Bélidɔwesɛbɛ Fiézan 9 - Kazambale lé Sebe Sauunu 1979

Izraɛlnu tɔnéi kɛlɛ plɛplɛ

¹ Izraɛl munu, ’ka tɔné dɔ. Kyɔ ka dan Juudɛn kini lɛ, yé bɛnnu lé wo kiɛre mini ka ta, ’té wolé plɛplɛ mini kazé ta, ka dan kɛlɛ lɛ wozannu nya; fla blɛnnu lé wo zi gɔrɔ bɔ la gi baa, ka dan wo si lɛ;

² mi blɛn grɔgrɔnu, Anak lé nénu lé ka wo dɔɔ, yé ka wo ta we ’ma léé, de ɛ bɔa dɔle lɛ Anak lé nénu ’lɛɛ? ka dan pla lɛ wo nwiin.

³ Amalé kyɔ, Gakelebale, kalé Bale é dan tawo lɛ ka ’lɛ bélé kyɛ lé éé fɛ faa blé, a zo, ’ka ’bɛ gi dɔɔ ma; yee ɛ dan wo kɛlɛ lɛ kiéné ka ’lɛ, yee ɛ dan wo kulu ga lɛ; ka dan wo bin lɛ, ka dan wo gyɛ lɛ do ’té, Gakelebale a fe ka lɛ fɛan zo, a zo.

⁴ Dé Gakelebale, kalé Bale wo bin ka ’lɛ, té ka fe ka bli gi léé, ’wo tegele ma lé Gakelebale ’wo kɛlɛ tɛrɛ ’ko zannu nya lo; naa, bɛn ’konu lé wenyané ma lé Gakelebale, kalé Bale wo bin ka ’lɛ.

⁵ É ’ka kɛlɛ lɛ léé, kalé tawobɛ tegele valé ka bli tegele ma lé tɛrɛ ’ko kɛlɛ kazé nya lo; naa, bɛn ’konu bli nyané lé we ma lé Gakelebale, kalé Bale wo bin ka ’lɛ, yé é ziin, dére lé é a fe ébo ’nyɔɔnle nya ka tranu, Abraam koo, Izak koo, Jakɔb koo, wo lɛ, a dɔle gligli lé we ma lé é dan wo bin lɛ.

⁶ Amalé é a lé ka gi dɔɔ léé, Gakelebale, kalé Bale ’ka tɛrɛ zin ’ko nɔ lɛ ka lɛ, ka tegele lé we ma lo; naa, ka a wemaplɛplɛzannu nya.

⁷ Ka Gakelebale, kalé Bale bli fli bwi gi fɛan zo, a sele ’é dɔ ka gi; té ka gi é san ’bɛ ma lo. É sia yian nya lé ka si Éjipiti tɛrɛ la fɔɔ yé ka bɔ fɛkona ’ko, ka a tɔnégiplɛplɛzannu nya.

⁸ Ka Gakelebale blifliwe kɛlɛ Orɛb gɔ ma; Gakelebale bli fli ka ma yé é dɔ a gi léé, é dan ka gyɛ lɛ.

⁹ Dé an gɔ gié, gɔlɛfén lé Bale ka valé ’wonu lé gipawe gyɛ a ta, a sile we gi, an vo gɔ nwiin yi yɔ fié, é yiéyi valé é béli; an ’ka fɛ ble lɛ lo, yé an ’ka ’yi mini lɛ lo;

¹⁰ Gakelebale gɔlɛfén fié nɔ an lɛ; Bale sɛbɛ gyɛ wo ta ’é bɛnwɔlɛ nya; yian nya lé ka zén ékeva yé Gakelebale we fe ka lɛ gɔ nwiin kyɛ méléna bɛ, dére faa lé é a fe a yi la bɛ, é a é gyɛle gɔlɛfén fié ’ko ta.

¹¹ Gɔlɛfén fié ’ko lé gipawe ke é gyɛle wo ta, Gakelebale wo nɔ an lɛ yiéyi yɔ fié béli yɔ fié nyaala nya.

¹² Gakelebale lé an lɛ léé, ’maa nwa, ’maa zun é kele; naa, anlé munu lé maa wo si Éjipiti tɛrɛ la, wo ’wobo sɛrɛ. Zi lé yee a gɔɔn wo lɛ, wo si a ta tɛkɛ; wo fɛ selele foto kɛlɛ.

