé, Bale a, yé munuan wa naginina é a wo goolipazan nya.

⁷ Kazambale tɛlɛ tɛlama we fe aan wo Noé lɛ, kana zén a gi, yé blipale nya lé é ’yitagoro do kɛlɛ yee valé é kulu sile we gi we ma; alé blipale nya lé é we dɔ tɛrɛlamunu nwiin, yé kɛlɛle tegele lé mi a yé blipale ma, é a ye ézé nya.

⁸ Kazambale Abraam laa aan wo, é Bale lɛdɔma yé blipale nya lé é go fɛana lé é dan tɔnɔ ble lɛ, ana, yé fɛ lé é ’ka ana dɔɔa lo, é go ana.

⁹ Tɛrɛ lé Bale a ma blivolɛdére fe Abraam lɛ léé, é dan kɛlɛ lɛ azé nya, é vo ’bɛna bélé bɛn zo, yé é nyana sɔkɔn wuo blipale nya. A zo duo lé Izak valé Jakɔb a kɛlɛ; Kazambale blivolɛdére duo fe ’bɛnu lɛ yé ’bɛnu kɛlɛ tɔnɔblezannu nya Abraam va.

¹⁰ Fla blɛn lé, a gane ke é vɔle gligli, ’té Kazambale ke a ninikinizan valé a pazan nya bɛ, ’té éé ’bɛ lɛbɛn‐é.

¹¹ Mi lé é blivolɛdére fe, Sara é bli vo alé yara pale we la lɛ, amalé Sara bozen kɛlɛ é kwaoo, alé né bɔ kɛlɛle lɛ duowo alé blipale ma.

¹² Bɛwemalé, mi do kpen lé a kɔlɛ kɛlɛ é kwakwa é pia nya, a kulu kɛlɛ kiɛre, bélé monénénu zo di, bélé wɛyigɔɔnma nyéné lé wo ’ka bɔa a nɔnɔle lɛ lo, a zo di.

¹³ Wo faa ga, ’té wo bli a we lɛ, dɔlé ’té fɛnu lé Bale a ma blivolɛdére fe wo lɛ, wo ’ka a ye lɛ lo, naa, wo wo ye baa mi, yé wo wo sɛɛn vɔ yé wo léé, ’wa bɛnnu valé giézannu nya béera ’ko.

¹⁴ Munu lé wo ke we fena ’bɛ zo, wa nagɔɔnna léé, ’wa ’wo nyanatɛrɛ naginina.

¹⁵ Tɛrɛ lé wo si a ta, dé é vo léé, a sele a wo gi, ’té zi a wo lɛ léé, wo go ana é ziin.

¹⁶ Naa, sin, tɛrɛ zin baba do ma lé wo bli bɔ, ’bɛ ɛ ke lagi tɛrɛ nya. Bɛwemalé yara ’ka Kazambale gya ébo laale ma wolé Bale lo, naa, é fla blɛn do pa wozé nya.

¹⁷ Bléyian va lé Kazambale Abraam gi dan, blipale nya lé é é be wɔlɛ do kpen Izak nɔ saraka nya; Abraam lé, Bale blivolɛdére fe a lɛ léé,

¹⁸ Izak gi lé i kulu é dan kɛlɛ lɛ, yee Abraam ɛ é be nɔ saraka nya.

¹⁹ É dɔ Abraam gi léé, Kazambale a plɛplɛ fɔɔ yé é munu nwa gale va, amalé é be ye é ziin é yuɛma bélé é nwa é wo gale va.

²⁰ Blipale nya lé Izak Jakɔb valé Ézau drɔɔ vo, wenu lé wo dan bɔ lɛ, wolé we ma.

²¹ Blipale nya lé bléyian va lé Jakɔb ke gana é Jozɛfu be fiénu drɔɔ vo do do yé é Kazambale bɔ, ’té é a é kunle élé tawomayili ma, ’té a puo a é dɔrale a ’léé.

²² Blipale nya lé, bléyian va lé Jozɛfu ke gana, é Izraɛl lé nénu fwiwe fe, yé wean é a lé wa kɛlɛ a wɔlɛnu nya, é a fe wo lɛ.

