Bélidɔwesɛbɛ Fiézan 28 - Kazambale lé Sebe Sauunu 1979

Drɔɔvole

¹ Dé ka Gakelebale, kalé Bale dére lɛdɔma, bélidɔwe ’konu faa lé maa wo fe ka lɛ kyɔ, dé ka wo ta tawo, Gakelebale, kalé Bale é dan ka mini lɛ tɛrɛ la bɛnnu faa ta.

² Dé ka Gakelebale kalé Bale dére lɛdɔma, ka valé kalé fɛna drɔɔ é dan vo lɛ fɛan zo, yee lé ke ’ko:

³ Ka drɔɔ é dan vo lɛ fla; ka drɔɔ é dan vo lɛ féi;

⁴ ilé nénu koo, ilé féifɛ koo, ilé trubɛnénu koo, ilé dirinu valé ilé bolinu valé ilé ’blanu fanle koo, wo faa drɔɔ é dan vo lɛ.

⁵ Kalé kyɛɛ valé kalé fɛpun zén‐ikana drɔɔ é dan vo lɛ.

⁶ Dé i bɔ fla, i drɔɔ é dan vo lɛ; dé i zi sia, i drɔɔ é dan vo lɛ.

⁷ Ka nyanézannu lé wo dan nwa lɛ ka ma, Gakelebale é dan a guli ’wuo nɔ lɛ ka lɛ; wo dan wo dazi ye lɛ ka va gulidanle we ma, yé wo gozi ’ka dan ye lɛ lo.

⁸ Gakelebale é dan kalé ’saboo drɔɔ vo lɛ; we faa lé ka a kɛlɛle pélisia, é dan ka drɔɔ vo lɛ ’bɛnu gi. Tɛrɛ lé Gakelebale, kalé Bale a nɔna ka lɛ, é dan ka drɔɔ vo lɛ ’bɛna.

⁹ Ka dan kɛlɛ lɛ munu lé Gakelebale wo pa é yɛrama ézé nya, wo nya, ébo ’nyɔɔn ka lɛ fɛan zo, a zo, ’té dé ka Gakelebale kalé Bale lé bélidɔwenu lɛdɔma yé ka tawo alé tawobɛ faa gi.

¹⁰ Munu faa é dan a ye lɛ léé, Gakelebale tɔ a ka ta, yé wo dan kana lɛ ka lee.

¹¹ Kalé nénu koo, kalé trubɛnénu koo, kalé féifɛnu koo, Gakelebale é dan wo fan lɛ é zima, tɛrɛ lé Gakelebale ébo ’nyɔɔn ka tranu lɛ léé, é dan a nɔ lɛ ka lɛ, a ta.

¹² Gakelebale é dan élé fɛwezan zinnu lɛ so lɛ la gi, yé é dan lɛɛ da lɛ kalé tɛrɛ la a dabléyi nya, yé é dan kalé nyanama faa drɔɔ vo lɛ; ka dan vɛɛn pa lɛ bɛn kiɛre ma yé ka ’ka dan vɛɛn si lɛ wo va lo.

¹³ Gakelebale é dan ka kɛlɛ lɛ ’wuo nya, ka ’ka dan kɛlɛ lɛ péli nya lo; ka dan kɛlɛ lɛ yifaama loru, ka ’ka dan kɛlɛ lɛ tɛrɛ zia lo, ’té dé ka Gakelebale, kalé Bale lé bélidɔwenu lɛdɔma, ’té maa wo fe ka lɛ kyɔ bɛ; dé ka vo wo ta, dé ka wo ta tawo,

¹⁴ we faa lé maa ka béli dɔ wo nya kyɔ, dé ka ’ka nɔla lɛ ka bɛyila valé ka bɛbola yé ka go bale bɛnu zuo yé ka wo bɔ lo, Bale é dan wezin ’konu lɛ sɔɔ lɛ ka lɛ.