¹³ Gakelebale lé an lɛ léé, ’é a ye léé, munu ’ko a wemaplɛplɛzannu nya.

¹⁴ É léé, ’maa ’é vo, ’é wo gyɛ yé ’é wo tɔ ta saan tɛrɛ la, yé ’é maa kɛlɛ bɛn lé ke plɛplɛ ’té é ke kiɛre é mini munu ’konu ta, a nya.

¹⁵ Yé maa nɔla yé maa gɔ zun, ’té kyɛ éé blé gɔ zi fɛfaana, ’té gipawe gɔlɛfén fié a an bɛ fié lee.

¹⁶ Maa nagini, ’té ka wenyané kɛlɛ Gakelebale, kalé Bale ma, yé ka kyan sele diriné foto nya, yé zi lé Gakelebale a gɔɔn ka lɛ, yé ka si a ta é kele.

¹⁷ Gɔlɛfén fié lé ke an lee bɛ, maa wo vuli, yé maa wo ’wii ka yuɛ va.

¹⁸ Kalé wenyané ma lé an dia Gakelebale wuo bélé é vinin zo, yi yɔ fié, é yiéyi valé é béli; maa ’ka fɛ ble lɛ lo, yé maa ’ka ’yi mini lɛ lo; we lé ke naané Gakelebale yuɛ gi, ka kɛlɛ yé ka a bli fli.

¹⁹ Gakelebale bli fli ka ma bɛ nyané zi fɛan zo bɛ, é sɔ a lɛ léé, ’é ka gyɛ, maa a ye aan wo, di kini an gi. Naa, Gakelebale tɔné dɔ an lɛ é ziin gɔnɔ do.

²⁰ Gakelebale bli fli Arɔn ma é baba, yé é sɔ a lɛ léé, ’é ’bɛ gya, naa, maa anbo dia a wuo, zanté vɔle a lɛ we ma é ziin ’bɛ yi ’ko ta.

²¹ Diriné lé ka a kɛlɛ bɛ, kalé wenyané tɔnɔ nya, maa a si, maa a kyɛ ble, yé maa a punbo, yé maa a pun zén yuu lé éé gɔ zunwo bɛ, a va.

²² Tabéra koo, Masa koo, Kibrɔt‐Ataava koo, ka Gakelebale blifliwe kɛlɛ wo faa na.

²³ Gakelebale a a va léé, ka si Kadɛs‐Baanéa bléyian va, yé é lé ka lɛ léé, ’ka nwa, tɛrɛ lé ’é a nɔ ka lɛ, ’ka a si kazé nya, ’ka tɔné gi kɛlɛ plɛplɛ Gakelebale, kalé Bale dére ma, yé ka bli ’ka vo lɛ a lɛ lo, yé ka ’ka a dére lɛdɔ lɛ a ma lo.

²⁴ Maa ka dɔɔ a pélisia bléyi va fɔɔ kyɔ, ka a tɔnégiplɛplɛzannu nya Gakelebale ma.

²⁵ É sɔ Gakelebale lɛ léé, ’é ka gyɛ, amalé an vo é diale a wuo, yi yɔ fié yiéyi valé é béli.

²⁶ An bazoro Gakelebale lɛ yé maa léé: Mizan Gakelebale, ilé munu, ilé tɔnɔfɛ lé i wo tabo ilé plɛplɛ blɛn nya, ’té i wo si Éjipiti tɛrɛ la i bɛ plɛplɛ nya bɛ, té ’i wo gyɛ lo.

²⁷ I wuozannu Abraam koo, Izak koo, Jakɔb koo, wo sele ’é dɔ i gi ma. Munu ’ko lé tɔnégiplɛplɛ koo, wolé weple koo, wolé wenyané koo, té bé pa i bli gi lo;

²⁸ tɛrɛ lé i wo si a ta bɛ, dé ana munu é da a fe léé, Gakelebale ’ka bɔalɛ léé, é go munu ’konu nya, tɛrɛ lé é a fe léé, é dan a nɔ lɛ wo lɛ, ana lo, yé wo za a Bale gi, bɛwemalé é wo si ko va wo gyɛle bwi gi we ma.

²⁹ Gakelebale, wa ilé munu nya, wa ilé tɔnɔfɛ lé, i wo si Éjipiti tɛrɛ la ilé plɛplɛ blɛn valé i bɛ soile nya, a nya.