Bélidɔwesɛbɛ Fiézan 31 - Kazambale lé Sebe Sauunu 1979

Jozué kɛlɛ Moizi paizan nya

¹ Moizi we fe Izraɛl faa lɛ é ziin, yé é léé: Kyɔ na, an lɛɛ yɔ suiɛdo lo;

² an bɛ ’ka sɔa we do kɛlɛle nya é dɛrɛ lo, yé Gakelebale a fe an lɛ léé, an ’ka dan Juudɛn ’ko kini lɛ lo.

³ Gakelebale, kalé Bale bozen é dan tawo lɛ ka ’lɛ, é dan bɛn ’konu kulu ga lɛ ka ’lɛ, yé é dan ka kɛlɛ lɛ wo nwiinzannu nya. Jozué é ziin, ’bɛ é dan tawo lɛ ka ’lɛ, Gakelebale a fe fɛan zo, a zo.

⁴ Amoré mununwiinzan Ɔg valé Sioni lé, Gakelebale woo valé ’wolé tɛrɛ sɛrɛ bɛ, Gakelebale we kɛlɛ wo lɛ fɛan zo, é dan we kɛlɛ lɛ bɛn ’konu lɛ a zo.

⁵ Gakelebale é dan wo pa lɛ ka lee, yé ka dan we kɛlɛ lɛ wo lɛ dére faa lé maa a fe ka lɛ, a yɛrama.

⁶ ’Kabo dɔ gligli, yé ’ka bli ta dɔ plɛplɛ. Té ka kana wo lee lo, té di ’é kini ka gi wolé we ma lo; naa, Gakelebale, kalé Bale bozen é dan tawo lɛ ka va, é ’ka dan ka vo lɛ é pla lo, é ’ka dan sɔn vɔ lɛ ka ma lo.

⁷ Moizi Jozué laa yé é lé a lɛ Izraɛl faa yuɛ va léé: ’Ibo dɔ gligli, ’i bli ta dɔ plɛplɛ, naa, tɛrɛ lé Gakelebale ébo ’nyɔɔn munu ’konu tranu lɛ léé, é dan a nɔ lɛ wo lɛ, bii ɛ dan go lɛ wo va ana, yé bii ɛ dan wo kɛlɛ lɛ azannu nya.

⁸ Gakelebale bozen é dan tawo lɛ i ’lɛ, yeebozen é dan kɛlɛ lɛ i va, é ’ka dan i vo lɛ é pla lo, é ’ka dan sɔn vɔ lɛ i ma lo; té i kana lo, té gligli ’é zén i gi lo.

É a lé wo bélidɔwe ta fe lɛɛ sɔrafiézannu faa nya

⁹ Moizi bélidɔwe ’ko gyɛ, yé é a nɔ Balebanmunu, Lévi benu lé woo Gakelebale lé gipawe pagikɛsu kɔné sié, wo lɛ, wo valé Izraɛl mi segelenu faa lɛ.

¹⁰ Moizi dére ’ko fe wo lɛ yé é léé: Lɛɛ suiɛdo a sɔrafiézan faa bɔle nya, mivoéboma lɛɛ nya, sɔkɔn lé fɛti kɛlɛbléyi va,

¹¹ bléyian va lé Izraɛl faa éé dan Gakelebale, kalé Bale ’lɛ, fɛna do lé é a si a va, ana, ’bɛ bléyi va lé ka dan bélidɔwe ’ko ta fe lɛ Izraɛl faa lɛ, ’té wa maan.

¹² ’Ka munu faa zén ékeva; gɔnénu koo, lomu koo, nénu koo, bɛn bɛ gi mi lé ke ka va koo, ’ka wo zén ékeva, wolé a ’male we gi, yé ’wo kanale Gakelebale, kalé Bale lee pélisia, yé ’wo bélidɔwe ’konu faa lɛdɔma, ’té woo wo ta tawoo.

¹³ Yé wolé nénu lé wo ’ka bélidɔwe ’ko dɔɔa lo, wo dan a ’ma lɛ yé wo dan kanale Gakelebale, kalé Bale lee pélisia lɛ, tɛrɛ lé ka dan a kɛlɛ lɛ kazé nya kalé Juudɛn kinile zuo, yi faa lé ka kɛla a ta, a gi.

We voélazannu lé Bale a fe Moizi lɛ

¹⁴ Gakelebale lé Moizi lɛ léé: Bé gini, i gabléyi bɔ é pu. ’I Jozué laa, yé ’ka da a nya zén‐ékevasɔkɔn gi. Maa dan an dére fe lɛ a lɛ. Moizi valé Jozué go zén‐ékevasɔkɔn gi,

¹⁵ Gakelebale da lati pɔrɔlɔ gi zén‐ékevasɔkɔn gi; yé lati pɔrɔlɔ dɔ zén‐ékevasɔkɔn ’léé.

