Bélidɔwesɛbɛ Fiézan 29 - Kazambale lé Sebe Sauunu 1979

Gipawe sele dɔle munu gi

¹ Gipawe lé Gakelebale a fe Moizi lɛ léé, ’é a kɛlɛ Izraɛl lé nénu va Moab tɛrɛ la, yee lé ke ’ko, naa, gipawe lé é a kɛlɛ Orɛb gɔ ma, ’bɛ kaan lo.

² Moizi Izraɛlmunu faa laa, yé é lé wo lɛ léé: We faa lé Gakelebale a kɛlɛ ka yuɛ va Éjipiti tɛrɛ la, Faraɔn koo, a wuozannu faa koo, alé tɛrɛ faa koo, wo lɛ, ka ana ye.

³ Migidanwe blɛnnu koo, gyɛzorowenu koo, we blɛnblɛnnu koo, ka wo ye.

⁴ Naa, fɔɔ yi ’ko nya Gakelebale ’ka we’mabli vɔ lɛ ka gi lo, yé é ’ka weyeyuɛ valé we’matɔné nɔ lɛ ka lɛ lo.

⁵ An tawo ka nya bwi gi lɛɛ yɔ fié gi; kalé sɔ ’ka fwi lɛ ka ta lo yé kalé sawala ’ka sɛrɛ lɛ ka gane ma lo;

⁶ ka ’ka buru ble lɛ lo, yé ka ’ka nwɛ valé dɔrɔ mini lɛ lo, kalé a gi dɔɔle we gi léé, maa a Gakelebale, kalé Bale nya.

⁷ Ka bɔ fɛkona; Esibɔn nwiinzan Sioni koo, Bazan nwiinzan Ɔg koo, wo nwa ko ma, gulidanle ko va we ma, yé ko wo gyɛ.

⁸ Ko wolé tɛrɛ si yé ko a nɔ Rubɛnnu koo, Gadnu koo, Manasé bɛn lɛgɔnɔ do koo, wo lɛ.

⁹ Amalé ’ka gipawe ’ko lɛdɔma, yé ’ka a ta tawo, léé, we faa lé ka dan a kɛlɛ lɛ, yé é vɔ a ma.

¹⁰ Ka faa da Gakelebale, kalé Bale ’lɛ kyɔ; ka faa, ka bɛn nwiinmunu koo, kalé mi segelenu koo, kalé kominu koo, Izraɛl munu faa koo,

¹¹ kalé nénu koo, kalé lomu koo, bɛn lé ke kalé fɛna koo, é sia kyɛyélimunu ma fɔɔ yé é bɔ ’yitɔmunu ma, wo faa lé.

¹² Ka da, ka gi pale do we ma, Gakelebale, kalé Bale va; gipawe lé Gakelebale a kɛlɛ ka va kyɔ, ’té woo wɔraan a gi bale ’nyɔɔnle nya, yee lé.

¹³ Dé ka wɔra a gi, ’té ka kɛlɛ kyɔ azé munu nya, ’té yeeboen kɛlɛ kalé Bale nya, é a fe ka lɛ fɛan zo, ’té ébo ’nyɔɔn ka tranu Abraam koo, Izak koo, Jakɔb koo, wo lɛ bɛ, a zo.

¹⁴ Gipawe ’ko lé woo wɔraan a gi bale ’nyɔɔnle nya, é ’ka ka do zé nya lo.

¹⁵ Munu lé wo ke ko va kyɔ Gakelebale, kalé Bale ’lɛ ’ko, wo koo, munu lé wo ’ka kyɔ ko va ’ko lo, wo koo, é a wo faa zé nya.

¹⁶ Ko nyana fɛan zo Éjipiti tɛrɛ la, ka a gi dɔɔ, yé fɛan zo lé ko gié bɛnnu méléna, ka a gi dɔɔ.

¹⁷ Wolé bozofɛnu valé wolé miyilinu lé wo wo kɛlɛ yili valé gɔlɛ koo, gɔɔlifu valé kyan koo, wo nya bɛ, ka wo ye wo va.

