Bélidɔwesɛbɛ Fiézan 32 - Kazambale lé Sebe Sauunu 1979

Moizi lɛrɛ vɔ

¹ Lanu, ’ka an ban ka tɔné nya yé maa dan we fe lɛ; Tɛrɛ, ’i tɔné dɔ an ’léé dére lɛ.

² Anlé weplale ’é sɔɔla tɛrɛ la bélé lɛɛ zo, An dére ’é zana bélé fli zo ma, Bélé lɛɛ lé kalugoro dale zo luyɛ ta, Bélé bakinima lɛɛ dale zo lu ta.

³ Naa, maa dan Gakelebale tɔ zana dɔɔ lɛ, ’Ka kolé Bale tɔ zin fe.

⁴ É a bélé gɔlɛ zo; gun ’ka a kɛlɛwenu ma lo, Alé tawobɛ faa a tegele, azama; É a Bale lé éé yara paan we la, ’té weple ’ka a gi lo, a nya. É a tegele, é a é drɔle.

⁵ Dé alé nénu wobo sɛrɛ, a pai kaan lo; Alé nénu bozen lé yaragyɛwe lé, Viébɛn lé; bɛn sɛrɛle lé.

⁶ ’Tugyɛzannu lé ka ’ka we dɔɔa lo, ’Bɛ zo lé ka we lɛgi paan Gakelebale maa? Ka ti kaan loo? Ka Kɛlɛzan kaan loo? Yeean é ka ’lɛrɛ loo? Yeean é ka dɔ plɛplɛ loo?

⁷ Bléyi kyɛn sele ’é dɔ ka gi ma, ’Ka lɛɛ kyɛnnu giwenu zuo fe é ke zuo é ke zuo, ’I we laa i ti lee yé é dan we paa lɛ i gi, ’I we laa mi kwanu lee yé wo dan a fe lɛ i lɛ.

⁸ Dé Loruzan bɛnnu lé tɛrɛ nɔ, Dé é munu gi bɔi nuu, É munu lé tɛrɛ glɛ dɔ Izraɛl lé nénu ’léé yɛrama.

⁹ Naa, Gakelebale zé lé ke élé munu nya; Jakɔb ɛ ke azé tɔnɔ nya.

¹⁰ Gakelebale Izraɛl ye bwi gi, Fɛana lé mi do kpen ’ka lo, ’té tɛrɛ éé siaan kanale nya, ana; É a pa, ’té é a a zi; É a takuun bélé é yuɛ zooné zo,

¹¹ Gola éé sile paan élé nénu gi fɛan zo ’Té éé nɔɔan wo zi, ’Té é é bɛa soian wo kunle we ma, ’Té éé wo sian é bɛa ta, Gakelebale a kɛlɛ a zo.

¹² ’Bɛ zo lé Gakelebale do kpen éé goo élé munu nya, ’Té bale bɛ do ’ka a va lo.

¹³ É go wo nya loru, Yé Izraɛl bwiifɛnu ble; Zɔrɔnyɔnɔ lé éé sié gɔlɛ gi koo, Nyɔnɔ lé éé sié gɔlɛ plɛplɛ baba gi koo,

¹⁴ Dirinyɔyi valé ’bla nyɔyi koo, ’Blané nyɔnɔ koo, Bazan lé ’blagɔnénu valé boligɔnénénu koo, Burupun zin koo, Bale a faa nɔ Izraɛl lɛ; Yé nwɛ lé é ke dɔrɔporo’yi nya, bé mini.

¹⁵ Izraɛl bua, yé é nwa Bale ma; I bua, yé i zén‐i, yé i laala gyɛ; Yé é sɔn vɔ ’é Kɛlɛzan Bale ma, É é siéwegi Gɔlɛ vo ’é yuɛ zuo,

¹⁶ Wo Bale lé maawole nwa bale bɛnu nya, Wa bli fli bozowenu nya;

¹⁷ Miyilinu lé wo ’ka Bale nya lo, wo wo ban, Balenu lé wo ’ka wo dɔɔ lɛ é vinin lo, Bale dɛrɛnu lé wo da lao bɛ, ’Té wo tranu ’ka kana lɛ wo lee lo, wo wo ban.

