Ébrunu 10 - Kazambale lé Sebe Sauunu 1979

¹ Bélidɔwe a bélé fɛfoto zo. Mi ’ka tɛlɛ tɛlama wezin boen yé a gi lo. Bélidɔwe ɛ fe léé, ’wo sarakanu duo bo lɛɛ do do faa ma, naa, munu lé woo Kazambale bɔa ’bɛ zo, bélidɔwe ’ka gun sié wo ma lo.

² Dé é vo léé, é gun si munu ma ’naan, ’té wo ’ka daan lɛ saraka bole ma loo? Dé é vo léé, wo Bale bɔa ’bɛ zo yé wenyané é si wo lee gɔnɔ do lɛɛ faa zé nya ’naan, ’té wolé wevasibli é dan we dɔ lɛ wo nwiin é dɛrɛɛ?

³ É ’ka kɛlɛ lɛ ’bɛ zo lo; saraka bole éé mi lé wenyané sele dɔa é gi lɛɛ faa do do ma;

⁴ dirigɔné valé boligɔné nyɛ ’ka bɔa wenyané sile lɛ munu lee lo, azama.

⁵ Bɛwemalé, bléyian va lé Krist da tɛrɛ la, é léé: Saraka koo, blan koo, bii Bale léé, ’é ’ka wo do va lo, Naa, i kɔlɛ do kɛlɛ anzé nya,

⁶ I bli ’ka bɔ lɛ balebanwi lé wa kyɛ blé, é valé wenyané ’yibo sarakanu ma lo;

⁷ Yé maa léé: Oo Bale, bé ye, an da ilé blibɔmawe kɛlɛle we gi, Wo anlé we gyɛ a zo sɛbɛ lé wa plin‐an, a gi.

⁸ É vinin Krist léé: I bli ’ka bɔ lɛ sarakanu koo, blannu koo, balebanwi lé wa kyɛ blé koo, wenyané ’yibo sarakanu koo, wo ma lo, yé wo ’ka sɔ lɛ i lɛ lo, dɔlé ’té wo wo nɔ bélidɔwe yɛrama.

⁹ Yé ’bɛ zuo é léé, bé ye, ’é da ilé blibɔmawe kɛlɛle we gi. ’Bɛ zo lé é we vininzan yi ga, yé é a fiézan kɛlɛ ’bɛ pa gi.

¹⁰ Kazambale lé blibɔmawe lé é a fe bɛ, a lɛsɔɔle nya lé kaa kɛlɛ sauun; Jézu ébo kɔlɛ nɔ saraka nya gɔnɔ do kpen lɛɛ faa zé nya, azama.

¹¹ Balebanmunu koɛnu éé dɔa yi faa do do ma balebanna, ’té saraka duonu lé wo ’ka bɔa wenyané sile lɛ mi lee monomono lo, ’té wa boo yifaama.

¹² Naa, Balebanzan ’ko zé a é yɛrama. É wenyané ma saraka bo gɔnɔ do ’té, ’bɛ zuo, é nyana Kazambale bɛyila yé é a yifaama é nyanale ’bɛna,

¹³ ’té éé nyanémunu plale é wuo lɛbɛn‐é.

¹⁴ Naa, munu lé é wo kɛlɛ sauun é gun si wo ma lɛɛ faa zé nya saraka do kpen bole nya.

¹⁵ Léli Sauun a yee we duo nayezan nya yé é léé:

¹⁶ Mizambale léé: Gipawe lé maa dan a kɛlɛ lɛ wo va, yee lé é ke ’ko: Yi ’konu zuo Maa dan anlé bélidɔwenu pa lɛ wo bli gi, Yé maa dan wo pa lɛ wo ’wuo gi. ’Bɛ zuo é lé é ziin léé:

¹⁷ Yé wolé wenyanénu valé wolé weplenu sele ’ka dan dɔ lɛ an gi é dɛrɛ lo.

¹⁸ Naa, dé Bale mian ma we vo élé wenyané ma, ’bɛzan ’ka saraka boo é dɛrɛ lo.

Kaa bié Bale ma ma, yé kaa dɔ gligli

¹⁹ Bɛwemalé bwenu, Jézu nyɛ lé we ma lé a zi a kaa lɛ léé, kaa wɔra fɛna sauun tinle na, ’té kana ’ka kaa gi lo.

²⁰ Jézu ɛ zi ’ko pla kaa lɛ; zi dɛrɛ lé, mibélizi lé, yé éé goo Bale lé kɔn gi sɔ lé wa kɛlɛ kɔnmi nya, a zi. Sɔ ’ko ɛ ke a kɔlɛ nya.