¹⁸ Dé gɔné léé, dé le léé, dé migɔnɔ léé, dé bɛn léé, té ka va mi do kpen é bli si Gakelebale kolé Bale lɛ kyɔ yé é go bɛn ’konu lé balenu bɔ lo. Té ziriyili suni valé abisɛntiyili suni é kɛlɛ ka va lo.

¹⁹ Gipawe ’ko lé woo wɔraan a gi bale ’nyɔɔnle nya, dé mi do a ’ma, té ébo kɛlɛ blɛn é bli gi lo, ’té é a fe léé, dé an bli go wean zuooo, dé an nwɛ tanle pa nwɛ minilɔrɔ lé an gyɛle vaoo, an dan vo lɛ drɔɔ lo.

²⁰ Gakelebale ’ka a nyi sié léé, mi ’ko ma we é vo lo. Naa, Gakelebale bli é dan fli lɛ mi ’ko ma yé alé maawole é dan nwa lɛ a ma, yé balepadére faa lé wa gyɛ sɛbɛ ’ko gi, é dan vo lɛ mi ’ko ma, yé Gakelebale é dan a tɔ si lɛ tɛrɛ la.

²¹ Gakelebale é dan alé we tɔntɔn ’wuo pla lɛ a sile nya Izraɛl bɛn faa va, yé balepadére faa lé wa gyɛ gipawe lé bélidɔwe sɛbɛ ’ko gi, wo dan bɔ lɛ a ma.

²² Mikulunu lé wo dan da lɛ, kalé nénu lé ka dan wo yaa lɛ ka zuo, ’wo valé bɛnnu lé wo dan si lɛ tɛrɛ baa la, migyɛgyɛnu valé gyɛnu lé Gakelebale é dan tɛrɛ ’ko la munu gyɛ lɛ a nya, dé wo ’bɛ ye,

²³ tɛrɛ ’ko lé é ke wɛtɛrɛ valé poovun tɛrɛ valé kyɛbletɛrɛ tanale nya, ’té fɛwɔlɛ valé féifɛ ’ka ana lo, ’té lu ’ka bɔraan ana lo, bélé Sɔdɔm koo, Gɔmɔɔ koo, Adima koo, Séboim koo, woo lé Gakelebale wo sɛrɛ élé bliflile valé é wɛwɛ blɛn nya bɛ, wo zo, dé wo ’bɛ ye,

²⁴ ’té bɛnnu ’ko faa é dan a fe lɛ léé, mɛmalé Gakelebale we kɛlɛ tɛrɛ ’ko lɛ a zoo? Mɛmalé alé bliflile kɛlɛ a zo blɛɛn?

²⁵ Yé wo dan a zi pa lɛ wo lɛ léé: Gipawe lé Gakelebale wo tranu lé Bale a kɛlɛ wo va, bléyian va lé é wo si Éjipiti tɛrɛ la, wo sɔn vɔ a ma, ’bɛlé we ma.

²⁶ Bale bɛnu lé wo ’ka wo dɔɔa lo, ’té Gakelebale ’ka a nɔ lɛ wo lɛ lo, wo go wo bɔ lɛ yé wo dia ’bɛnu ’lɛ, ’bɛlé we ma lé é bɔ wo ma a zo.

²⁷ Gakelebale bli fli tɛrɛ ’ko la munu ma, yé balepadérenu faa lé wo wo gyɛ sɛbɛ ’ko gi, é dia wo ta.

²⁸ Gakelebale wo si wolé tɛrɛ la gla nya, bliflile koo, bli tɔntɔn koo, bli nwale blɛn koo, wo nya, yé é wo zun tɛrɛ bɛ la, ka wo ye kyɔ fɛan zo, a zo.

²⁹ Weyɔɔlenu a Gakelebale, kolé Bale zé nya; wenagɔɔnlenu a ko valé kolé nénu zé nya, yifaama, léé, ko tawo bélidɔwe ’konu faa ta.