Balepale

¹⁵ Naa, dé ka ’ka Gakelebale, kalé Bale dére lɛdɔ lɛ a ma lo, yé bélidɔwenu faa valé a sɔnnénu faa lé maa wo fe ka lɛ kyɔ, dé ka ’ka vo lɛ wo la yé ka wo pa lo, bale lé é dan a pa lɛ ka ma yé é ka kun, yee lé ke ’ko:

¹⁶ Bale é dan pa lɛ ka ma fla; bale é dan pa lɛ ka ma féi.

¹⁷ Bale é dan pa lɛ kalé kyɛɛ valé fɛpun zén‐ikana ma.

¹⁸ Kalé nénu koo, kalé féifɛnu koo, kalé diri valé kalé bolinu valé kalé ’blanu fanle koo, bale é dan pa lɛ wo faa ma.

¹⁹ Dé i bɔ fla ’té bale a é pale i ma; dé i zi sia ’té bale a é pale i ma.

²⁰ We faa lé ka a kɛlɛle pélisia, bale pale koo, di kinié migiwe koo, wenyané lɛ kinile ka lɛ koo, Gakelebale é dan wo faa kɛlɛ lɛ ka lɛ a gi, fɔɔ yé ka kulu é ga yé ka zamaga wo, kalé weple kɛlɛle lé wo ka kun yé ka sɔn vɔ maa, Gakelebale ma, wolé we ma.

²¹ Gakelebale é dan ka gyɛ lɛ migyɛgyɛ nya, fɔɔ yé é ka faa gyɛ tɛrɛ lé ka dan a si lɛ kazé nya, a ta.

²² Fuuné gyɛ koo, kɔlɛ kyɛdɔle koo, lɔlu gyɛ koo, kɔlɛ brɔnbogyɛ koo, misiégigyɛ koo, gyɛkwagyo koo, miwisɛrɛgyɛ koo, Gakelebale é dan ka gyɛ lɛ ’bɛnu nya, yé wo dan vo lɛ ka gɔnɔ gi fɔɔ yé ka zamaga wo.

²³ La gi é dan ga lɛ ka nwiin bélé zéné zo, tɛrɛ é dan ga lɛ ka wuo bélé foliɛwɔlɛ zo.

²⁴ Gakelebale é dan lɛɛ da lɛ ka ta vun valé nyéné nya; é dan si lɛ la gi yé é zun ka ta fɔɔ yé ka guru é zana a gi.

²⁵ Gakelebale é dan zi nɔ lɛ ka nyanézannu lɛ léé, ’wo ka gyɛ; ka gozi é dan ye lɛ gulidanle wo va we ma, yé ka dazi ’ka dan ye lɛ lo; we lé é bɔ ka ma, é dan di kini lɛ tɛrɛ la bɛnnu faa gi.

²⁶ Ka galenu é dan kɛlɛ lɛ la gi mianénu faa valé tɛrɛlawinu faa lé fɛblele nya; mi do kpen ’ka dan wo bin lɛ lo.

²⁷ Éjipiti tɛrɛ lé manɔn koo, flanboragyɛ koo, kwɛɛkwɛ koo, koro koo, Gakelebale é dan ka gyɛ lɛ wo nya yé ka ’ka bɔa bélile lɛ lo.

²⁸ Gakelebale é dan ka ’wuo sɛrɛ lɛ, yé é dan ka yuɛ ’wii lɛ yé é dan ka tavo lɛ;

²⁹ fɛna fu bléyi va ka dan ka bɛ dan lɛ fɛ ma bélé yuɛwiizan a kɛla gunuti va fɛan zo, a zo; we lé ka pélisia, a va ’ka dan gyɛ lɛ ka lɛ lo, yifaama wo dan yaa lɛ ka ta, ’té woo kalé fɛnu kyeen woo, yé ka bɔavazan ’ka dan kɛlɛ lɛ ana lo.

