Bélidɔwesɛbɛ Fiézan 7 - Kazambale lé Sebe Sauunu 1979

’Wo Kanaannu sɛrɛ tata

¹ Tɛrɛ lé ka dan a si lɛ kazé nya bɛ, dé Gakelebale kalé Bale ka bɔ ana, é dan bɛn kiɛre bin lɛ ka ’lɛ; bɛn lɛ sɔrafié lé wo blɛn mini ka lɛ, yé wolé plɛplɛ mini ka lɛ, woo lé; Étinu koo, Giigazinu koo, Amorénu koo, Kanaannu koo, Férézinu koo, Éévinu koo, Jébusinu koo, woo lé.

² Dé Gakelebale, kalé Bale wo pa ka lee yé ka wo kele, ’ka wo gyɛ tata; té ka gi pa do wo nya lo; té ka wo ma we vo lo.

³ Té ka mariazé kɛlɛ munu ’konu nya lo; té ka ka lunu nɔ wo benu lɛ lo; té ka wo lunu si ka benu nanu nya lo;

⁴ dé ka kɛlɛ, wo dan ka benu ’wuo sɛrɛ lɛ an ma, yé wo dan bale bɛnu bɔ lɛ, yé maa Gakelebale bli é dan fli lɛ ka ma; maa dan ka kulu ga lɛ do ’té.

⁵ We lé ka dan a kɛlɛ lɛ wo vazia, yee lé ke ’ko: ka dan wolé yobannanu zana lɛ a gi, ka dan wolé yowɔlɛnu sɛrɛ lɛ, ka dan wolé miyilinu yéli lɛ, yé ka dan wolé yonu kyɛ ble lɛ.

⁶ Naa, ka a munu lé Gakelebale, kalé Bale wo pa é yɛrama ézé nya, wo nya; Gakelebale, kalé Bale ka si bɛnnu faa lé wo ke tɛrɛ la, wo va, ka kɛlɛle azé nya we gi.

⁷ É ’ka kɛlɛ lɛ léé, ka kiɛre mini bɛn bɛnu faa ta, bɛwemalé Gakelebale é buvɔ ka ma yé é ka si a va lo, naa, ka ’léé a kiéné é mini bɛn bɛnu faa ta.

⁸ Naa, ka sɔ Gakelebale lɛ é wo, yé é sɔ a lɛ léé, ébo ’nyɔɔn ka tranu lɛ fɛan zo, ’é ’bɛ lɛ sɔɔ, bɛwemalé Gakelebale ka si luu gi, é ka si Éjipitimunu nwiinzan Faraɔn lee yé é ka si ana é bɛ plɛplɛ nya.

⁹ Amalé, ka gi dɔɔ léé, Gakelebale, kalé Bale ɛ ke Bale nya; yarapawela Bale ’ko, munu lé é sɔ wo lɛ, ’té wo alé bélidɔwenu kɛla, éé dɔa élé gipawe ta, yé a nyanai éé zén‐é wo ta fɔɔ yé é bɔ wo kulu wuru soruzan ma.

¹⁰ Naa, munu lé a za ke wo gi, é dan é lɛdɔ lɛ wo gi, yé ’é wo gyɛ zamaga nya. É ’ka dan mɔn lɛ lo; é dan é lɛdɔ lɛ ’é zapazan gi ’té.

¹¹ Bɛwemalé, a sɔnnénu valé alé bélidɔwenu valé ka gɔnɔlawenu lé maa wo gɔɔn ka lɛ kyɔ, ’ka wo lɛdɔma yé ’ka wo ta tawo.

Drɔɔvolenu

¹² Dé ka tɔné dɔ dére ’konu lɛ, dé ka wo lɛdɔma yé ka wo ta tawo, gipawe valé nyanai zénle lé ébo ’nyɔɔn ka tranu lɛ wo ma, é dan dɔ lɛ a ta plɛplɛ.

