Bélidɔwesɛbɛ Fiézan 4 - Kazambale lé Sebe Sauunu 1979

Weplalenu

¹ Sin, Izraɛl munu, bélidɔwenu valé gɔnɔlawenu lé maa a gona paana ka gi bɛ, ’ka tɔné dɔ wo lɛ. ’Ka wo ta tawo, ka vole é yuɛma we ma yé tɛrɛ lé Gakelebale, ka tranu lé Bale, a nɔ ka lɛ, yé ’é kɛlɛ kazé nya.

² We lé maa a fena ka lɛ, té ka a taa do kpen pa lo, té ka a ke si a ta lo; naa, Gakelebale, kalé Bale lé bélidɔwenu lé maa a fena ka lɛ, ’ka wo ta we kɛlɛ.

³ We lé Gakelebale a kɛlɛ ka lɛ Baal‐Péɔɔ lé we ma, ka ana ye. Ka va munu faa lé wo go Baal‐Péɔɔ zuo, Gakelebale, kalé Bale wo gyɛ.

⁴ Yé ka lé ka buvɔ Gakelebale ma, ka faa a é yuɛma kyɔ.

⁵ Ka ye, maa Bale lé bélidɔwenu valé alé gɔnɔlawenu paa ka gi, Gakelebale, anlé Bale a pa an ’léé fɛan zo, a zo, kalé wo ta tawole we gi, tɛrɛ lé ka dan a kɛlɛ lɛ kazé nya, a ta.

⁶ ’Ka wo lɛdɔma yé ’ka wo ta tawo. ’Bɛ é dan kɛlɛ lɛ kalé wedɔɔle valé kalé gikinile nya munu yuɛ va. Wo dan bélidɔwe ’konu faa ma gun ’ma lɛ yé wo dan a fe lɛ léé: Bɛn blɛn do kpen ’ko, wo ɛ ke wedɔɔzannu valé gikinizannu nya.

⁷ Wezen lé, bléyi faa lé ko Gakelebale, kolé Bale tɔ laan a nya, é a ko sɔnɔ fɛan zo, bɛn blɛn kyɛn ɛzé Bale ke ’é sɔnɔ ’bɛ zoo?

⁸ Yé bɛn blɛn kyɛn lé bélidɔwenu valé wolé gɔnɔlawenu a tegele bélé bélidɔwenu faa lé maa wo fe ka lɛ kyɔ ’ko, a zoo?

⁹ Naa, we do ana. ’Ka yuɛ pa kabo va. ’Ka yuɛ pa kabozen va é zima kalé tɛrɛla faa gi, wenu lé ka wo ye ka yuɛ nya, té ka gi é san wo do kpen ma lo, té ’wo si ka bli gi lo; ’ka wo paa kalé nénu valé ka nénénu gi.

¹⁰ Yian nya lé ka dɔ Gakelebale, kalé Bale ’lɛ Orɛb, a sele ’é dɔ ka gi ma; ’bɛ yi la lé Gakelebale lé an lɛ léé, ’maa munu zén ékeva ’é sɔnɔ. É a a va léé, wo ’é dére ’ma, yé wo kanale ’é lee gi dɔɔ wolé tɛrɛla faa gi, yé wo ’é dérenu paa wolé nénu gi; a sele ’é dɔ ka gi ma.

¹¹ Ka bié yé ka dɔ gɔ nyana ma. Gɔ kyɛ a blena, yé a kyɛnɛnɛ nwa fɔɔ la gi, lati koo, gunuti koo, kyɛgoi gunu koo, wo méléna.

¹² Gakelebale we fe ka lɛ kyɛ worona. Ka a dére vun ’ma, naa, ka ’ka a yara ye lɛ lo, ka a dére ’ma é pla.

¹³ Élé gipawe zana dɔɔ ka lɛ, yé é léé, é a lé ka a lɛdɔma; bélidɔwe vu lé, é wo gyɛ gɔlɛfén fié ta, yee lé.

¹⁴ ’Bɛ bléyi va Gakelebale lé an lɛ léé, maa élé bélidɔwenu valé élé gɔnɔlawenu paa ka gi, kalé wo ta tawole we gi, tɛrɛ lé ka dan a si lɛ kazé nya, a ta.

¹⁵ Yian nya lé Gakelebale we fe ka lɛ kyɛ worona Orɛb gɔ nwiin, ka mi yara yee? Amalé ’ka yuɛ pa kabozennu va é zima,

^16-18 dé ka da kabo sɛrɛ; té ka miyili nyaa lo; gɔné koo, le koo, tɛrɛlawi koo, mianénu lé woo sié ba worona koo, tawoplɛlawinu koo, pɔ lé ke ’yi va tɛrɛ wuo koo, té ka wo va fɛ do kpen foto kɛlɛ lo; dé ka kɛlɛ ’té ka kabo sɛrɛ.