²³ Moizi yaabléyi va, a ti valé a bu a ye aan wo léé, é a é zima, yé wo ’ka kana lɛ minwiinzan blɛn lé bélidɔwe lee lo, amalé wa yɔɔ blipale nya moné yaa.

²⁴ Moizi kɛlɛ aan wo segele, blipale nya lé é léé, té wo ’é laa Faraɔn lu be é dɛrɛ lo.

²⁵ Nyanéblele Kazambale lé munu va sɔ a lɛ é mini wenyané kɛlɛle ma gi nanale ta bléyi sɛ nya.

²⁶ A sɔnɔ lé wa wo Krist lé we ma, é a ye fuafɛ blɛn nya é mini Éjipiti fuafɛnu ta, naa, a bli a é gooli lɛ tegele.

²⁷ Blipale nya lé é si Éjipiti tɛrɛ la, yé é ’ka kana lɛ minwiinzan blɛn lé bliflile lee lo, naa, é dɔ gligli, bélé fɛan zo lé mi lé wo ’ka a yé lo, éé ’bɛ yé, a zo.

²⁸ Blipale nya lé é Taboyi lé fɛti kɛlɛ yé é wi nyɛ nwɛɛn, té migyɛzan é mane Izraɛl lé né vininzannu ma lo we gi.

²⁹ Blipale nya lé wo gié Wɛyi Sɔɔn méléna bélé tɛrɛ gale la zo, naa, Éjipitinu a a va léé, ’wo ’é a kinié, yé é wo mini.

³⁰ Blipale nya lé wo Jériko zi gɔrɔ zana, wo giéle a zi yi sɔrafié nya.

³¹ Blipale nya lé gɔnegini le Raab ’ka ga lɛ tɔnégiplɛplɛzannu va lo, naa, é mimavɔɔzannu si é zima, ’bɛzama.

³² A kyɛn lé maa dan a fe lɛ é ziin? Mi pɔnénu zé gi febléyi ’ka an lee lo; Jédéɔn koo, Barak koo, Samsɔn koo, Jɛfeté koo, David koo, Samuɛl valé balelayemunu koo, wozé gi fe bléyi ’ka an lee lo.

³³ Blipale nya lé wo bɛntɛrɛnu kele, wo we tegele kɛlɛ, wo dɔ blivolɛdérenu ta, wo golizranu lɔlu lɛ tan;

³⁴ wo kyɛ plɛplɛ diri; wo so gwɔun lɛzan lee; wo ’wo ma gyɛnu kele; wo kɛlɛ nyanazannu nya guli danna; wo bɛn bɛnu lé sunyanu bin.

³⁵ Lomu ’wolé mi ke ye é nwale gale va é ziin; a kenu ’wobo nɔ nyanéblele lɛ; wo ’ka a nyi si lɛ léé, ’wo sɔn vɔ ga ma monomono lo, nwale gale va bozen yele we gi.

³⁶ A kenu wo ’wuo dɔ ’wo ma we nanalenu koo, plén koo, gɔgɔbalenu koo, bokɔn koo, wo wuo.

³⁷ Wo wo gyɛ gɔlɛ nya, wo wo bɔi siinu nya; wo wo gi dan; wo wo gyɛ gwɔunnu nya; wo vo nɔɔna ’bla?-?kɔlɛnu valé bolikɔlɛnu nya ’wo ta; wo vuru fɛ faa gi; wo nyané ble; wo kle ble;

³⁸ a yara ’ka tɛrɛlamunu yara léé, blipamunu ’é vo wo va lo; wo kɛlɛ nɔɔzannu nya bwinu gi valé gɔnu nwiin, wo vo gɔlɛkoronu valé gurunu gi.

³⁹ Wo faa bɛ, wo wo tɔ bɔ wo bli vole we lɛ ma, naa, fɛnu lé wa ma blivolɛdére fe wo lɛ, wo ’ka a ye lɛ lo,

⁴⁰ naa, Kazambale wezin tadɔ kaazé nya, yee lé ke léé, té gun ’é si wo ma kaa ’lɛ lo.