Ébrunu 1 - Kazambale lé Sebe Sauunu 1979

Kazambale we fe é Be lɔlu nya

¹ É kyɛn Kazambale we fe kaa tranu lɛ gɔnɔ kiɛre valé bɛ kiɛre ma, balelayemunu lɔlu nya.

² Naa, sin, bléyi voéla ’ko gi, é we fe kaa lɛ é Be Jézu lɔlu nya. É fɛnu faa nɔ é Be Jézu lɛ ’bɛzé nya yé Jézu nya lé é fɛnu faa kɛlɛ.

³ Bale Be a Bale lé fuasan nya, yé é a Bale bozen nagɔɔnle nya yé a dére plɛplɛ éé fɛ faa kunwo ékema. Dé é nyaa kɛlɛle nya wenyané nyaafɛ nya faa, é nyana fuaneé Bale bɛyila la gi loru.

⁴ Fɛan zo lé a tɔ ke blɛn yé é mini lanjenu zé ta, a zo duo lé aboen ke blɛn yé é mini wo ta. Bale Be ’ko lɔlu nya lé Bale we fe kaa lɛ.

Bale Be mini lanjenu lɛ

⁵ Lanjenu va lanje kyɛn lɛ lé Kazambale léé: An be lé ke i nya, Maa i yaa kyɔɔ? Yé é ziin, lanje kyɛn ma lé é a fe léé: Maa dan kɛlɛ lɛ a Ti nya, Yé é dan kɛlɛ lɛ an be nyaa?

⁶ Yé é ziin, bléyian va lé élé né vininzan pa zia tɛrɛ la, é léé: Kazambale lé lanjenu faa a bɔ ma.

⁷ Yé é ziin, é lé lanjenu ma léé: Yee ɛ élé lanjenu kɛla bélé fu zo, Yé yee ɛ é wuomunu kɛla bélé kyɛnɛnɛ zo.

⁸ Naa, é lé é Be lɛ léé: Bale, wo ’ka dan ilé webleblin si lɛ i lee monomono lo. Ilé plaminwiin soowoli vwii a we tegele vwii nya;

⁹ Bale, we tegele sɔ i lɛ, yé weple za a i gi, Amalé ilé Bale gi nanale lé nyɔnɔ zén i nwiin Yé é gié i yɛramamunu zé ta.

¹⁰ Yé é lé é ziin léé: Mizambale, a pélisiana bii ɛ tɛrɛ kɛlɛ, Yé lanu a i bɛ panyanama nya;

¹¹ Wo dan gié lɛ, naa, bii éé voo ana; Wo faa é dan kɛlɛ lɛ é kwa bélé sɔ zo;

¹² I dan wo po pa lɛ bélé sɔ zo, Yé i dan wo tavɔɔ lɛ bélé varɔ zo; Naa, bii éé voo i dɔbɛ duo gi, Yé i lɛɛ ’ka lɛɛ va lo.

¹³ Yé lanjenu va lanje kyɛn lɛ lé Bale léé: ’I nyana ’é bɛyila Fɔɔ yé ’é i nyanézannu faa pla i wuoo?

¹⁴ Lanjenu faa ’ka bélé funu zo Kazambale lé nyanama gi loo? Bale ’ka wo pa lɛ zia munu lé wo dan si lɛ we gi, bɔle wo va we gi loo?