¹⁸ Gɔlɛ lé é i kɛlɛ, i sɔn vɔ a ma, Yé Bale lé é i yaa, i gi san a ma.

¹⁹ Gakelebale a ye, yé a bli fli, Yé é wɛwɛ dɔ é benu valé é lunu ma.

²⁰ É léé: An dan an yara si lɛ wo la, Yé an dan wozé ’wuoplana ye lɛ; Naa, wa bɛn sɛrɛle nya, Wa yuɛi blaan nénu nya.

²¹ Wo anlé maawole nwa fɛnu lé wo ’ka bale nya lo, wo nya, Yé wo an bli fli wolé miyili planu nya; Yé maa, maa dan wolé maawole nwa lɛ, munu lé wo ’ka mi nya lo, wo nya, Yé maa dan wo bli fli lɛ, bɛn lé é ke ’tugyɛbɛn nya, a nya.

²² Wo kyɛ vɔ anlé bliflile ’léé, Yé é dan vo lɛ blena fɔɔ yé é bɔ migalenu nyanana wɔlɛ ma; É dan tɛrɛ valé étafɛnu ble lɛ, É dan gɔ pun faa ble lɛ.

²³ An dan we tɔntɔnnu bɔ lɛ wo ma, An dan anlé sawɔlɛnu faa sɛrɛ lɛ wo ma.

²⁴ Wo dan kwéé lɛ lɔrɔ lee; Kɔlɛ gi kyɛ dɔle valé migyɛgyɛ plɛplɛnu é dan wo gyɛ lɛ; Maa dan bwigiwe nyanénu valé ménénu pa lɛ wo lɛ zia yé ’bɛnu ’é wo gyɛ.

²⁵ Wo dan ga lɛ ’wo kɔlɛ ma gwɔun ’léé, Yé wo dan ga lɛ wo bɔn gi kana nya. Dé é a pɛniɛ nyaoo, dé é a blɛn nyaoo, wolé we a do. Dé é a nyɔ ma né nyaoo, dé gɔné kwa léoo, wolé we a do.

²⁶ Maa nɔ dan a fe lɛ léé, an wo sié ana, fu fɛɛle do kpen nya, Maa dan wo sele saan lɛ munu gi;

²⁷ Naa, an kanaan nyanézan lé sɔnɔ lee, An kanaan léé, dé wo nyanézannu é da ’wo lɔlu plɛn an ma, Yé wa fe léé, ko bɛ a plɛplɛ, Yé ’té Gakelebale an, ’bɛ we ’konu faa kɛlɛ lo.

²⁸ Wa bɛn lé wo ta ke é vole, wo nya, Yé wo gi ’ka é kinile lo.

²⁹ Dé é a lé wo we dɔɔ, ’té we lé wa ’ma, yee lé ke ’ko: Yé ’té wo gi bɔrɔan we lé é dan bɔ lɛ wo ma, a lɛ.

³⁰ Dé wolé Gɔlɛ ’ka wo dan lɛ lo ’naan, Dé Gakelebale ’ka é bɛ si lɛ wo wuo lo ’naan, É kɛlɛ kaa yé mi do éé mi wuru soru zuo bin‐éé? É kɛlɛ kaa yé mi fié éé mi baa soru bin‐éé?

³¹ Naa, wolé gɔlɛ ’ka bélé kozé Gɔlɛ zo lo, Ko nyanézannu boen ’bɛ gi dɔɔ.

³² Wolé dɔrɔyili lé wa suru, wa kulu si Sɔdɔm, Wa si Gɔmɔɔ féi; Wolé dɔrɔporo a laleporo nya, Wolé dɔrɔporo a é nyanale;

³³ Wolé dɔrɔ a méné suiɛ nyi nya, É a ménénwunnu suiɛ la lale nyané nya.

³⁴ An gi é saan ’bɛzowenu ma kaa? É a anlé fɛwezannu va, yé maa lɛ tan wo ta.

³⁵ Dé wo saan Maa ɛ lɛ gi paan, maa ɛ wo banwoo. Naa, wolé we tɔntɔn ye yi bié é pu, Yé we lé é ke wo lɛbɛnna, é ’ka dan mɔn lɛ lo.

³⁶ Gakelebale é dan élé munu lé we ble lɛ; Dé é a ye léé, wolé plɛplɛ nyaa wo lee, Yé luu valé miné ’ka ana lo, É dan é nyanai zén lɛ é wuozannu ta.