¹⁹ Dé ka yara nwa lai zia, yiri koo, moné koo, monénénu koo, lagifɛ gbaunu bɛ, dé ka wo ye, té ’wo ka sia ana yé ka dia ka bli la wo ’lɛ yé ka wo bɔ lo; dé ka kɛlɛ, ’té ka kabo sɛrɛ. Gakelebale, kalé Bale fɛ ’konu kɛlɛ munu faa lé ke tɛrɛ la, wo faa zé nya.

²⁰ Naa, ’kaa, Gakelebale ka si a va yé é ka si foliɛwɔlɛ gɔrɔ gi Éjipiti tɛrɛ la, ka kɛlɛle abozen lé munu nya we gi, fɛan zo lé ka ke kyɔ, a zo.

²¹ Yé Gakelebale bli fli an ma kalé we ma; yé ébo ’nyɔɔn léé, maa ’ka dan Juudɛn kini lɛ lo, yé maa ’ka dan wɔra lɛ tɛrɛ zin lé é a nɔ ka lɛ kalé tɔnɔfɛ nya, a ta lo.

²² Amalé maa dan ga lɛ tɛrɛ ’ko la ’ko; maa ’ka dan Juudɛn kini lɛ lo; naa, ka dan a kini lɛ yé tɛrɛ zin bɛ, é dan kɛlɛ lɛ kazé nya.

²³ ’Ka yuɛ pa kabo va, gipawe lé Gakelebale, kalé Bale a kɛlɛ ka va, té é saan ka gi lo; miyili valé fɛ foto lé Gakelebale, kalé Bale a kɛlɛle yi ga ka lee, té ka wo kɛlɛ lo.

²⁴ Naa, Gakelebale, kalé Bale a kyɛ lé éé fɛ faa blé, a nya, é a maawo Bale nya.

²⁵ Dé ka né yaa, dé kalé nénu é né yaa, dé ka mɔn ana tɛrɛ la, dé ka kabo sɛrɛ, dé ka miyili nyaa, dé ka fɛofɛan foto kɛlɛ, we lé ke é naané Gakelebale kalé Bale yuɛ gi, dé ka ’bɛ kɛlɛ yé ka a bli fli,

²⁶ ka dan zamaga wo lɛ tɛrɛ lé ka go a si lɛ kazé nya Juudɛn yuu zi bɛ, a ta, ’té ka sele ’ka dɔa mi gi é dɛrɛ lo; kalé tɛrɛla é dan bɔi lɛ a ta, yé ka kulu é dan ga lɛ tata; maa la valé tɛrɛ kɛlɛ anlé wenayezannu nya kyɔ yé wo ka ma we fe.

²⁷ Gakelebale é dan ka nwɛɛn lɛ bɛn bɛnu méléna, yé bɛnnu lé Gakelebale é dan go lɛ ka nya wo va bɛ, ka ’léé é dan kɛlɛ lɛ kiéné ’bɛnu va.

²⁸ Yé ’bɛna mi, balenu lé munu a kɛlɛ gɔlɛ valé yili nya, ’té wo ’ka fɛ yé lo, ’té wo ’ka we maan lo, ’té wo ’ka fɛ blé lo, ’té wo ’ka fɛ manele wo ma gi dɔɔa lo, ka dan wo bɔ lɛ.

²⁹ ’Bɛna sin, ka dan Gakelebale kalé Bale nagini lɛ yé ka dan a ye lɛ, ’té dé ka a nagini ka bli faa valé kaboen faa nya.

³⁰ Dé ka a nyané blena, dé we tɔntɔn ’konu faa bɔ ka ma, yi voélanu gi ka dan nɔla lɛ Gakelebale kalé Bale va, yé ka dan ka tɔné dɔ lɛ a dére lɛ;

³¹ naa, Gakelebale, kalé Bale a nyanai zén mi ta Bale nya, yé é ’ka dan sɔn vɔ lɛ ka ma lo, yé é ’ka dan ka kulu ga lɛ lo; gipawe lé é a kɛlɛ ka tranu va, ’té ébo ’nyɔɔn a gi bɛ, a sele ’ka dan saan lɛ a gi lo.

³² We namɔnle kwakwa kyɛn lé é kɛlɛ, ’té wo ’ka tan ka yaa lɛ lo, é sia yian nya lé Kazambale mi kɛlɛ tɛrɛ la, yé é sia la glɛ do ma yé é bɔ a glɛ koɛ ma, ’ka nagini yé ’ka fe: ’bɛ zo we blɛnblɛnnu bɔ é vinin doo? wo ’bɛ zo we vinin ’maa?

³³ É kɛlɛ tan gɔnɔ do léé, bɛn do Kazambale dére ’ma wefena kyɛ méléna bélé ka a ’ma fɛan zo, a zo, yé wo vo é yuɛmaa?

