Bélidɔwesɛbɛ Fiézan 3 - Kazambale lé Sebe Sauunu 1979

Wo Bazan tɛrɛ si

¹ Ko nɔla yé ko gié Bazan tɛrɛ lé zi ta loru zla. Bazan mununwiinzan Ɔg valé élé munu faa da zi dɔ lɛ ko ’lɛ Édréi, gulidanle ko va we gi.

² Gakelebale lé an lɛ léé, té maa kana lo, naa, Ɔg valé élé munu faa koo, wolé tɛrɛ koo, ’é wo pa an lee; é léé, fɛan zo lé maa kɛlɛ Amorénu nwiinzan Sioni lé é ke é nyanale Esibɔn, a lɛ yi la, a zo duo lé ’maa kɛlɛ Ɔg lɛ.

³ Gakelebale, kolé Bale Bazan mununwiinzan Ɔg pa ko lee, yee valé élé munu faa nya; ko wo gyɛ yé wo va mi do kpen ’ka so lɛ a ta ko lee lo.

⁴ Yé ko alé flanu faa si é ziin, a do lé ’bɛ ko kele, ’bɛ ’ka lo; fla yɔ yaa lé; ’bɛ gi léé, Aagɔb tɛrɛ faa lé; Bazan mununwiinzan Ɔg lé tɛrɛ faa lé ko si.

⁵ Fla ’konu faa a plɛplɛ; gɔrɔ torole a é bole wo zi, ’té wo duolinu valé wo lɛtan foliɛwɔlɛnu a; yé é ziin, flanu lé gɔrɔ ’ka é bole wo zi lo, wa kiɛre.

⁶ Ko wo faa gyɛ, fɛan zo lé ko kɛlɛ Esibɔn mununwiinzan Sioni lɛ, a zo; gɔnénu koo, lomu koo, né kiénénu koo, ko wo faa gyɛ.

⁷ Naa, winu faa valé flanu ta gulizarafɛnu lé ko wo si kozé nya.

⁸ Ko Amorénu nwiinzannu fié kele ’bɛ bléyi va fɛan zo, yee lé ke bɛ. Wolé tɛrɛ a Juudɛn ’lɛzia, é sia Aanɔn yuu ma fɔɔ yé é bɔ Eɛmɔn gɔ ma;

⁹ Sidɔn munu éé Eɛmɔn gɔ laama Siriɔn, yé Amorénu a tɔ laan Sénii.

¹⁰ Bwi la flanu koo, Galaad tɛrɛ koo, ko wo si, yé ko Bazan tɛrɛ lɛ do si fɔɔ yé ko bɔ Salaka valé Édréi ma. Salaka valé Édréi a Bazan tɛrɛ nwiinzan Ɔg lé fla kenu nya.

¹¹ Bazan mununwiinzan Ɔg a Réfaim munu nyaala nya. Alé yialafɛ lé wa kɛlɛ foliɛwɔlɛ nya, é ’ka Amɔn lé nénu lé fla Rabat loo? A sangi a mɛtrɛ ziɛn é buu yé a ’wuola a mɛtrɛ fié, gɔné lé fɛdan mɛtrɛ nya.

Tɛrɛ lé wa si, wa guli

¹² Yé ko tɛrɛ ’ko si kozé nya. É sia Aroɛɛ lé ke Aanɔn yuu gɔ la, ’bɛ valé Galaad gɔ san do valé é ma flanu, maa wo nɔ Rubɛnnu valé Gadnu lɛ.

¹³ Galaad tɛrɛ pɔné valé Bazan mununwiinzan Ɔg lé tɛrɛ faa, maa a nɔ Manasé bɛn lɛgɔnɔ do lɛ; Aagɔb tɛrɛ faa koo, Bazan tɛrɛ faa koo, wana laama Réfaim munu lé tɛrɛ.

¹⁴ Manasé be Jaii Aagɔb tɛrɛ faa si fɔɔ yé é bɔ Gésuunu valé Maakatinu lé tɛrɛ glɛ la, yé é ’ébo tɔ pa Bazan tɛrɛ la flanu ma, yé wo wo laan Jaii lé flanu fɔɔ kyɔ.

¹⁵ Maa Galaad tɛrɛ nɔ Makii lɛ.