³⁷ É dan a fe lɛ léé: Wo zi bale a kyɛɛn? Wo yɔɔzigɔlɛo, é a kyɛɛn?

³⁸ Wo zi bale ’konu lé wo wolé sarakabowi nyɔnɔ blé turu, ’Té woo ’wo bandɔrɔ minian, wa kyɛɛn? ’Wo nwa, ’wo bɔ ka va ma, ’Wo ka takuun ma.

³⁹ Amalé, ka gi dɔɔ léé, maa ɛ ke Bale nya, Yé bale bɛ ’ka lo; Maa ɛ mi voo é yuɛma, yé maa ɛ mi gya, Maa ɛ mi tuoan, yé maa ɛ mi bélié, Yé mi do kpen ’ka bɔa mi sile lɛ an lee lo.

⁴⁰ Naa, maa an bɛ nwa la vazia, Yé maa léé: Maa a é yuɛma lɛɛfaama, ’bɛ glɛ ’ka lo.

⁴¹ Dé maa anlé gwɔun lɛ vɔ Yé dé an kun we tegele kɛlɛle ma, Maa dan anlé we lɛgi pa lɛ an mazannu ma, Yé an dan we lɛdɔ lɛ an zapamunu gi;

⁴² Anlé gwɔun é dan wo nɛ so lɛ a ma, Mi tuolenu koo, luunu koo, An nyanézannu nwiinzannu ’wuonu koo, Wo nyɛ é dan zén lɛ anlé sawɔlɛnu ma bélé nwɛgyɛzan ma kyɛyee bɔle zo.

⁴³ Bɛnnu, ’ka alé munu tɔ zin fe lɛrɛ vɔle nya. Naa, Gakelebale é wuozannu nyɛ lɛgi paan, Yé é we lɛgi paan ’é mazannu ma, Yé alé tɛrɛ koo, alé munu koo, Éé wolé wenyané ’yiboo.

⁴⁴ Moizi da yé é lɛrɛ ’ko faa vɔ munu lɛ; ’té Nɛn be Jozué a a va.

Moizi lé we pla dére voélazannu

⁴⁵ Moizi nyaa lɛrɛ ’ko faa vɔle nya Izraɛl munu faa lɛ aan wo, é léé: Dére ’konu faa lé maa wo fe ka lɛ kyɔ ’ko,

⁴⁶ ’ka wo pa ka bli gi; ’ka wo paa kalé nénu gi, léé, ’wo bélidɔwe dére ’ko faa lɛdɔma yé ’wo a ta tawo.

⁴⁷ Naa, é ’ka boadére nya ka vazia lo; ka vo é yuɛma we lé; ’bɛ nya lé kalé yinu é dan kɛlɛ lɛ kiɛre, tɛrɛ lé é dan kɛlɛ lɛ kazé nya, kalé Juudɛn kinile zuo, ana.

⁴⁸ Yee yi duo nya, Gakelebale we fe Moizi lɛ yé é léé:

⁴⁹ Abarim munu lé gɔ lé wa laama Nébo gɔ, ’té é ke Moab tɛrɛ la Jériko yara bɛ, ’i go a nwiin, yé Kanaan tɛrɛ lé maa dan a nɔ lɛ Izraɛl lé nénu lɛ wozé nya, yé bé nagini.

⁵⁰ Gɔ ’ko lé i dan go lɛ a gié lɛ bɛ, i dan ga lɛ a nwiin, yé i dan go lɛ ilé munu va, bélé i bwe Arɔn zo; ’bɛ ga Ori gɔ nwiin, yé ’bɛ go élé munu va.

⁵¹ Ka wenyané kɛlɛ an ma Izraɛl lé nénu méléna, Mériba ’yi sɔnɔ, Kadɛs, Tisɛn bwi la, yé ka ’ka an kɛlɛ lɛ blɛn Izraɛl lé nénu yuɛ gi lo, amalé we ’ko bɔ ka ma.

⁵² I dan tɛrɛ ye lɛ i ’lɛ, naa, tɛrɛ lé maa dan a nɔ lɛ Izraɛlnu lɛ, i ’ka dan bɔ lɛ a ta lo.