¹³ É dan ka lɔrɔ pa lɛ; é dan ka drɔɔ vo lɛ yé é dan ka fan lɛ; nénu lé wo bɔn ke wo bunu ma, é dan wo drɔɔ vo lɛ yé é dan kalé féifɛ drɔɔ vo lɛ; kalé ’sa koo, kalé dɔrɔ dɛrɛ valé kalé nyɔnɔ koo, kalé dirinu valé kalé trubɛnu lé né yaale koo, é dan wo faa drɔɔ vo lɛ, tɛrɛ lé ébo ’nyɔɔn ka tranu lɛ léé, é dan a nɔ lɛ ka lɛ, a ta.

¹⁴ É dan ka drɔɔ vo lɛ yé é mini bɛnnu faa ta; sɔngɔné valé sɔnle ’ka dan kɛlɛ lɛ ka va lo; sɔnwinu ’ka dan kɛlɛ lɛ kalé trubɛnu va lo.

¹⁵ Gakelebale é dan gyɛ faa si lɛ ka ma baa; Éjipiti tɛrɛ la gyɛ naanénu lé ka wo dɔɔ, é ’ka dan ka gyɛ lɛ wo do kpen nya lo, naa, é dan ka zapamunu faa gyɛ lɛ wo nya.

¹⁶ Bɛnnu faa lé Gakelebale, kalé Bale é dan wo pa lɛ ka lee, ’ka wo gyɛ; té ka nyanai zén wo ta lo, té ka wolé balenu bɔ lo, naa, é dan kɛlɛ lɛ ka kunsan nya, ’bɛzama.

¹⁷ Dé ka dan fe lɛ ka bli gi léé, bɛn ’konu kiɛre mini ko ta, ko dan wo bin lɛ kaa?

¹⁸ Té ka kana lo. We lé Gakelebale, kalé Bale a kɛlɛ Faraɔn valé Éjipiti munu faa lɛ, a sele ’é dɔ ka gi ma.

¹⁹ Gidanwenu blɛn lé wo kɛlɛ ka yuɛ va koo, gyɛzorowenu valé weblɛnblɛnnu koo, Gakelebale bɛ plɛplɛ lé ke é soile koo, we ’konu faa lé ka wo ye ka sile Éjipiti tɛrɛ la bléyi va, wo sele ’é dɔ ka gi ma; ’bɛ zo lé Gakelebale kalé Bale é dan a kɛlɛ lɛ, munu faa lé ka a kanana wo lee, wo lɛ.

²⁰ ’Bɛ ta loru, dé mi kenu vo yé wo yɔɔ ka lee, Gakelebale, kalé Bale é dan gyebenu pa lɛ wo lɛ zia fɔɔ yé wo zamaga wo.

²¹ Té di é kini ka gi wolé we ma lo; naa, Gakelebale, kalé Bale a ka méléna. É a Bale blɛn valé mitadanmawe kɛlɛ Bale nya.

²² Gakelebale, kalé Bale é dan bɛn ’konu bin lɛ ka ’lɛ sɛné sɛné; ka ’ka bɔalɛ léé, ka wo faa gyɛ é nya do lo, dé bwi gi winu ’léé gi é da gyɛ yé wo wenyané kɛlɛ ka lɛ.

²³ Gakelebale, kalé Bale é dan bɛn ’konu pa lɛ ka lee; é dan wo fwila lɛ fɔɔ yé é wo gyɛ tata.

²⁴ É dan wo nwiinzannu pa lɛ ka lee, yé ka dan wo tɔ ta saan lɛ tɛrɛ la; wo va mi do kpen ’ka bɔa dɔle lɛ ka ma plɛplɛ lo, fɔɔ yé ka wo faa kulu ga.

²⁵ Wolé miyilinu lé ke wolé balenu nya, ka dan wo kyɛ ble lɛ. Té ka bli é bɔ wo ma gɔɔlifu valé wo ma kyan ma lo, té ka a si lo, dé é da kɛlɛ ka kunsan nya; wa bélé bo zo Gakelebale, kalé Bale yuɛ gi.

²⁶ Té ka da ’bɛzofɛ nya kalé kɔn gi lo; dé ka kɛlɛ, ’té bale a é pale ka ma bélé yee fɛnu zo; ’ka serele bo fɛ ’konu ma, ’ka wo ye bélé bo zo, naa, bale pamafɛ lé.