³⁰ I dan le pu dɔ lɛ yé mi bɛ é dan yi gyɛ lɛ a va; i dan kɔn dɔ lɛ yé i ’ka dan nyana lɛ a gi lo; i dan dɔrɔféi pa lɛ yé i gi ’ka dan nana lɛ a poro ma lo.

³¹ Wo dan ilé diri bɔrɔ bo lɛ i yuɛ va yé i ’ka dan a wi ble lɛ lo; wo dan ilé sokofale si lɛ yé wo ’ka dan a nɔ lɛ i lɛ é ziin lo; i nyanézannu é dan ilé ’blanu si lɛ yé i bɔavazan ’ka dan kɛlɛ lɛ ana lo.

³² Bɛn bɛ gi munu é dan i benu valé i lunu si lɛ; ka dan a ye lɛ ka yuɛ nya yé ka yuɛ é dan vo lɛ wo zuo yifaama, yé plɛplɛ ’ka dan ye lɛ i lee lo.

³³ Bɛn lé ka ’ka wo dɔɔa lo, wo dan kalé féifɛnu ble lɛ yé wo dan ka panyanama faa mafɛ ble lɛ, yé wo dan yaa lɛ ka ta yé wo dan ka zɔn lɛ yifaama.

³⁴ We lé é dan kɛlɛ lɛ ka yuɛ va, é dan gwe vɔ lɛ ka ’wuo gi.

³⁵ Gakelebale é dan manɔn naané vɔ lɛ ka powuo valé ka boro gi, yé ka ’ka bɔa bélile lɛ lo; é dan ka gyɛ lɛ, é sia ka ganebuli fɔɔ yé é bɔ ka nwiin.

³⁶ Ka koo, mi lé ka a dɔ ka nwiinzan blɛn nya koo, Gakelebale é dan go lɛ ka nya bɛn lé ka valé ka tranu ’ka wo dɔɔa é kyɛn lo, wo va. ’Bɛna lé ka dan bale bɛnu bɔ lɛ, yilibale valé gɔlɛbalenu lé.

³⁷ Munu faa lé Gakelebale é dan go lɛ ka nya wo va, ka dan kɛlɛ lɛ wo givuruzannu koo, ka bomayérisi?-?zannu koo, plalazannu koo, wo nya.

³⁸ Ka dan fɛwɔlɛ kiɛre vɔ lɛ kalé féi; naa, gangannu é dan wo ble lɛ amalé ka ’ka dan fɛ kiɛre ye lɛ lo.

³⁹ Ka dan dɔrɔféi pa lɛ, yé ka dan ana wo lɛ, naa, ka ’ka dan a poro so lɛ lo, yé ka ’ka dan a ’yi mini lɛ lo, zirinu é dan vɔ lɛ wo gi ’bɛzama.

⁴⁰ Ka dan ɔliviféi pa lɛ kalé tɛrɛ faa la; yé ka ’ka dan a nyɔnɔ gié lɛ ka ma lo, ɔliviporo é dan zana lɛ, ’bɛzama.

⁴¹ Ka dan négɔnénu valé nélomu yaa lɛ; wo ’ka dan kɛlɛ lɛ kazé nya lo, wo dan kɛlɛ lɛ luunu nya, ’bɛzama.

⁴² Yuuɛnénu é dan kalé yiliporo valé kalé féifɛnu ble lɛ.

⁴³ Bɛn bɛ gi mi lé ke ka va, wo plale ka nwiin gi é dan gyɛ lɛ yifaama, yé ka plale wo wuo gi é dan gyɛ lɛ yifaama;

⁴⁴ Wo dan vɛɛn pa lɛ ka ma yé ka ’ka dan vɛɛn pa lɛ wo ma lo; wo dan kɛlɛ lɛ ka ’wuo nya, yé ka dan kɛlɛ lɛ wo péli nya.

