Bélidɔwesɛbɛ Fiézan 30 - Kazambale lé Sebe Sauunu 1979

Blivolɛdérenu — Wepladére plɛplɛnu

¹ Dé we ’konu faa bɔ ka ma, ’té ka a bɛnnu lé Gakelebale, kalé Bale ka zunwo wo méléna bɛ, wo va, dé drɔɔvodére valé balepadére lé maa wo fe ka lɛ kyɔ ’ko, dé wo sele dɔ ka bli gi,

² dé ka da Gakelebale va é ziin, dé ka a dére lɛdɔma ka bli faa valé ka boen faa nya, ka valé kalé nénu nya, we faa lé maa a fe ka lɛ kyɔ, a yɛrama,

³ Gakelebale, kalé Bale nyanai é dan zén lɛ ka ta, yé é dan ka si lɛ luu gi é ziin, yé é dan ka si lɛ munu faa lé é ka sɔɔla wo worona, wo va, yé é ka zén ékeva é ziin.

⁴ Dé Gakelebale, kalé Bale ka bin fɔɔ la glɛ sinaoo, é dan go lɛ ka nagini lɛ ’bɛna, yé é dan ka zén lɛ ékeva.

⁵ Gakelebale, kalé Bale é dan da lɛ ka nya tɛrɛ lé é ke ka tranu zé nya, a ta, yé é dan kɛlɛ lɛ kazé nya; é dan wezin kɛlɛ lɛ ka lɛ, yé é dan ka fan lɛ é mini ka tranu ta.

⁶ Gakelebale, kalé Bale é dan ka valé kalé nénu bli si lɛ wenyané lɛ, yé ka dan Gakelebale, kalé Bale lɔrɔ pa lɛ ka bli faa valé ka boen faa nya, ka vole é yuɛma we ma.

⁷ Gakelebale, kalé Bale é dan balepadérenu ’ko faa dia lɛ ka nyanézannu lé ka za ke wo gi, ’té woo nyané paan ka ta bɛ, wo ta.

⁸ Yé ’kaa, ka dan da lɛ Gakelebale va, yé ka dan a dére lɛdɔ lɛ a ma, yé a sɔnnénu faa lé maa wo fe ka lɛ kyɔ, ka dan wo pa lɛ.

⁹ Gakelebale, kalé Bale é dan kalé fɛ zinnu fan lɛ, kalé nyanama koo, kalé nénu koo, kalé trubɛnu koo, kalé féifɛnu koo, é dan a faa nyian wo lɛ; wezin kɛlɛlɛ ka lɛ é dan kɛlɛ lɛ Gakelebale lé ginanamawe nya é ziin, fɛan zo é a kɛlɛ ka tranu zé bléyi va, a zo,

¹⁰ ’té dé ka Gakelebale, kalé Bale dére lɛdɔma, yé ka a sɔnnénu pa yé a dérenu lé wa gyɛ bélidɔwe sɛbɛ ’ko gi, dé ka wo ta tawo; ’té dé ka nɔla Gakelebale, kalé Bale va é ziin, ka bli faa valé ka boen faa nya.

¹¹ Bélidɔwe ’ko lé maa a fe ka lɛ kyɔ, weboen nya, é ’ka ka kelewe nya lo yé é ’ka plɛplɛ ka ma lo.

¹² É ’ka la gi, yé ka fé léé, de ɛ dan go lɛ la gi yé é a nagini ko lɛ, yé é da a fe ko lɛ yé ko a ta tawoo? lo.

¹³ É ’ka wɛyi zi, yé ka fé léé, de ɛ dan wɛyi kini lɛ yé é a nagini ko lɛ yé é da a fe ko lɛ yé ko a ta tawoo? lo.

¹⁴ Gba, é a fɛ do lé é ke ka sɔnɔ, ’té é a ka ’léé, ’té é a ka bli gi, a nya, kalé a ta tawole we gi.

¹⁵ Vole é yuɛma valé wezin koo, gale valé wenaané koo, maa wo pla ka ’lɛ kyɔ, ’kazé si a va.

¹⁶ Naa, maa fe ka lɛ kyɔ léé, ’ka Gakelebale, kalé Bale lɔrɔ pa, ’ka tawo alé tawobɛ gi, a sɔnnénu koo, alé bélidɔwenu koo, alé gɔnɔlawenu koo, ’ka wo ta tawo, ka vole é yuɛma valé ka fanle we gi, yé tɛrɛ lé ka dan a kɛlɛ lɛ kazé nya, Gakelebale, kalé Bale é dan ka drɔɔ vo lɛ ’bɛ ta.

¹⁷ Naa, dé ka bli si a lɛ, dé ka ’ka a lɛdɔ lɛ a ma lo, dé ka bli go ka nya yé ka dia bale bɛnu ’lɛ yé ka wo bɔ,

¹⁸ maa fe ka lɛ kyɔ léé, ka dan zamaga wo lɛ yé tɛrɛ lé ka dan a kɛlɛ lɛ kazé nya, kalé Juudɛn kinile zuo, ka ’ka dan mɔn lɛ a ta lo.

¹⁹ Maa la valé tɛrɛ si anlé wenayezannu nya kyɔ léé, vole é yuɛma valé gale koo, drɔɔvole valé balepale koo, maa wo pla ka ’lɛ kyɔ. ’Ka vole é yuɛma si a va, ka valé kalé nénu vole é yuɛma we gi,

²⁰ yé ’ka Gakelebale, kalé Bale lɔrɔ pa, yé ’ka a dére lɛdɔma, yé ’ka buvɔ a ma; naa, ka vole é yuɛma valé ka mɔnle tɛrɛ la éé sié ’bɛ ɛ va, yé ’bɛ zo lé ka dan nyana lɛ tɛrɛ lé Gakelebale ébo ’nyɔɔn ka tranu Abraam koo, Izak koo, Jakɔb koo, wo lɛ léé, é dan a nɔ lɛ wo lɛ, a ta.