Bélidɔwesɛbɛ Fiézan 34 - Kazambale lé Sebe Sauunu 1979

Moizi gale

¹ Moizi si Moab lé fɛna pɛblɛɛna, yé é Nébo gɔ gié, fɔɔ yé é bɔ Pizga gɔ nwiin, Jériko yara. Yé Gakelebale tɛrɛ faa gɔɔn a lɛ:

² é sia Galaad tɛrɛ ma fɔɔ yé é bɔ Dan zé ma, ’bɛ koo, Néfitali lé tɛrɛ faa koo, Éfraim valé Manasé lé tɛrɛ koo, é sia Juda lé tɛrɛ faa ma yé é bɔ yirivɔnazia wɛyi ma, ’bɛ koo,

³ yirinwana bɛyilazia tɛrɛ koo, Juudɛn yuu ma tɛrɛnu koo, Jériko gɔ gurui tɛrɛ koo, é sia yɔwuofla ma fɔɔ yé é bɔ Soaa, ’bɛ koo, é wo faa gɔɔn a lɛ.

⁴ Gakelebale lé a lɛ léé: Tɛrɛ lé maa anbo ’nyɔɔn léé, maa nɔ Abraam koo, Izak koo, Jakɔb koo, wo lɛ, a fele nya léé, maa dan a nɔ lɛ i nénénu lɛ, yee tɛrɛ lé ke bɛ. Maa a nagɔɔn i lɛ, bé ye i yuɛ nya, naa, i ’ka dan i gane zun lɛ ana lo.

⁵ Gakelebale wuozan Moizi ga ’bɛna, Moab tɛrɛ la, Gakelebale a fe fɛan zo, a yɛrama.

⁶ Yé Gakelebale a pa gɔ gurui, Moab tɛrɛ la, Bɛt‐Péɔɔ yara. Mi do kpen ’ka a vun ye lɛ lo, fɔɔ kyɔ yi nya.

⁷ Moizi ga aan wo, ’té a lɛɛ a yɔ suiɛdo; a yuɛ gi gunu ’ka dɔra lɛ pelo, yé a fuu ’ka si lɛ a ta pelo.

⁸ Izraɛl munu Moizi wuvɔ yi yɔ do wɔlɛ vu Moab lé fɛna pɛblɛɛna; yé Moizi wuvɔle valé a gyɛboyi ’konu lɛ sɔɔ.

⁹ Moizi é bɛ pla Nɛn be Jozué ta, amalé é fan wedɔɔle baba nya. Izraɛl munu a lɛdɔama, yé dére lé Gakelebale a fe Moizi lɛ, wo a ta tawo.

¹⁰ Balelayezan lé é ke Moizi zo, ’té yee valé Gakelebale é ke dɔɔ wo ke yara, ’bɛzozan bɛ ’ka bɔra lɛ Izraɛl lo.

^11-12 Tɔmasenu valé gyɛzorowenu lé Gakelebale Moizi pa zia wo kɛlɛle we gi Éjipiti tɛrɛ la, Faraɔn koo, a wuomunu koo, alé tɛrɛ faa koo, wo ma, mi bɛ lé ’bɛ é ’bɛzowe ’konu kɛla, é ’ka lo; yé é ziin, kanazénmigiwe blɛnblɛnnu faa lé Moizi a kɛlɛ é bɛ plɛplɛ nya Izraɛlnu faa yuɛ va, mi lé ’bɛ é ’bɛzowe kɛla, ’bɛzan ’ka lo.