Bélidɔwesɛbɛ Fiézan 27 - Kazambale lé Sebe Sauunu 1979

Gɔlɛ zun dɔle Juudɛn yuu zi

¹ Moizi valé Izraɛl lé mi segelenu dére ’ko fe munu lɛ léé, bélidɔwenu faa lé ko wo fe ka lɛ kyɔ, ’ka wo ta tawo.

² Dé ka Juudɛn yuu kini yé ka bɔ tɛrɛ lé Gakelebale, kalé Bale a nɔ ka lɛ, a ta, ’ka gɔlɛ blɛnblɛnnu zun dɔ yé ka wo mawo laso nya.

³ ’Ka bélidɔwe ’konu faa gyɛ gɔlɛ ’konu ta, ’té dé ka Juudɛn yuu kini yé ka bɔ tɛrɛ lé Gakelebale, kalé Bale a nɔ ka lɛ, a ta, Gakelebale ka tranu lé Bale a fe ka lɛ fɛan zo, a zo. Tɛrɛ ’ko a tɛrɛ nyɔnɔzan nya.

⁴ Dé ka Juudɛn yuu kini, gɔlɛnu lé maa a fe ka lɛ kyɔ léé, ’ka wo zun dɔ bɛ, ka dan wo zun dɔ lɛ Ébal gɔ nwiin, yé ’ka laso wo wo ma.

⁵ ’Bɛna lé ka dan Gakelebale, kalé Bale banna do kɛlɛ lɛ; ’ka a kɛlɛ gɔlɛ lé foliɛwɔlɛ ’ka mane lɛ wo ma lo, wo nya;

⁶ ka dan Gakelebale, kalé Bale banna kɛlɛ lɛ gɔlɛ pla nya. Balebanna ’ko ta lé ka dan winu kyɛ ble lɛ Gakelebale, kalé Bale lɛ;

⁷ ’ka bɔvɔ sarakanu bo ’bɛna é ziin, yé ’ka fɛ ble ’bɛna, yé ka gi ’é nana Gakelebale, kalé Bale ’lɛ.

⁸ Ka dan bélidɔwe ’konu faa gyɛ lɛ gɔlɛ ’konu ta, ’ka wo guru vɔ é zima.

⁹ Moizi valé Balebanmunu, Lévinu, wa fe Izraɛl munu faa lɛ léma: Izraɛl, ’ka tɔné dɔ ko lɛ tegele; ’ka kɛlɛ Gakelebale, kalé Bale lé munu nya kyɔ.

¹⁰ ’Ka Gakelebale, kalé Bale dére lɛdɔma yé alé bélidɔwenu valé a sɔnnénu lé maa wo fe ka lɛ kyɔ, ’ka tawo wo yɛrama.

Drɔɔvolenu valé balepalenu

¹¹ ’Bɛ yi duo nya bɛ, Moizi lé munu lɛ léé:

¹² Dé ka Juudɛn kini, Siméɔnnu koo, Lévinu koo, Judanu koo, Isakaanu koo, Jozɛfunu valé Bɛnjamɛnnu koo, ’wo dɔ Garizim gɔ nwiin, munu drɔɔ vole we gi;

¹³ Rubɛnnu koo, Gadnu koo, Azɛɛnu koo, Zabulɔnnu koo, Dannu valé Néfitalinu koo, ’wo dɔ Ébal gɔ nwiin, balepadére fele we gi.

¹⁴ Lévinu é dan we fe lɛ é vinin, wo dére biéle nya, Izraɛl faa lɛ léma:

¹⁵ Mi lé é miyili nyaa, ɛɛ, é miyili kɛlɛ foliɛwɔlɛ selele nya, gikinizan panyanama lé é a bélé bo zo Gakelebale yuɛ gi bɛ, dé mian a nyaa yé é a dɔ kyeen gi fɛdona, ’té bale a é pale ’bɛzan ma ma; yé munu faa é dan a zi pa lɛ léé: lin, ’é kɛlɛ a zo.

¹⁶ Mi lé é nyé yéli é ti valé é bu ma, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

¹⁷ Mi lé é bɔluzan lé glɛ ta bɔɔlu si é vɔna, ’té bale a é pale ’bɛzan ma, yé munu faa é dan a fe lɛ léé: Iin, ’é kɛlɛ a zo.

¹⁸ Mi lé é yuɛwiizan saan zi ta, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

¹⁹ Bɛn bɛ mi koo, ti valé bugalazan koo, zanagalale koo, dé mian wolé wekɛlɛse si wo lee, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

²⁰ Mian é yia é ti na va, ’té bale a é pale ’bɛzan ma, naa, é ’é ti tasɔ nwa, ’bɛzama; yé munu faa é dan a fe lɛ léé: Iin, ’é kɛlɛ a zo.

²¹ Dé é a wiowian nya, mian é yia a va, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

²² Mian é yia ’é buru va, ɛɛ, dé a ti lé né léé, ɛɛ, dé a bu lé né léé, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

²³ Mi lé é yia é na bu va, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

²⁴ Mi lé é bɔluzan bla kyeen gi, ’té bale a é pale ’bɛzan ma ma; yé munu faa é dan a fe lɛ léé: Iin, ’é kɛlɛ a zo.

²⁵ Mi lé é fɛ si munu lee, weanwiinlozan gyɛle we ma, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.

²⁶ Mi lé é ’ka bélidɔwe ’konu kɛlɛle lɛ sɔɔan lo, ’té é ’ka wo ta tawoo lo, ’té bale a é pale ’bɛzan ma; yé munu faa é dan a fe lɛ léé: Iin, ’é kɛlɛ a zo.