⁴⁵ Balepadére ’konu faa é dan ka kun lɛ, wo dan vo lɛ ka ma, yé wo dan kɛlɛ lɛ kazé nya fɔɔ yé ka kulu é ga, ka ’ka Gakelebale kalé Bale dére lɛdɔ lɛ a ma lo, yé alé bélidɔwenu valé a sɔnnénu lé é wo fe ka lɛ, ka ’ka wo ta tawo lɛ yé ka wo pa lo, azama.

⁴⁶ Balepadére ’konu é dan kɛlɛ lɛ tɔmasenu valé we blɛnblɛnnu nya ka valé ka kulunu lɛ lɛɛfaama.

⁴⁷ Bléyian va lé fɛ kiɛre faa a ka lee, ka ’ka Gakelebale, kalé Bale bɔ lɛ ginanale valé bli zin nya lo,

⁴⁸ amalé ka nyanézannu lé Gakelebale é dan wo nwa lɛ ka ma, ka dan nyanama pa lɛ wo lɛ, ’té lɔrɔ valé ’yiminilɔrɔ éé ka gya, ’té ka a é porole, ’té fɛ faa éé vuruan ka ma. Gakelebale é dan foliɛvɔlɛ bale vɔ lɛ ka bɔrɔ ma fɔɔ yé é ka kulu ga.

^49-50 Bɛn do lé ka ’ka wo dére dɔɔa lo, ’té wo yara ke é nyané, ’té wo ’ka mi segele lɛdɔama lo, ’té wo nyanai ’ka zén‐é né ta lo, Gakelebale é dan wo si lɛ baa, tɛrɛ glɛ sina, yé wo dan zun lɛ ka ta bélé gola zo.

⁵¹ Wo dan kalé trubɛnénu valé kalé féifɛnu ble lɛ ka lee fɔɔ yé ka kulu é ga; ’sa koo, dɔrɔ’yi vinin koo, nyɔnɔ koo, dirinu valé ’blanu valé bolinu fanle koo, wo ’ka dan a do kpen vo lɛ ka lee lo, fɔɔ yé ka zamaga wo.

⁵² Wo dan nyana lɛ kalé flanu faa ma fɔɔ yé flagɔrɔ torole plɛplɛ lé ka pale ke wo ta kalé tɛrɛ faa la, yé ’wo wo zana; tɛrɛ lé Gakelebale, kalé Bale a nɔ ka lɛ, wo dan ana flanu faa mabɛn lɛ.

⁵³ Dé ka a kle valé nyané blena ka nyanézannu lee, ka dan kalé nénu ble lɛ; kalé négɔné valé nélomu lé Gakelebale é dan wo nɔ lɛ ka lɛ, ka dan wo wi ble lɛ.

⁵⁴ Ka va mi lé é blefɛ vabo é kyɛn, ’té é ke madrɔɔzan nya, a nyanai ’ka dan zén lɛ é bwe koo, a na lé é ke a blinii koo, alé nénu lé é ’ka tan wo gyɛ lɛ lo koo, wo ta lo;

⁵⁵ alé nénu lé é ke abo blefɛ nya, yé é ’ka dan wo wi nɔ lɛ ’bɛnu va mi do lɛ lo, naa, fɛ do kpen ’ka vo lɛ a lee lo, nyané valé kle lé é ke a blena é nyanézannu lee kalé fla faa ta bɛ, ’bɛ we ma.

⁵⁶ Ka va le lé é ke léabo le nya, ’té éé blefɛ vaboo, ’té a gane ’ka zunwo turu tɛrɛ va lo, sin a nyanai ’ka dan zén lɛ a zana lé é ke a blinii koo, a be valé a lu koo, wo ta lo;

⁵⁷ é dan vuru lɛ fɛ faa gi, bɛwemalé né lé é a yaa, é dan ’bɛ valé né zifɛ ble lɛ, é ’ka dan a nɔ lɛ ’bɛnu va mi do lɛ lo, é dan a ble lɛ éboan kyeen gi, nyané valé kle lé é ke a blena é nyanézannu lee kalé fla faa ta bɛ, ’bɛ we ma.

