Bélidɔwesɛbɛ Fiézan 5 - Kazambale lé Sebe Sauunu 1979

¹ Moizi Izraɛl munu faa laa yé é lé wo lɛ léé: Izraɛl munu, bélidɔwenu valé ka gɔnɔlawenu lé maa a wo fena ka lɛ kyɔ, ’ka tɔné dɔ wo lɛ. ’Ka wo pa ka ’wuo gi, yé ’ka wo ta tawo é zima ma.

² Gakelebale, kolé Bale a fe léé, ’ko gi pa do ’wo nya, Orɛb gɔ ma.

³ Gakelebale ’ka gipawe ’ko kɛlɛ lɛ ko tranu va lo; ko faa lé ko ke é yuɛma kyɔ ’ko, ko va lé é a kɛlɛ.

⁴ Gakelebale we fe ka lɛ ka faa yuɛ va, ’té é a gɔ nwiin kyɛ méléna.

⁵ Maa dɔ Gakelebale valé kanu méléna, Gakelebale dére fele ka lɛ we gi; naa, ka a kanana kyɛ lee, yé ka ’ka gɔ gié lɛ lo, ’bɛzama. Gakelebale léé:

⁶ ’Yee ɛ ke Gakelebale, kalé Bale lé é ka si luu gi Éjipiti tɛrɛ la, a nya.

⁷ Té i bale bɛnu pa ’é pa gi lo.

⁸ Té i miyili nyaa lo; fɛnu lé ke lanu gi koo, wo lé ke tɛrɛ la koo, wo lé ke ’yi va tɛrɛ wuo koo, té i wo va fɛ do kpen foto kɛlɛ lo.

⁹ Té i dia i bli la wo ’lɛ lo, té i nyanama pa wo lɛ lo; naa, ’yee, Gakelebale, kalé Bale, ’é a maawo Bale nya, yé éé munu lé weplenu ma ban dɔa ’wolé nénu nwiin fɔɔ yé é bɔ ’é zapamunu kulu yaazan valé wo kulu ziɛnzan nya,

¹⁰ yé munu lé Bale éé sɔa wo lɛ, ’té woo alé bélidɔwenu kɛla, a nyanai éé zén‐é wo ta fɔɔ yé é bɔ wo kulu wuru soruzan ma.

¹¹ Té i ’yee Gakelebale, kalé Bale tɔ fe é pla lo; mi lé é ’yee Gakelebale tɔ fe é pla, ’yee Gakelebale ’é dan ’é lɛ dɔ lɛ ’bɛzan gi,

¹² flinyi ’é kɛlɛ kalé yi nyané nya, ’yee Gakelebale, kalé Bale a fe fɛna zo, a zo.

¹³ ’I nyanama pa yi suiɛdo yé ilé nyanama faa pa.

¹⁴ A yi sɔrafiézan a ’yee Gakelebale, kalé Bale lé flinyi nya; té i nyanama do kpen pa ’bɛ yi nya lo, bii koo, i be koo, i lu koo, i wuogɔné koo, i wuole koo, ilé dirigɔné koo, ilé sokofali koo, ilé winu faa koo, bɛn lé é ke ilé kɔn ’léé koo, té ’wo nyanama do kpen pa ’bɛ yi nya lo. É a lé ka wuogɔnénu valé ka wuolomu ’é flin bélé bii zo.

¹⁵ A sele ’é dɔ i gi léé, i a luu nya Éjipiti tɛrɛ la, yé ’yee Gakelebale, kalé Bale ka si ana é bɛ plɛplɛ soile nya; bɛwemalé Gakelebale, kalé Bale léé, ’i flinyi kɛlɛ.

¹⁶ I ti valé i bu lɛdɔma, Gakelebale, kalé Bale a fe ka lɛ fɛan zo, a zo, yé ka dan mɔn lɛ tɛrɛ la, yé ka gi é dan nana lɛ tɛrɛ lé Gakelebale, kalé Bale, a nɔ ka lɛ, a ta.

