Bélidɔwesɛbɛ Fiézan 6 - Kazambale lé Sebe Sauunu 1979

Gakelebale sɔnné pale

¹ Bale sɔnnénu lé Gakelebale, kalé Bale a fe léé, maa a paa ka gi, wo valé bélidɔwenu valé ka gɔnɔlawenu nya, wo lé ke ’ko. É léé, maa wo paa ka gi yé ka wo ta tawo, tɛrɛ lé ka dan a si lɛ kazé nya, a ta.

² Dé ka kana Gakelebale, kalé Bale lee, bélidɔwenu faa valé gɔnɔlawenu faa lé maa a gɔɔn ka lɛ, dé ka wo lɛdɔma, ka koo, ka benu koo, ka benu é benu koo, dé ka wo lɛdɔma kalé tɛrɛla faa gi, ka dan mɔn lɛ tɛrɛ la.

³ Amalé, Izraɛl munu, ’ka tɔné dɔ wo lɛ, yé ’ka wo ta tawo é zima, ka gi nanale valé ka fanle we ma, Gakelebale, ka tranu lé Bale a fe fɛan zo, a zo, ’té é a fe é wo léé, é dan tɛrɛ nyɔnɔzan nɔ lɛ ka lɛ bɛ.

⁴ Izraɛl munu, ’ka tɔné dɔ. Gakelebale, kolé Bale do kpen ɛ ke Gakelebale nya.

⁵ ’Ka Gakelebale, kalé Bale lɔrɔ pa, ka bli faa koo, kaboen faa koo, kalé plɛplɛ faa koo, wo nya.

⁶ Bélidɔwe ’konu lé maa wo nɔ ka lɛ kyɔ, ’wo vo ka bli gi ma.

⁷ ’Ka wo paa kalé nénu gi; dé ka a kalé kɔn gioo, dé ka a ta laoo, dé ka yiaoo, dé ka nwaoo, ’ka wo glewo.

⁸ ’Ka wo yere ka bɛ ma tɔmase nya, ’ka wo polu dɔ ka ’wuo ma yé é vo é plale ka yarapɛ la.

⁹ ’Ka wo gyɛ kalé duolivɔgiyili valé kalé duoli ma.

¹⁰ Tɛrɛ lé Gakelebale, kalé Bale ébo ’nyɔɔn ka tranu Abraam valé Izak valé Jakɔb lɛ léé, é dan a nɔ lɛ ka lɛ, é dan go lɛ ka nya ana. Fla blɛn zinnu lé ka ’ka wo pa lɛ lo, ka dan nyana lɛ wo ta;

¹¹ kɔnnu lé wo ke é fanle fɛ zin gɔnɔ faa lé ka ’ka wo téé lɛ lo, wo nya, wo dan kɛlɛ lɛ kazé nya; ’yiguru lé ka ’ka wo bo lɛ lo koo, dɔrɔféinu lé ka ’ka wo pa lɛ lo koo, ɔliviyilinu lé ka ’ka wo suru lɛ lo koo, wo dan kɛlɛ lɛ kazé nya.

¹² Dé ka fɛ ble yé ka kan, ’ka yuɛ pa kabozen va; té ka gi é san Gakelebale lé é ka si luu gi Éjipiti tɛrɛ la, a ma lo.

¹³ ’Ka kana Gakelebale, kalé Bale lee, ’ka a bɔ, ’ka bale ’nyɔɔn a tɔ nya.

¹⁴ Munu lé ka dan nyana lɛ wo méléna bɛ, té ka go wolé balenu zuo lo;

¹⁵ naa, Gakelebale, kalé Bale é a maawo Bale nya ka méléna. A bli é dan fli lɛ ka ma yé é dan ka si lɛ tɛrɛ la tata.

¹⁶ Té ka Gakelebale, kalé Bale gi dan, fɛan zo lé ka a kɛlɛ Masa, a zo lo.

¹⁷ Gakelebale, kalé Bale sɔnnénu koo, alé gɔnɔlawenu koo, alé bélidɔwenu koo, ’té é wo gɔɔn ka lɛ bɛ, ’ka wo ta tawo.

¹⁸ We lé é ke tegele valé é zima Gakelebale yuɛ gi, ’ka ’bɛ kɛlɛ, ka gi nanale valé ka wɔrale we gi, tɛrɛ zima lé Gakelebale ébo ’nyɔɔn ka tranu lɛ léé, é dan a nɔ lɛ ka lɛ bɛ, a ta,

¹⁹ ’té dé é ka nyanézannu faa bin ka ’lɛ, Gakelebale a fe fɛan zo, a zo.

²⁰ Dé yi do bɔ, dé ka be do a laa ka lee léé, weplalenu valé bélidɔwenu valé ka gɔnɔlawenu lé Gakelebale, kolé Bale a gɔɔn ka lɛ, wo gi lé nɔɔ?

²¹ ka dan a fe lɛ ka be lɛ léé: Ko a é vinin Faraɔn lé luu nya Éjipiti tɛrɛ la, yé Gakelebale ko si Éjipiti tɛrɛ la é bɛ plɛplɛ nya.

²² Gakelebale gyɛzorowenu valé tadanmawe blɛnblɛnnu kɛlɛ ko yuɛ va, Éjipiti tɛrɛ koo, Faraɔn koo, alé kɔngimunu koo, wo lɛ;

²³ é ko si ’bɛna yé é da ko nya, tɛrɛ lé ébo ’nyɔɔn ko tranu lɛ léé, é dan a nɔ lɛ ko lɛ, a ta.

²⁴ Gakelebale lé ko lɛ léé, ’ko bélidɔwe ’konu lɛdɔma yé ’ko kana yee Gakelebale, kolé Bale lee, ko gi nanale yifaama we gi, yé é ko vo é yuɛma, fɛan zo lé é a kɛlɛ kyɔ, a zo.

²⁵ Dé ko bélidɔwe ’konu lɛdɔma é zima, Gakelebale kolé Bale yuɛ va, é a fe ko lɛ fɛan zo, a zo, é dan ko ye lɛ mi tegelenu nya.