⁵⁸ Bélidɔwe ’konu faa lé maa wo gyɛ sɛbɛ ’ko gi, dé ka ’ka wo lɛdɔama yé ka wo ta tawo lo, dé ka ’ka kanaan Gakelebale, kalé Bale tɔ blɛn lé é ke kanamatɔ nya, a lee lo,

⁵⁹ Gakelebale é dan ka valé ka kulunu bla lɛ mi gi?-?vurugyɛ blɛn lé é ’ka nyaan é pu lo, é valé mayaagyɛ plɛplɛ lé é ’ka nyaan é pu lo, wo nya.

⁶⁰ Gyɛ faa lé wo Éjipiti munu gyɛ, ’té wo yoyo zén ka gi yi la bɛ, Bale é dan wo vɔ lɛ ka ma, yé wo vo ka gɔnɔ gi.

⁶¹ Yé ’bɛ ta loru, gyɛ gɔnɔ faa valé migyɛgyɛnu lé bélidɔwe sɛbɛ ’ka wo fe lɛ lo, Gakelebale é dan ka gyɛ lɛ wo nya fɔɔ yé ka kulu é ga.

⁶² Yé ka lé ka ke kiɛre é vinin bélé lagi monénénu zo, ka dan vo lɛ sɛ, ka ’ka Gakelebale, kalé Bale dére lɛdɔ lɛ a ma lo, ’bɛzama.

⁶³ Zin kɛlɛle ka lɛ valé ka fanle kiɛre, ’bɛ Gakelebale gi nana é vinin fɛan zo, a zo duo lé Gakelebale lé ka gyɛle zamaga nya valé ka kulu gale é dan a gi nana lɛ. Yé tɛrɛ lé ka dan bɔ lɛ a ta yé é kɛlɛ kazé nya, Bale é dan ka si lɛ a ta gla nya.

⁶⁴ Gakelebale é dan ka sɔɔla lɛ bɛnnu faa suiɛ gi, é sia tɛrɛ glɛ do ma fɔɔ yé é bɔ a glɛ koɛ ma. ’Bɛna lé, ka dan bale bɛnu bɔ lɛ, balenu lé ka valé ka tranu ’ka wo dɔɔa lo, yilibalenu valé gɔlɛbalenu, woo lé.

⁶⁵ Ka ’ka dan vo lɛ drɔɔ bɛn ’konu méléna lo, yé ka ’ka dan ka gane dɔrana ye lɛ lo. Gakelebale ’ka dan ka bli vo lɛ drɔɔ lo, yé é dan ka yuɛi zun lɛ yé é dan gibɔrɔ pa lɛ ka ma.

⁶⁶ Kalé tɛrɛla é dan dɔ lɛ é gane la yifaama, bélioo, yiéyioo, ’té gligli éé zén‐é ka gi, ’té ka ’ka ka bélile gi dɔɔa lo.

⁶⁷ Ka bli fanle di kinile blɛn nya koo, fɛnu lé ka dan wo ye lɛ ka yuɛ nya koo, wolé we ma lé ka dan a fe lɛ bladi léé, dé é a nyanadi nya na, yé ka dan a fe lɛ nyanadi léé, dé é a bladi nya na.

⁶⁸ Gakelebale é dan go lɛ ka nya ’yitagoronu gi Éjipiti tɛrɛ la, yé zi lé é a fe léé, ka ’ka dan a ye lɛ é dɛrɛ lo, ka dan tawo lɛ ’bɛ ta. ’Bɛna lé ka dan kabo yaawo lɛ luugɔné valé luuda nya, yé ka lɔzan do kpen ’ka dan ye lɛ lo.