Bélidɔwesɛbɛ Fiézan 8 - Kazambale lé Sebe Sauunu 1979

Blivolɛ tɛrɛ valé Bale bɔvɔle

¹ An sɔnnénu lé maa wo gɔɔn ka lɛ kyɔ, ’ka wo lɛdɔma yé ’ka wo pa, ka vole é yuɛma valé ka fanle we ma, yé tɛrɛ lé Gakelebale ébo ’nyɔɔn léé, é dan a nɔ lɛ ka tranu lɛ, yé ’é kɛlɛ kazé nya.

² Zi faa lé Gakelebale, kalé Bale go ka nya a ta bwi gi, ka lɛɛ yɔ fié lo, a sele ’é dɔ ka gi ma; é a kɛlɛ ka tuale valé ka gidanle we gi, ka bli dɔɔle we ma, dé ka dan ’é sɔnnénu pa lɛɛ? dé ka ’ka dan wo pa lɛ loo? yé é a gi dɔɔ.

³ É ka tua, é ka gyɛ lɔrɔ nya, yé mana lé ka ’ka a dɔɔ lɛ lo, yé ka tranu ’ka a dɔɔ lɛ é kyɛn lo, é a nɔ ka lɛ blefɛ nya; é fɛ ’ko nɔ ka lɛ kalé a gi dɔɔle we gi léé, mi ’ka voo é yuɛma fɛblele saa nya lo, naa, mi éé voo é yuɛma dére faa lé woo sié Gakelebale ’léé, wo ɛ nya.

⁴ Lɛɛ yɔ fié ’ko gi, kalé sɔ ’ka fwi lɛ lo, yé ka gane ’ka zii lɛ lo.

⁵ É a lé ka gi dɔɔ ka bli gi léé, Gakelebale, kalé Bale we lɛdɔ ka gi, bélé mi éé we lɛdɔa élé né gi fɛan zo, a zo.

⁶ ’Ka Gakelebale, kalé Bale sɔnné pa, ’té ka alé zi ta tawoo, ’té ka kanaan a lee.

⁷ Naa, Gakelebale, kalé Bale é dan go lɛ ka nya tɛrɛ zin ta; yuunu koo, ’yibɔnanu valé doo blɛnnu koo, ’yi’wuo lé woo voo duunna pɛnguru valé gɔnu ma koo, wa tɛrɛ ’ko la;

⁸ ’sa koo, sɔnmlén koo, dɔrɔféinu koo, bɔrɔyilinu valé grénadéyilinu koo, wa tɛrɛ ’ko la; ɔliviyilinu valé zɔrɔnyɔnɔ a tɛrɛ ’ko la;

⁹ ka dan fɛ kiɛre ble lɛ tɛrɛ ’ko la, yé fɛ do kpen ’ka dan vuru lɛ ka ma lo; tɛrɛ ’ko la gɔlɛnu a foliɛwɔlɛ nya, yé ka dan zéné kuli lɛ ana gɔnu gi.

¹⁰ Dé ka fɛ ble, dé ka kan, ka dan Gakelebale, kalé Bale drɔɔ vo lɛ, tɛrɛ zin lé é a nɔ ka lɛ, alé we ma.

¹¹ ’Ka yuɛ pa kabozen va, té ka gi é san Gakelebale, kalé Bale ma lo, yé a sɔnnénu valé ka gɔnɔlawenu valé alé bélidɔwenu lé maa wo gɔɔn ka lɛ kyɔ yé ka ’ka wo ta tawo lo lo.

¹² Dé ka fɛ ble yé ka kan, dé ka kɔn nɔnɔmi dɔ yé ka nyana wo gi,

¹³ dé ka ye léé, kalé dirinu valé kalé trubɛnu kɛlɛ kiɛre, dé ka ye léé, kalé gɔɔlifu valé kalé kyan kɛlɛ di, dé ka ye léé, kalé fɛ faa yele ’lɛ a sina,

¹⁴ ’ka yuɛ pa kabozen va, té ka kabo kɛlɛ blɛn lo; Gakelebale, kalé Bale lé é ka si luu gi yé é ka si Éjipiti tɛrɛ la, té ka gi é san a ma lo.

¹⁵ É go ka nya bwi blɛn ’ko lé, a ta éé kana zén‐é mi gi, ’té méné suiɛ yaale valé zɛnɛanu ke ana, a la; é go ka nya fɛna galenu na, ’té ’yi ’ka ana lo, yé é ’yi si gɔlɛ plɛplɛ gi ka lɛ;

¹⁶ mana lé ka tranu ’ka a dɔɔ lɛ lo, é a nɔ ka lɛ blefɛ nya bwi ’ko la, ka tuale valé ka gidanle we gi, yé ’bɛ zuo é wezin kɛlɛ ka lɛ; Gakelebale lé é ’bɛ wenu faa kɛlɛ, té ka gi é san a ma lo.

¹⁷ Té ka fe ka bli gi léé, ’wolé plɛplɛ valé ’wo bɛ plɛplɛ ma lé ’wo fua ’ko ble lo.

¹⁸ Gakelebale, kalé Bale sele é dɔ ka gi ma; naa, yee ɛ pa ka ta yé ka kɛlɛ fuablezannu nya. É a kɛlɛ, gipawe lé é a kɛlɛ ébo ’nyɔɔnle nya ka tranu lɛ, a dɔle gligli we ma, fɛan zo lé é a kɛlɛ kyɔ ’ko, a zo.

¹⁹ Dé ka gi san Gakelebale, kalé Bale ma, yé ka go bale bɛnu zuo, dé ka wo bɔ yé ka dia wo wuo, maa fe ka lɛ kpaklaa kyɔ léé, ka dan zamaga wo lɛ.

²⁰ Bɛnnu lé Gakelebale wo gyɛ za ma ka ’lɛ, ka dan zamaga wo lɛ bélé wo zo, ’té dé ka ’ka kɔɔn ka tɔné dɔ lɛ Gakelebale, kalé Bale dére lɛ lo.