³⁴ Bale do éé kwa kulian léé, ’é bɛn do sié bɛn do méléna bélé fɛan zo lé é ka sié ’ko, a zoo? yé wo kɛlɛ ézé nya, mi gidanle koo, tɔmasenu koo, gyɛzorowenu valé gulidanlenu koo, wo nya, ’té éé bɛ soian, ’té éé bɛ plɛplɛ nagɔɔn‐an, ’té éé di kinié mi gi wenu kɛla, fɛan zo lé Gakelebale, kalé Bale a kɛlɛ ka lɛ Éjipiti tɛrɛ la yé ka a ye ka yuɛ nya, a zoo?

³⁵ Ka a we ’konu faa nayezannu nya, kalé a gi dɔɔle we gi léé, Gakelebale a Bale nya, yé bale bɛ ’ka lo.

³⁶ Kazambale a kɛlɛ léé, ka ’é dére ’ma la gi, we paale ka gi we ma; yé é a kɛlɛ léé, ka ’élé kyɛ blɛn ye tɛrɛ la, yé ka ’é dére ’ma wefena kyɛ méléna.

³⁷ Ka tranu sɔ a lɛ, yé wo kulunu lé wo vo wo zuo, é wo si a va; yeebozen ɛ ka fwi Éjipiti tɛrɛ la élé plɛplɛ blɛn nya.

³⁸ Bɛnnu lé wo kiɛre valé wolé plɛplɛ mini ka ta, é wo bin ka ’lɛ, léé, ’ka wɔra wolé tɛrɛ la yé ’é kɛlɛ kazé nya, fɛan zo lé ka ye kyɔ, a zo.

³⁹ Amalé, kyɔ ka gi dɔɔ ma, yé ’é vo ka bli gi léé, Gakelebale a Bale nya ma; é a Bale nya la gi yé é a Bale nya tɛrɛ la, bale bɛ ’ka lo.

⁴⁰ ’Ka dɔ alé bélidɔwenu ta ma, yé ’ka a sɔnnénu pa ma; maa wo gɔɔn ka lɛ kyɔ; dé ka kɛlɛ, ka gi é dan nana lɛ, ka valé kalé nénu nya ka zuo, yé ka dan mɔn lɛ, tɛrɛ lé Gakelebale kalé Bale a nɔ ka lɛ, a ta.

⁴¹ Yé Moizi fla yaa si a va Juudɛn yuu zi, yirinwanazia, yé wo kɛlɛ migyɛzan yɔɔlafla nya;

⁴² dé mi do é bɔluzan gyɛ, ’té é ’ka a nyanézan nya é kyɛn lo, yé é ’ka a gyɛ lɛ ébo yuɛ va lo, é bɔaléé, ’é vlan buru yee fla yaa ’ko va fla do ta yé é béli.

⁴³ Flanu lé Moizi a si a va, wo lé ke ’ko: Bɛsɛɛ lé ’bɛ ke bwi gi fɛna pɛblɛɛna, Rubɛnnu lé tɛrɛ la, ’bɛ a do; Ramɔt lé ke Galaad tɛrɛ la, Gadnu va, ’bɛ a do; Golan lé ke Bazan tɛrɛ la, Manasénu va, ’bɛ a do.

Wo bélidɔwe vu gi fe é ziin

⁴⁴ Bélidɔwe lé Moizi a nɔ Izraɛl lé nénu lɛ, yee lé ke ’ko.

⁴⁵ Bale lé wenu lé Moizi a gɔɔn Izraɛl lé nénu lɛ, wo fwile Éjipiti tɛrɛ la zuo, alé weplalenu valé alé bélidɔwenu valé wo gɔnɔlawenu nya, wo lé ke bɛ.

⁴⁶ We ’ko kɛlɛ, ’té wa Juudɛn yuu zi ’ko, gɔnu worona, Bɛt‐Péɔɔ yara; Amorénu nwiinzan Sioni lé é nyana é vinin Esibɔn, ’té Moizi valé Izraɛl lé nénu a gyɛ guli nya wo fwile Éjipiti tɛrɛ la zuo, Bɛt‐Péɔɔ a yee Sioni lé tɛrɛ la.

⁴⁷ Izraɛl lé nénu Sioni valé Bazan mununwiinzan Ɔg lé tɛrɛnu si. Amorénu nwiinzan fiénu ’ko, wa Juudɛn yuu zi ’ko, yirinwanazia.

⁴⁸ Wolé fɛna péli sia Aroɛɛ lé ke Aanɔn yuu gɔ la, a ma, yé é go fɔɔ yé é bɔ Siɔn gɔ lé ke Eɛmɔn nya, a ma;

⁴⁹ wolé fɛna lé ke fɛna pɛblɛɛ lé ke Juudɛn yuu ’lɛ zia, yirinwanazia, a nya, fɔɔ yé é go yé é bɔ wɛyi lé ke fɛna pɛblɛɛna Pizga gɔ nyana ma bɛ, ana.