¹⁶ Maa Galaad tɛrɛ lɛ do nɔ Rubɛnnu valé Gadnu lɛ; é go fɔɔ Aanɔn yuu ma, yé ’bɛ méléna kɛlɛ a glɛ nya; yé é go fɔɔ Jabɔk yuu ma, ’té ’bɛ ɛ ke Amɔn lé nénu zé glɛ nya.

¹⁷ Maa fɛna pɛblɛɛ nɔ wo lɛ é ziin, ’té ’bɛ glɛ lé ke Juudɛn yuu nya, é sia Kinérɛt fɔɔ yé é bɔ wɛyi lé ke fɛna pɛblɛɛ méléna, ’té wa laan wɛminiélɛ ’yi bɛ, ana, ’té é ke Pizga gɔ nyana ma yirinwanazia bɛ, a ma.

¹⁸ Maa ka béli dɔ yi la léé, Gakelebale, kalé Bale, é tɛrɛ ’ko nɔ ka lɛ léé, ’ka a kɛlɛ kazé nya. ’Kaa sunyanu faa, ’ka tawo Izraɛl lé nénu ’lɛ, ’té gulidanfɛnu a ka lee.

¹⁹ Naa, maa gi dɔɔ léé, kalé trubɛnu a kiɛre; ka nanu koo, kalé nénu koo, kalé trubɛnu koo, wo dan vo lɛ flanu lé maa wo nɔ ka lɛ, wo ta,

²⁰ fɔɔ yé Gakelebale é flinle nɔ ka bwenu lɛ, bélé fɛan zo lé é a nɔ ka lɛ, a zo, fɔɔ yé tɛrɛ lé Gakelebale, kalé Bale a nɔ wo lɛ Juudɛn zi, yé é kɛlɛ wozé nya. ’Bɛ zuo yé ka dan nɔla lɛ kalé fɛna lé maa a nɔ ka lɛ do do, ana.

²¹ ’Bɛ yi la, maa a fe Jozué lɛ léé, we faa lé Gakelebale, kalé Bale a kɛlɛ minwiinzan fié ’konu lɛ, i ’bɛna ye. Tɛrɛnu faa lé ka dan nwa lɛ wo ma, a zo duo lé Gakelebale é dan a kɛlɛ lɛ wo lɛ.

²² Té i kana pelo; naa, Gakelebale kalé Bale, é dan ka ta guli dan lɛ é boan.

²³ ’Bɛ yi la, an nyanainya zanté vɔ Gakelebale ma yé maa léé,

²⁴ Mizan, Gakelebale, ilé blɛn valé i bɛ plɛplɛ, bé péli sia yé bé gɔɔn maa, i wuozan lɛ; dé é a lagi nyaoo, dé é a tɛrɛ la nyaoo, bale kyɛn ɛ ke ana yé é bɔalɛ é i panyanama valé i kɛlɛwe blɛnblɛn zuosonaa?

²⁵ Ilé zanté, ’i zi nɔ an lɛ, ’an gié; ’i zi nɔ an lɛ, tɛrɛ nɔnɔmi ’ko lé ke Juudɛn zi koo, gɔ nɔnɔminu koo, Liban tɛrɛ koo, ’maa wo ye.

²⁶ Naa, kalé we ma lé Gakelebale bli fli an ma yé é ’ka é tɔné dɔ lɛ an lɛ lo. Gakelebale lé an lɛ léé, é sɔ, té maa we ’ko fe ’é lɛ é dɛrɛ lo.

²⁷ É léé, ’maa Pizga gɔ gié, yé ’an dɔ a nwiin loru mi, yé ’maa yuɛ vɔ yirivɔnazia koo, yirinwana bɛyilazia koo, yirinwana bɛbolazia koo, yirinwanazia koo, wona, yé ’maa nagini; naa, maa ’ka dan Juudɛn ’ko kini lɛ lo.

²⁸ É léé, ’maa we fe Jozué lɛ, ’maa fuu dɔ ’bɛ ta, ’maa ’bɛ dɔ gligli; naa, yee ɛ dan tawo lɛ munu ’konu ’lɛ yé tɛrɛ lé maa a ye bɛ, yee ɛ dan a nɔ lɛ wo lɛ wozé nya. A zo lé Gakelebale a fe an lɛ.

²⁹ Ko nyana gɔnu worona, Bɛt‐Péɔɔ yara.