¹⁶ Gakelebale lé Moizi lɛ léé: Bé gini, i dan yi gyɛ lɛ i tranu va. Yé munu ’ko é dan nwa lɛ yé bɔrɔdɛ le éé goo gɔnénu zuo fɛan zo, wo dan go lɛ bale bɛnu zuo a zo, tɛrɛ lé wo dan bɔ lɛ a ta, ana. Wo dan sɔn vɔ lɛ an ma, yé anlé gipawe lé maa a kɛlɛ wo va, wo dan a sɛrɛ lɛ.

¹⁷ ’Bɛ yi la, an bli é dan fli lɛ wo ma. An dan sɔn vɔ lɛ wo ma yé maa dan an yara si lɛ wo ta, yé we é dan wo mini lɛ. Wenaané valé kleblele kiɛre é dan bɔ lɛ wo ma yé wo dan a fe lɛ léé, ’wolé Bale ’ka ’wo va lo, bɛwemalé wenaanénu ’ko ke bɔna ’wo ma, yee kaan loo?

¹⁸ Maa dan an yara si lɛ wo ta ’bɛ yi ’ko la, wenyané faa lé wa kɛlɛ gole nya bale bɛnu zuo, a we ma.

¹⁹ Sin, ’bé vɔ lɛrɛ nya. ’Bé paa Izraɛl lé nénu gi, ’é vɔ wo ’léé, yé lɛrɛ ’ko é dan kɛlɛ lɛ anlé wenayezan nya Izraɛl lé nénu ma.

²⁰ Naa, an dan go lɛ munu ’konu nya tɛrɛ lé maa anbo ’nyɔɔn wo tranu lɛ léé, maa dan a nɔ lɛ wo lɛ, a ta. Tɛrɛ nyɔnɔzan lé. Wo dan fɛ ble lɛ, wo dan kan lɛ, wo dan bua lɛ. ’Bɛ zuo wo dan nɔla lɛ yé wo go bale bɛnu zuo, ’té woo wo bɔa; wo dan ’wo lɔlu plɛn lɛ an ma, yé wo dan anlé gipawe sɛrɛ lɛ;

²¹ naa, dé wenaané valé kleblele kiɛre bɔ wo ma, lɛrɛ ’ko lé a sele ’ka dan saan lɛ wo gi monomono lo, ’té é a wo kulunu ’léé bɛ, é dan kɛlɛ lɛ anlé wenayezan nya munu ’konu ma. Wo bli a fɛan zo, maa dɔɔ, ana a é gɔɔnle kyɔ tɛkɛ, ’té maa ’ka boenwo tan wo wɔra lɛ tɛrɛ lé maa anbo ’nyɔɔn léé, maa dan a nɔ lɛ wo lɛ bɛ, a ta lo.

²² A yi ’ko la, Moizi lɛrɛ ’ko vɔ, yé é a vɔle paa Izraɛl lé nénu gi.

²³ Gakelebale é dére ’konu vo Nɛn be Jozué va. É léé: ’Ibo dɔ gligli, ’i bli ta dɔ plɛplɛ, naa, bii ɛ dan go lɛ Izraɛl nya, tɛrɛ lé maa anbo ’nyɔɔn léé, maa dan a nɔ lɛ wo lɛ, a ta; yé maaboen é dan kɛlɛ lɛ i va.

²⁴ Dé Moizi nyaa bélidɔwe ’ko gyɛle nya sɛbɛ gi faa,

²⁵ é dére ’konu vo Lévinu lé woo Gakelebale lé gipawe pagikɛsu kɔné sié, wo va, léé:

²⁶ ’Ka bélidɔwe sɛbɛ ’ko si, ’ka a pa Gakelebale, kalé Bale lé gipawe pagikɛsu bɛ do la, yé ’bɛna lé é dan kɛlɛ lɛ wenayezan nya ka ma.

²⁷ Naa, maa kalé nwamimabli valé ka tɔnégiyuyu dɔɔ. Dé ka nwa Gakelebale ma bléyian va lé maa a é yuɛma ka méléna, an gale zuo zé ’ka dan mini lɛ loo?

²⁸ ’Ka ka bɛn gi mi segelenu faa valé kalé kominu zén ékeva an ’lɛ; maa dan dére ’konu fe lɛ wo yuɛ va, yé maa dan la valé tɛrɛ si lɛ anlé wenayezannu nya wo ma.

²⁹ Naa, maa a gi dɔɔ léé, an gale zuo, ka dan kabo sɛrɛ lɛ; yé tawobɛ lé maa a gɔɔn ka lɛ, ka dan si lɛ ’bɛ zuo; we lé ke naané Gakelebale yuɛ gi, dé ka ’bɛ kɛlɛ fɔɔ yé ka Bale bli fli ka bɛ kɛlɛfɛnu nya, é dan nyaa lɛ wenaané bɔle nya ka ma.

³⁰ Moizi lɛrɛ ’ko vɔ wo lɛ, yé é a faa ’wuo pla a zo, ’té Izraɛl munu faa a é zénle ékeva.