¹⁷ Té i mi gyɛ lo.

¹⁸ Té i le bɛ gini lo; té i gɔné bɛ gini lo.

¹⁹ Té i kyeen wo lo.

²⁰ Té i viéwo mi ma lo.

²¹ Té i bli é bɔ i bɔluzan na ma lo; alé kɔn koo, alé féi koo, a wuogɔné koo, a wuole koo, alé diri koo, alé sokofale koo, dé é a alé fɛofɛan nya, té i bli é bɔ a do kpen ma lo.

²² Dérenu lé Gakelebale a fe gɔ nwiin, wo lé ke bɛ; kyɛ koo, latinu koo, gunutinu koo, é a wo méléna, té éé we fé munu faa lɛ é dére plɛplɛ nya, yé é ’ka a bɛ fe lɛ lo. É wo gyɛ gɔlɛfen fié ta, yé é wo nɔ an lɛ.

²³ Ka dére ’ma aan wo gunutinu méléna, ’té gɔ faa a kyɛ nya, ka bɛn lɛgɔnɔ nwiinzannu valé kalé mi segelenu faa bié maa va,

²⁴ yé wo léé: Bé ye, Gakelebale, ’wolé Bale élé fuasan valé ’é blɛn nagɔɔn ’wo lɛ kyɔ; ’wo a dére ’ma kyɛ méléna; kyɔ ’wa ye léé, Kazambale we fe munu lɛ yé wo vo é yuɛma.

²⁵ Yé sin, mɛmalé é a lé ’wo gaa? naa, kyɛ blɛn ’ko é dan ’wo ble lɛ; dé ’wo vo Gakelebale, ’wolé Bale dére ’mana ’wo dan ga lɛ.

²⁶ Naa, mi kyɛn ɛ Bale yuɛmale dére ’ma wefena kyɛ méléna, fɛan zo lé ’wa ’ma, a zo, yé azan vo é yuɛmaa?

²⁷ Naa, ka léé, ’maa bié yé ’maa tɔné dɔ Gakelebale, ’wolé Bale dére faa lɛ; we faa lé Gakelebale, ’wolé Bale é dan a fe lɛ yé bé zuo fe ’wo lɛ; ’wo dan a ’ma lɛ yé ’wo dan a kɛlɛ lɛ. A zo lé ka a fe an lɛ.

²⁸ We lé ka a fe an lɛ, Gakelebale a ’ma. Yé Gakelebale lé an lɛ léé: Dére lé munu ’ko a fe i lɛ, ’yee a ’ma; wa faa fe é zima.

²⁹ Oo, bli ’ko duo ’é vo wo gi yifaama ma, yé ’wo kana ’é lee ma, yé ’wo ’élé bélidɔwe lɛdɔma ma, yé wo gi é dan nana lɛ yifaama, wo valé ’wolé nénu nya.

³⁰ É léé, ’maa go, ’maa fe ka lɛ léé, ’ka go kalé sɔkɔn ’léé.

³¹ Naa, maa, maa vo ’é va ’ko; ’é sɔnnénu koo, ’élé bélidɔwenu koo, ka gɔnɔlawenu koo, ’é dan wo faa gɔɔn lɛ an lɛ, yé maa dan wo paa lɛ ka gi, kalé wo ta tawole we gi, tɛrɛ lé é dan a nɔ lɛ ka lɛ kazé nya, a ta. A zo lé Gakelebale a fe an lɛ.

³² We lé Gakelebale, kalé Bale a fe ka lɛ, ’ka a kɛlɛ é zima; dé ka bɛyila léé, dé ka bɛbola léé, té ka nɔla ana lo.

³³ Tawobɛ lé Gakelebale, kalé Bale a gɔɔn ka lɛ, ’ka tawo a yɛrama ’kyɛ, ka vole é yuɛma valé ka gi nanale we gi, yé ka mɔn tɛrɛ lé é dan kɛlɛ lɛ kazé nya, a ta.