²¹ Naa, Balebanmunu ’lɛzan lé wa dɔ Kazambale lé kɔn nwiinzan nya, é a kaazé nya.

²² Bɛwemalé kaa bié bli do valé blipale bozen nya ma, ’té kaa bli gi a fu, ’té gi kɔun ’ka kaa ma lo, ’té kaa kɔlɛ a é zurule ’yi zima nya.

²³ Naa, mian é blivolɛdére ’ko fe, azan a yarapawelazan nya, bɛwemalé we lé kaa fe léé, kaa bli a a lɛ, kaa kun a ma kaa bɛ fié nya ma.

²⁴ Kaa kaa ke bɛ dɔ plɛplɛ mi lɔrɔpale valé wezin kɛlɛle gi; we ’ko sele ’é dɔ kaa gi yifaama ma.

²⁵ Té ka sɔn vɔ ka zénle ékeva ma lo, bélé fɛan zo lé mi kenu ke a kɛlɛna, a zo lo, naa, kaa we pla kaa ke lɛ, yé dé kaa a ye léé, Jézu dayi bɔ é pu, kaa ’bɛ kɛlɛ é ziin é baba ma.

²⁶ Naa, dé kaa webozen dɔɔ faa yé ’bɛ zuo kaa wenyané kɛlɛ kaabo yuɛ va, ’té kaalé wenyané ma saraka ’ka lo,

²⁷ naa, ’té weblele valé kyɛ plɛplɛ lé é dan tɔnégiplɛplɛzannu ble lɛ bɛ, ’té yee lé kaa ke a lɛbɛnna kaa zuru va nyɛ kinile blɛɛn nya.

²⁸ Mi lé é Moizi lé bélidɔwe sɛrɛ, dé wa gya wenayezan fié valé yaa dére ta yé wo nyanai ’ka zén‐é a ta lo,

²⁹ ’té é dɔ ka gi kaa? Dé mian é Kazambale Be kɛlɛ naanaazan nya, yé gipawe dɔ plɛplɛ nyɛ lé ’bɛ a kɛlɛ sauun bɛ, é ’bɛ ye boawe nya, yé é zin Léli sɔnɔ, a yara ’ka lé Bale é we lɛdɔ ’bɛzan gi welɛdɔle mi gi tɔntɔn bozen nya loo?

³⁰ Naa, mi lé é a fe léé: Maa ɛ ke welɛgipazan nya, Maa ɛ we lɛdɔa mi gi, kaa ’bɛzan dɔɔ. Yee ɛ fe é ziin léé: Mizambale é dan élé munu lé we ble lɛ.

³¹ Vɔle Bale yuɛmale lee a we tɔntɔn kaii nya.

³² Bléyian va lé ka bɔn‐in kini, wenu lé ka kɛlɛ ’bɛ bléyi va, a sele saan ka gii? Ka kle blɛɛn ble yé ka dɔ gligli duowo.

³³ A bɛ do la, munu yaragyɛwe bɔ ka ma gɔrɔ la, ’té ka kle blé; yé a bɛ do la, ka pa munu lé wo ke yee nyané duo blena, wo va.

³⁴ É ziin, ka nyanai zén bokɔngimunu ta, yé dé wo kalé fɛnu si ka lee, ka gi nana ’bɛ ma, naa, ka gi dɔɔ léé, fɛ zin babanu lé wo ’ka nyaan lo, wa ka lee.

³⁵ Amalé sin, té ka bli si we lɛ lo. Kalé blivole we lɛ ma gooli a blɛn.

³⁶ We lé ke ka mawe nya, yee lé ke léé, ’ka kɛlɛ yarapawelazannu nya, yé dé ka Kazambale lé blibɔmawe lɛ sɔɔ faa yé fɛ lé Kazambale a fe léé, é dan a nɔ lɛ ka lɛ, yé é a nɔ ka lɛ.

³⁷ Naa, é ’ka vo lɛ yi kiɛre nya lo, é vo kiiéné yé mi lé é a lé é da, é dan da lɛ; a dale ’ka dan mɔn lɛ lo.

³⁸ Yé anlé mi tegele é dan béli lɛ blipale ma, naa, dé é diéra, an gi ’ka dan nana lɛ alé we ma lo.

³⁹ Naa, munu lé wo diéra yé wo san, kaa ’ka wo va mi kenu nya lo, naa, munu lé wo bli ke wo boen sile we gi lɛ, kaa a wo va mi kenu nya.