Bélidɔwesɛbɛ Fiézan 33 - Kazambale lé Sebe Sauunu 1979

Moizi munu drɔɔ vo balelawefele nya

¹ Kazambale lé mi Moizi Izraɛl lé nénu drɔɔan vo ’é gale ’lɛ, yee lé ke ’ko:

² É léma: Gakelebale si Sinai; É nwa Séii wolé we gi, Élé fuasan gɔɔn Paran gɔ la, É bɔra mi sauun kiɛre kiɛre méléna; Bélidɔwe lé é ke bélé kyɛ zo, é a pa wo lɛ zia é bɛ nya.

³ Iin, munu sɔ a lɛ; Alé mi sauunnu a a lee. Wo dɔ a gane sɔnɔ Wo a dére ’ma.

⁴ Moizi bélidɔwe nɔ ko lɛ, Yee lé ke Jakɔbnu lé tɔnɔfɛ nya.

⁵ É a minwiinzan blɛn nya Izraɛl tɛrɛ la, Bléyian va lé munu nwiinzannu zén ékeva, Wo valé Izraɛl bɛnnu nya, a bléyi va.

⁶ Rubɛn ’é vo é yuɛma ma, té é ga lo ma, Alé munu ’é kɛlɛ kiɛre ma.

⁷ We lé é a fe Juda lé we nya yee lé ke ko: Oo Gakelebale, ’i tɔné dɔ Juda dére lɛ, Yé ’i da a nya élé munu va. A bɛ ’é kɛlɛ plɛplɛ ma, A nyanézannu lé wo nwa a ma, ’i bɔ a va wolé we ma ma.

⁸ É lé Lévi lé we ma léé: Tumim valé urim, wo bɛ a é pale mi sauun lé, I a gi dan Masa ’Té ka za kɛlɛ a nya Mériba lé ’yinu sɔnɔ bɛ, a lee.

⁹ Lévi lé ’é ti valé ’é bu lé we ma léé, É ’ka wo ye lɛ lo. É ’ka ’é bwenu ma kunna yé lo, É ’ka ’élé nénu dɔɔa lo. Naa, woo i dére lɛdɔama, Yé woo tawoo ilé gipawe ta.

¹⁰ Wo ilé gɔnɔlawenu paa Jakɔb gi, Yé wo ilé bélidɔwe paa Izraɛl gi. Woo lasikɔrɔ dɔa i nyé ’léé, Yé woo winu kyɛ blé i banna ta.

¹¹ Oo Gakelebale, ’i alé plɛplɛ drɔɔ vo, ’I alé nyanama nyi si ’I a mazannu sowolɛ yéli, Té a nyanézannu é nwa é dɛrɛ monomono lo.

¹² É lé Bɛnjamɛn lé we ma léé: Gakelebale sɔlɛzan lé, É dan nyana lɛ a sɔnɔ duaa, Gakelebale é dan a ta yɔɔ lɛ yifaama, Yé é dan nyana lɛ wo méléna.

¹³ É lé Jozɛfu lé we ma léé: Gakelebale é dan fɛ ’konu nɔ lɛ alé tɛrɛ lɛ, a drɔɔ vole tɔmase nya: La lé blɛ wezan, fli koo, Tɛrɛ la ’yinu va ’yi nɔnɔmi koo,

¹⁴ Yiri lé fɛwezannu va fɛ zimanu koo, Fɛnu lé wo poro éé baan moné ma, moné ma, a va fɛ zimanu koo,

¹⁵ Gɔ kwakwanu gifɛnu va fɛ zimanu koo, Gɔpanénu lé wo’ka nyaan lo, wo gifɛnu va fɛ zimanu koo,

¹⁶ Tɛrɛ valé é tafɛnu faa mafɛnu va fɛ zimanu koo, woo lé. Mi lé ébo nagɔɔn yiliné kwɛɛ va, Alé zin ’é vo Jozɛfu gɔnɔ gi ma, Mi lé é ke é plale é bwenu nwiin, ’é vo a gɔnɔ gi ma.

¹⁷ Jozɛfu lé né vininzan lé é ke bélé dirigɔné zo, ’é tɔ ye ’bɛ ma ma. A bélinu a du bélinu nya, Wo nya lé é dan munu faa gyɛ lɛ, Fɔɔ yé é bɔ tɛrɛ glɛ sina; Wa Éfraim lé mi baa é baa nya, Wa Manasé lé mi wuru é wuru nya.

¹⁸ É lé Zabulɔn lé we ma léé: Zabulɔn, i gi ’é nana ilé tawole gi, Bii, Isakaa, i gi é nana ilé sɔkɔnnu gi.

¹⁹ Wo dan munu laa lɛ léé, ’wo go gɔ nwiin; ’Bɛna lé wo dan saraka tegele bo lɛ, Fɛ lé é ke é fanle wɛyi nya, wo dan a ma tɔnɔ ble lɛ. ’Bɛ valé fɛwezannu lé é ke é yɔɔle nyéné gi, wo nya.

²⁰ É lé Gad lé we ma léé: Mi lé é fɛna blɛn nɔ Gad lɛ, a drɔɔ ’é vo ma. Gad éé yiaan bélé golizrada zo, Éé wi bɛ valé a ’wuo kinié ékema.

²¹ É tɛrɛ fee zin si a va ézé nya, Naa, ’bɛna lé bélidɔwe nɔzan lé tɛrɛ ke. É tawo munu ’lɛ, É Gakelebale lé we tegele lɛ sɔɔ Yé é alé bélidɔwenu lɛ sɔɔ Izraɛl zé nya.

²² É lé Dan lé we ma léé: Dan a golizra boroné zo, Éé baanma Bazan tɛrɛ ta.

²³ É lé Néfitali lé we ma léé: Néfitali, bii lé i kan wezin kiɛre nya, Bii lé, Gakelebale i drɔɔ vo kiɛre, ’I yirivɔnazia valé yirinwana bɛyila zia tɛrɛ si izé nya.

²⁴ É lé Azɛɛ lé we ma léé: Azɛɛ drɔɔ ’é vo Izraɛl munu méléna. Alé we ’é kɛlɛ é bwenu gi néné ma. ’É gane vɔ nyɔnɔ va ma.

²⁵ Ilé laklénu ’é kɛlɛ foliɛwɔlɛ valé zéné nya ma, Yé ’i vo plɛplɛ ilé tɛrɛla faa gi ma.

²⁶ Izraɛl lé Bale bɔmazan ’ka lo, É da la gi yé é bɔ ka va, É da lati ta élé fuasan blɛn tagɔɔnle nya.

²⁷ Bale lé a glɛ ’ka lo, é a mi vɔzizan nya, Yé woo yɔɔan a bɛ lé é ’ka nyaan lo, a wuo. É i nyanézan bin i ’lɛ, Yé é léé: ’Bé kulu ga.

²⁸ Izraɛl a é nyanale élé fɛna duaa, Jakɔb lé ’yi’wuo vo duunna Tɛrɛ lé woo buruwɔlɛ valé dɔrɔ dɛrɛ yé ana, a ta, Yé alé la éé fli vɔa.

²⁹ Izraɛl, izé a néné, de ɛ ke bélé bii zoo? Munu lé Gakelebale wo si we gi, ka lé. ’Té yee ɛ ke ka botakuunfɛ nya, ’Té yee ɛ ke ka tɔbɔgwɔun nya, de ɛ ke bélé bii zoo? Ka nyanézannu wo dan ’wo ’wuo wɔra lɛ ka gane wuo, Yé ka dan wolé gɔnwiin yobannanu zɔn lɛ ka gane nya.